2 MANERAHA 4
4
O Elisa ki tamania na gete na nâ i matareha
1Na nâna na hitangita na poropete ki râ i pasina o Elisa ma ki vi: “Poropete, o vaniaku ki me. Igo ko bani girara, vi ngaia ki toto suria God. Ma ta na mane, ngaia o vaniaku ki bani hagaba tenia, ngaia ki râ me, hanana vi torererua o kareku gi rua, karu voravora re na kare rakuraku iana baruna na hagaba iana o vaniaku.”
2O Elisa ki hagatea, ki vi: “Na tarana ta kani vigê girara gê tamanigo renia? Visia me, na ta kani gâga mênga i ruma iamu.”
Na gete ki arami, ki vi: “Mareha râra ta na marâ, nga noga ma na kere pi na hê ni oile ni olive.”
3O Elisa ki vi tanga, ki vi: “Go arâhira na enoni hagarangigo ma ko toregi nga tenira na baguruni na ara ni pi hato i pasita. 4Hemuri igo ma o karemu kamu bêbanu i ruma, kamu purusia na maani ruma ma kamu kahu karangia na oile surigi na pi. Na ani i vunuvunu na pi mu naka râ getea.”
5Hoita, na gete ki banu i ruma iana henirerua o karena, ki purusia na maani ruma, ki tavoa na kere pi ni oile ni olive ma ki karangia na oile surigi na pi o karena karu toregi me. 6Matena i hagavunusigi hato na ara ni pi, ngaia ki hagate, ki vi: “Tani nikâ?” Na hitangiterua o karena ki arami, ki vi: “Na hagahatungini kani ikê!” Ma na oile ni olive ki kahu pe gogo nikâ. 7Ngaia ki aporo tanga o Elisa. Na poropete ki vi tanga, ki vi: “Gu hagavuringenigi na oile ni olive ma ko barubaru re na hagaba hato iamu, ma na haga na ani i page hitahita râ ki page ararigamu igo mo karemu, hanana vigamu mauri re.”
O Elisa ma na gete ruruguha i Suneme
8I ta na tangiana o Elisa ki râ i Suneme. Na gete ruruguha kani gâga i ngekana. Na gete ki unia banu ki ngê. Haganega tenia ngekana, na ara ni mateni o Elisa ki arâ i Suneme, ngaia ki ngêngê tare i pasina na gete ngekana. 9Na gete ki vi tanga o vaniana, ki vi: “Inê kê girara, vi na mane i arâ me tare ikê, ngaia ki na mane i hagakoro obana God. 10Ge tagarahia na kere kiboru igê na gerina aberabera na ruma, ka nakagi igê na bea ni mêru, na bea ni ngêra, na agâgâ ma na laiti. Vikana ngaia ki girara i gâga igê i na ara ni matena i vatugigerua me.”
11I ta na tangiana o Elisa ki râ nikâ i Suneme, ma ki akê igê na kiboru iana ki mamaro. 12Ngaia ki vi tanga o Gegasi na kariana, ki râ ki unia me na gete. Matena ki râ me na gete akana, 13o Elisa ki vi tanga o Gegasi, ki vi: “Go hagatea, vi na ta kani araria, vige vatea meni na tagaraha hato iana renigerua, suria i bâsurigerua. Vari ngaia ki obaniê, vigê arâ i pasina na maneraha, se vi i pasina na mane i bêngenira na mane ni me, hanana vigê nungia ki mahata tanga.”
Na gete ki arami, ki vi: “Inê ki tongasiê na ara ni marâ. Manga gê obania ta na marâ, na kariaku mareku vige tamaniê.”
14O Elisa ki hagatea o Gegasi, ki vi: “Na ta so ma be vatea renia?”
O Gegasi ki arami, ki vi: “Bâ, ngaia ki pe apara na kare mane ma o vaniana ki merahaga bâraha.”
15O Elisa ki bonasia o Gegasi, ki vi: “Vi tanga ke râ me.” Na gete ki râ me ma ki ura i maani ruma. 16O Elisa ki vi tanga, ki vi: “Igê na harisi hemuri matena manga i ngekê, igo ko page topea na kare mane.”
Na gete ki mamana, ki vi: “Aige! Poropete, siana ko hagaparuê. Na poropete iana God kanigo.”
17Ma bâ, igê na ararina na matena ngekana i na harisi me na gete ki apara na kare mane, manga i bani visia o Elisa.
18I murini tani na harisi, matena ga mêa na mu, na kere mane ki hura ki râ i mu i pasina o vaemana, i oga henira na enoni, ga rurugi na ngêra i mêa. Na mavoraro ngekana. 19Na kere mane ki parama ma ki avaravara tanga o vaemana, ki vi: “Na bêku! Na bêku! I hara.”
O vaemana ki vi tanga ta na kariana, ki vi: “Torea aporo na kere mane tanga kenana.” 20Na kariana ki torea aporo na kere mane tanga kenana. Kenana ki topea ki meoga mataro me na ritovagana, i me igê o karena. 21Ngaia ki metagere tanga na kiboru iana o Elisa, ki hagatâhia i bea, ki râ pania ma ki hura ki purusia na maani ruma. 22Hemuri ngaia ki unia me o vaniana ma ki vi tanga, ki vi: “Vi tanga ta na kariamu, ke râ me ikê henia na tonki. Be râ nga i pasina na poropete o Elisa. Inê kê aporo me ototo râ, manga vi pe hagabarasiê ta na marâ.
