Romanos 5
5
Qomi' ỹaỹamaxareete' Ñim Lo'onatac 'Enauacna, chegoqchigui So Jesucristo
1Ñim Lo'onatac 'Enauacna qomi' ỹaỹamaxareete' cha'aye souaxat da huo'o da qarpi'iỹaxac Ñimaye. Qaq damaye chegoqchigui So Qarataxala' Jesucristo. Qaq ỹoqo'oye nagui huo'o da qarlagaxayec da sonaqto'ot Ñim Lo'onatac 'Enauacna. 2Qaq huo'o da qaramaic da saỹaanaq da chegoqchigui da qarpi'iỹaxac So Jesucristo, nache nagui selagaqtapiguiñi souaqtaigui da lsoxoyec Ñim Lo'onatac 'Enauacna. Qataq que'eca anata na'a'q ñeuanaqaua'a qome Ñimaye da la'amaqchec. 3Qalaxaye nataqa'en huo'o da qantonaxac souaxat da qanque'eenaxac, cha'aye saỹatenaqta da nache 'eetec de'era, nache saỹaanaq da lleuenaxaguet na qanque'eenaxaguesat. 4-5Qaq da saỹaanaq da lleuenaxaguet na qanque'eenaxacpi, nache qomi' ỹaỹamaxareete' Ñim Lo'onatac 'Enauacna. Qaq Ñimaye da qomi' ỹaỹamaxareete', nache ỹataqta 'eesa da qomi' nca'alaxatre'c. Qaq de'era saỹatenaqta da ỹataqta 'eesa: Ñim Lo'onatac 'Enauacna ỹataqta ipacchigui cam ỹachaxanapec, ỹoqo'oye Ñimaye nlaxatchiguilo naua qarquiyaqtel da lsoxoyec, ỹachegoxotchigui So Saqcha'a Na'añaxac Qui'itta maye qomi' ỹanema.
6Co'ollaq qomi', maye qomi' 'etaxaloxoiqa sa seshetaq da maiche ñeca'alaxataxala't, nache So Cristo nañaneguet da nleuaxa souaxat da shenaqta. Somaye ileu co'ollaq ivita so laloqo' maye ỹecchiguiña Ñim Lo'onatac 'Enauacna. 7Ỹataqta 'eesa da huo'o da lqalaic ca shiỹaxaua da nañaalec da ileualec ca 'eeta'am lỹa, na'aictaxa da no'on da lataxac huo'otaq da huo'o naq 'enec. Qalaxaye saiuena'a da huo'o ca ishet da ỹan da nachaalataxac da nañaalec ca no'on shiỹaxaua maye ỹo'otec ca ỹaỹamaqchiguiñi camaye. 8Qalaxaye na'aictaxa da qomi' ñaq souaqtaigui co'ollaxa da qaye'etaxaloxo, qalaxaye Ñim Lo'onatac 'Enauacna ỹachaxan da lta'araic lsoxoyec, nache qomi' namaxalo So Jesucristo da yaqto' qomi' ileualeguete. 9Qaq nagui da mashe ỹapalaxat na qarasouaxashetpi Ñim Lo'onatac 'Enauacna da chegoqchigui da l-leuaxa So Cristo, nache ỹoqta 'itchiguiñi qone' da huo'o da qana'achecỹaxac So Cristo, cha'aye Somaye qomi' nca'alaxateeguesopa cam nhuaxanaguec na shiỹaxauapi maye ñaq naỹa'acna. 10Cha'aye co'ollaq ñaq souaqtaigui da sepa'aguenaqtac Ñim Lo'onatac 'Enauacna, nache Ñimaye ỹachegoxotchigui da l-leuaxa So Llalec da ỹauo'o da qarlagaxayec, qaq nache ỹoqta 'itchiguiñi qone' da qomi' nca'alaxatre'c nagui da So Llalec nca'altauec qaq qomi' huo'o da qarlagaxayec da sonaqto'ot Ñimaye. 11Nataqa'en Ñim Lo'onatac 'Enauacna qomi' ỹo'oteque da lta'araic da qaramaicỹaxac, cha'aye mashe souaqtaigui da nlagaxayec da sonaqto'ot Ñimaye, chegoqchigui So Qarataxala' Jesucristo.
So Adán qataq So Cristo
12Da hua'auchiguiñi nasouaxashet ana 'alhua chegoqchigui so Adán co'ollaq sa ỹalaq. Nache chegoqchigui de'era nasouaxashet da yo'oq da nleuaxa ana 'alhua. Qaq cha'aye 'enauac da huo'o da lasouaxashet, nache 'enauac nataqa'en da ileu namayepi. 13Qaq co'ollaq saxanaxa da huo'o na namaxasoxonaxacpi, nache nale'ena da huo'o na nasouaxashetpi ana 'alhua, qalaxaye da qaica na namaxasoxonaxacpi, nache saishet da huo'o ca qaỹauo'o ca lasouaxashet da qoỹeetega sa ỹalaq. 14Qalaxaye so shiỹaxauapi chegoqchiguiña so Adán choche ivitta'a so Moisés, somayepi ileu, cha'aye huo'o da lasouaxashet. Qaq na'aictaxa da huo'otaq de'era lasouaxashet, saishet da chegoqchigui da souaxat da sa ỹalaxaguet ca lamaxasoxonaxac Ñim Lo'onatac 'Enauacna, 'eeta'am da 'eetec so Adán.
Huo'o na huaña da so Adán nateeteguet da lataxac So Cristo. 15Qalaxaye de'era lasouaxashet so Adán, damaye saishet da qanaloqnaxaneguet dam lachetaqtaxanaxat Ñim Lo'onatac 'Enauacna maye qomi' ỹanema. Cha'aye de'era lasouaxashet so Adán chegoqchigui da qalota na ileu; qalaxaye chegoqchigui So Jesucristo da Ñim Lo'onatac 'Enauacna qomi' ỹanema de'era qanmeỹaxac maye ỹataqta ỹactec da lyac qataq qalota na ishet da ỹaỹamaxaañi. 16Qaq ỹoqo'oye de'era lasouaxashet so Adán saishet da ishet da qanaloqnaxaneguet da lqouagaxanaqtaic Ñim Lo'onatac 'Enauacna. Cha'aye da lle'etaxaloxo so Adán ỹo'ot da Ñim Lo'onatac 'Enauacna ỹa'axat da huo'o da lasouaxashet somaye. Qalaxaye qana'achec souaxat da lqouagaxanaqtaic Ñim Lo'onatac 'Enauacna, da nagui Ñimaye ỹapalaxat na lasouaxashetpi na 'etaxaloxoicpi, na'aictaxa da saishet da taiguet damaye. 17Da lle'etaxaloxo so Adán da chegoqchigui da huo'o da la'añaxac da nleuaxa ana 'alhua. Qaq ỹactec qone' da 'eesa da chegoqchigui So Jesucristo, da qomi' senoxonaxaua'a da la'añaxac da dalaxaic achaalataxac. Cha'aye Ñim Lo'onatac 'Enauacna qomi' ỹauoteque, qataq qomi' ỹaỹamaxareete', qaq saishet da qomi' iỹaxanoto aca lasheue damaye.
18Chegoqchigui da lasouaxashet so Adán, da Ñim Lo'onatac 'Enauacna ỹa'axat da 'enauac da shenaqta saỹaqa'aguet da seleuaq. Qalaxaye qana'achec da chegoqchigui So Jesucristo da qomi' ileualeguete, nache Ñim Lo'onatac 'Enauacna ỹapalaxat na qarasouaxashetpi qataq qomi' ỹanema ca achaalataxac maye chochaq tatec. 19Cha'aye dam naigui da sa ỹalaq so 'oonolec shiỹaxaua, damaye ỹo'ot da qalota na sa ỹalaq. Qalaxaye chegoqchigui da lalaxayec so lỹa 'oonolec maye le'enaxat Jesús da Ñim Lo'onatac 'Enauacna ỹapalaxat na lasouaxashetpi na shiỹaxauapi.
20Na namaxasoxonaxacpi co'ollaq huo'o, nache ỹo'ot da la'añaxac da ñe'etaxaloxo. Qaq na'aictaxa da ñe'etaxaloxo da huo'o da la'añaxac, qalaxaye da lsoxoyec Ñim Lo'onatac 'Enauacna napacalec damaye. 21Cha'aye dam 'eetec da ñe'etaxaloxo co'ollaq ỹataqta huo'o da la'añaxac da nachetac da nleuaxa, qaq nache 'eetec nataqa'en da la'añaxac da lqouagaxanaqtaic Ñim Lo'onatac 'Enauacna da ỹapalaxat na qarasouaxashetpi qataq qomi' ỹanema da achaalataxac maye qaica ca loga't, chegoqchigui naqa'en So Qarataxala' Jesucristo.
Currently Selected:
Romanos 5: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.