Romanos 4
4
Qaỹaloqnaxana so Abraham
1Seuennataxanaxalec da huaigui so Abraham maye sachegoxosoxoguet. 2Da Ñim Lo'onatac 'Enauacna taxa da ỹaỹamaxareeta somaye souaxat nam ỹo'otpi, nache somayectaxa ỹataqta huo'o da ño'oxonnaxac. Qalaxaye da nachaatot Ñim Lo'onatac 'Enauacna, nache saishet da huo'o ca na'amqaanaxac. 3Cha'aye ana nere maye huetalec na la'aqtacpi Ñim Lo'onatac 'Enauacna 'eeta':
«Ñimaye ỹaỹamaxareeta so Abraham,
cha'aye so Abraham huo'o da lpi'iỹaxac Ñim Lo'onatac 'Enauacna.»
4Cha'aye saloqnaxana aca anom maye qoỹami' ca do'onataxaatac, acamaye ỹataqta lasheue da lo'onataxanaxac saishet da choche qoỹaatem da 'eeta'am ca chochaq nme, cha'aye nache lashiichiỹaxac. 5Qalaxaye Ñim Lo'onatac 'Enauacna ỹa'axat da qaica ca lasouaxashet ca 'etaxaloxoic, na'aictaxa da que'eca 'etaxaloxoic qaica ca ỹo'ot da huo'otaq taiguet da ỹaconeguet damaye, cha'aye Ñim Lo'onatac 'Enauacna ỹaỹamaxareeta camaye souaxat da huo'o da lpi'iỹaxac. 6So David nataqa'en qomi' da'aqtaxanema da lamaxayec nam na'aictaxa da qaica ca ỹo'ot da huo'otaq taiguet da ỹaconeguet damaye. Ñim Lo'onatac 'Enauacna ỹapalaxat na lasouaxashet namayepi souaxat da huo'o da lpi'iỹaxac Ñimaye. 'Era da la'aqtac so David maye nanettalec ana nere maye huetalec na la'aqtacpi Ñim Lo'onatac 'Enauacna, 'eeta':
7«¡Ỹataqta machiguiñi qome nam shiỹaxauapi
maye ỹapalaxat Ñim Lo'onatac 'Enauacna na lasouaxashetpi!
¡Cha'aye Ñimaye ỹataqta icoua'ai
na lasouaxashetpi maye ỹo'ot namayepi!
8¡Ỹataqta machiguiñi qome nam shiỹaxauapi
maye Ñim Lo'onatac 'Enauacna ỹapalaxat na lasouaxashetpi
qataq 'enauac nam qauem maye ỹo'otpi!»
9Qalaxaye de'era namaxayec ¿peta'a nachaqnata nam huo'o na na'anaxat na lo'oc#4.9 Na'anaxat na lo'oc (circuncisión): Qaitaxaỹaxan ye Romanos 2.25 maye ỹa'axat da naigui de'era na'aqtac. huo'otaq nataqa'en nam qaica ca na'anaxashet? Mashe sa'axataqtac da Ñim Lo'onatac 'Enauacna ỹaỹamaxareeta so Abraham, cha'aye somaye huo'o da lpi'iỹaxac Ñimaye. 10Qaq damaye qaica ca iqoleguet da Ñim Lo'onatac 'Enauacna ỹaỹamaxareeta so Abraham co'ollaq saxanaqca ca na'anaxat na lo'oc. 11Qaq ỹoqta 'eesa da so Abraham qaỹauo'o co'ollaxa so la'anaxat na lo'oc da na'anaxat qanqa'en, qaq damaye ỹachaxan da Ñim Lo'onatac 'Enauacna ỹaconeguet somaye souaxat da huo'o da lpi'iỹaxac. Qaq 'era da 'eetec so Abraham da huo'omshe qoỹanagui da lta'a 'enauac nam huo'o da lpi'iỹaxac Ñim Lo'onatac 'Enauacna, na'aictaxa da saishet da qaỹauo'o ca na'anaxat na lo'oc. 12Qalaxaye so Abraham nataqa'en lta'a nam huo'o na na'anaxat na lo'oc, qataq huo'o da lpi'iỹaxac Ñim Lo'onatac 'Enauacna. Qaq de'era ỹachaxan da namayepi quetague' da lataxac so Abraham co'ollaq saxanaxa da qaỹauo'o ca na'anaxat na lo'oc.
Dam qaỹachaxanapecot nam huo'o da lpi'iỹaxac Ñim Lo'onatac 'Enauacna
13Ñim Lo'onatac 'Enauacna ỹachaxanapecot so Abraham qataq na llalaqpi da ỹami' 'enauac ana 'alhua. Qalaxaye de'era ỹachaxanapec saishet da chegoqchigui da souaxat da ỹalaxalec nam namaxasoxonaxacpi so Abraham. Maye souaxat da somaye huo'o da lpi'iỹaxac Ñim Lo'onatac 'Enauacna. Nache Ñimaye ỹaỹamaxareeta somaye, nache ỹamata'ac da no'on shiỹaxaua. 14Cha'aye da ỹachaxanapec Ñim Lo'onatac 'Enauacna, da talec nam ỹalaxaguet na namaxasoxonaxacpi, huaña nache da npi'iỹaxac qataq dam ỹachaxanapec Ñimaye ỹataqta qaica ca naigui. 15Ñim Lo'onatac 'Enauacna ỹauo'o ca nhuaxanaguec nam sa ỹalaxalec na namaxasoxonaxacpi. Qalaxaye da qaica ca namaxasoxonaxac, nache qaica ca ishet da huasoilec da sa ỹalaq.
16Qaq ỹoqo'oye dam ỹachaxanapec Ñim Lo'onatac 'Enauacna da yaqto' huo'o da 'enec da talec 'enauac nam llalaqpi so Abraham, nache Ñimaye saishet da iỹaxanaique ca naiguet damaye. Ỹo'ot de'era ỹachaxanapec da talec 'enauac nam huo'o da lpi'iỹaxac Ñimaye. Saishet da nachaqnata nam ỹalaxalec na namaxasoxonaxacpi, maye nataqa'en 'enauac nam huo'o da lpi'iỹaxac maye 'eeta'am so Abraham. Ỹoqo'oye so Abraham nacheso so 'enauac da qarta'a. 17Ana nere maye huetalec na la'aqtacpi Ñim Lo'onatac 'Enauacna, 'eeta': «Ñimaye 'enapega so Abraham da somaye ivira'a da lta'a na ỹotta'a't shiỹaxauapi ana 'alhua.» Qaq de'era ỹachaxanapec Ñim Lo'onatac 'Enauacna ỹo'otec so Abraham, cha'aye somaye ỹa'amaqten da nachaqñita 'oonolec qataq huo'o da la'añaxac da nca'alaxatec na mashe ileu qataq da huo'o ca ỹo'ot dalaxaic.
18Co'ollaq Ñim Lo'onatac 'Enauacna ỹachaxanapecot so Abraham da qalota ca llalaqpi. Qaq damaye ỹataqta 'eeta'am da saishet da ishet. Qalaxaye souaxat da naquitaxac qataq da lpi'iỹaxac Ñimaye, nache so Abraham ivira'a da nacheso so chegoxoguet na qalota shiỹaxauapi ana 'alhua maye nataqa'en ỹa'amaqten Ñim Lo'onatac 'Enauacna. 19Na'aictaxa da mashe yaqta'a da ivi' naua cien vi'iye da llaxa qataq mashe saqaỹaloq da ileu, qalaxaye so Abraham saishet da ỹaxaañi da lpi'iỹaxac Ñim Lo'onatac 'Enauacna. Na'aictaxa da ỹaỹaten da aso lhua Sara da saishet da huo'o ca llalec, 20qalaxaye somaye saishet da iqoleguet da Ñim Lo'onatac 'Enauacna ipacchigui da ỹachaxanapec. Nachaqrata da nquictauec da qaramta da lpi'iỹaxac qataq da naquitaxac, qataq ỹaatacot da na'achecỹaxac Ñimaye. 21So Abraham ỹataqta ỹaỹateeta da Ñim Lo'onatac 'Enauacna huo'o da la'añaxac da ishet da ipactelec dam ỹachaxanapec. 22Qaq ỹoqo'oye Ñim Lo'onatac 'Enauacna ỹaỹamaxareeta somaye, nache ỹamata'ac da no'on shiỹaxaua.
23Qaq ana nere maye huetalec na la'aqtacpi Ñim Lo'onatac 'Enauacna da ỹa'axat da Ñimaye ỹaỹamaxareeta so Abraham, qaq damaye saishet da naigui da nachaqsota somaye da ỹaỹamaxareeta, 24maye nataqa'en qomi'. Ñim Lo'onatac 'Enauacna, nacheñi ñi nca'alaxatec So Jesús maye Qarataxala', qataq qomi' ỹaỹamaxareete' da sepi'iỹaqa'a Somaye. 25Ñim Lo'onatac 'Enauacna ỹan So Jesús co'ollaxa da yaqto' qomi' ileualeguete souaxat na qarasouaxashetpi, qataq nca'alaxateeguesop da nleuaxa, da yaqto' ỹapalaxat na qarasouaxashetpi.
Currently Selected:
Romanos 4: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.