23O vaniana ki hagatea, ki vi: “Tanu hega kanigo obania vigo arâ nga i ngekê? I ngekê ki mareha vi na tangiana ni mamaroha, se vi na tangiana raha na hageha haoru!” Na gete ki arami, ki vi: “Mako!” 24Na kariana ki hagarêa na tonki tanga. Ngaia ki bonasia na kariana, ki vi: “Go hagasua na tonki ki arâ rêrê, ma siana ki arâ haritagi mataro me kê vivi tangago.” 25Vikê ngaia ki tavoraha ma ki râ i hungana i Karamele i pasina o Elisa.
O Elisa ki bâsia râ i arâ me hagatê ma ki vi tanga o Gegasi na kariana, ki vi: “Bâ, na gete i Suneme kani arâ me ikana. 26Tango vurusia ma ko tarahua tenia, vi na ara ni marâ ka koro ma tangara ngaia, o vaniana ma o karena.”
Na gete ki hagarongoa o Gegasi, vi na ara ni marâ i koro ma. 27Matena i ata me i pasina o Elisa, ngaia ki tubê so tanga, ma ki têgi râ na êgana. O Gegasi ki haga ni purisia râ, ma o Elisa ki vi: “Naka so! Go pe bâsia kani i rugu bâraha na aitangihana ma na Araha ki pe hagarongoê rârâ renia!”
28Na gete ki vi tanga o Elisa, ki vi: “Poropete, i hega inê kanigê nungigo renia na kare mane? I hega, inê kê pe bani vi tangago, vi siana ko hagaparuê?”
29O Elisa ki vi tanga o Gegasi, ki vi: “Garigari! Torea na vatuku ku râ! Siana ko rêra, matena go tarahua i tara ta na enoni. Ma ki manga na enoni ma ka megotamasi, siana. Go ototo râ nga i ruma ma ko tagarenia râ na vatuku i avorana na kere mane.”
30Na gete ki vi tanga o Elisa, ki vi: “Inê kê tohe renia na Araha mamauri ma renigo igo, gê toto surigamurua tare, vi manga inê geteê ki asa be aporo! Vikê o Elisa ki aharaga ma ki râ henia. 31O Gegasi ki nanago ma ki tagarenia râ na vato iana o Elisa i avorana na kare, ma na kare ki ama ni manamanapuaga ngavê nga ma ki pe mêri aporo rârâ. Vikê ngaia ki aporo vurusia o Elisa, ma ki vi: “Na kere mane ki pe rite aporo.”
32Matena i ata me o Elisa, ngaia ki banu getea igê na kiboru ma ki bâsia na kere mane i bani me, ki tâtâ i bea. 33Ngaia ki purusia na maani ruma ma ki avarasia na Araha. 34Hemuri ngaia ki tâ kê ototo i apena na kere mane. Na harana, na maana ma na rimana i harana, i maana ma i rimana na kere mane. Matena i tâ kê ototo i apena na kere mane, na apena na kere mane ki haganega ki mahana aporo. 35O Elisa ki aharaga, ki rârâ igê na kiboru, ma ki kahu aporo nikâ ki tâ kê i apena na kere mane. Na kere mane ki ramesi hagepi ma ki kahu ehasi na maana. 36O Elisa ki unia me o Gegasi ma ki vi tanga, vi unia me kenana na kere mane. Matena i banu me na gete, o Elisa ki vi tanga, ki vi: “O karemu ikê. Torea!” 37Na gete ki susure ki tubê so i ano i maana o Elisa. Hemuri ki ragea o karena ma ki mehura.
Na mena gi rua nikâ iana o Elisa
38Matena na magêha raha ki ramo suria na apanena hagenani, o Elisa ki oga nikâ i Gilegale. Matena i hagesurira na poropete i ngekana, ngaia ki vi tanga na kariana, ki hagâgasia na kuki raha igê na gi ma ki hagamako na ngêra tangara. 39Na hitangita na poropete ngegana ki râ i mu, hanana vi totora na marâ i toraria henia na ngauha. Ngaia ki tarahua na varo i bemu ma ki husigi na guani mataro me ki vunu ngavê na tuguni iana. Ngaia ki migiaporo ma ki ninigi akê igê na ngêra i rarona na kuki. Ma ngaia ki pe girara vi na ta ngekana. 40Na ngêra ka ape tangara na mane ka ngê. Matena ga namigi amaki, ngaira ka gasuga, ka vi tanga o Elisa, ka vi: “E, ga mesia!” Ngaira ka usi vige ngê. 41O Elisa ki vi: “Me tani na ngangani na koni.” Ngaia ki kasigi akê igê na kuki ma ki vi: “Ape nikâ tani na ngêra tangara na mane.” Ma na ngêra ki kahu koro.
42Ta na tangiana nikâ ta na mane ki râ me tenia i Bala Salisa. Ngaia ki migirâ me tanga o Elisa na guani na bereti na koni tangahuru gi rua, na nagoni na mu igê na harisi ngekana, ma tani na guani haoru na koni. O Elisa ki vi tanga na kariana, vi hagangêra na poropete ngegana renigi. 43Na kariana ki arami, ki vi: “Go takusia vari, vi ngaigi ki ararira na mane tangarê gi tage?”
O Elisa ki arami, ki vi: “Vatera ke ngê, suria na Araha ki vi, vi ngaira ka page ngêngê masu ma ka page hagahitagi.” 44Vikê na kariana ki hagangêra. Ngaira ka ngê ma ka hagahitagi, manga i bania visia na Araha.
Currently Selected:
2 MANERAHA 4: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific