Proverbios 28
28
1Ca qauemaic qalaq datauec na'aictaxa da saishet da qaicaatac,
qaq na no'on da lataxac qalaq 'eeta'am na llon da qaica ca ndaqtaique.
2Da huo'o da loquiaxac ca qanayeutaña 'alhua,
nache ỹo'ot da nquictauec na nataxala'pi,
qalaxaye ca nataxala' maye huo'o na ỹaỹaten
da ilo'ogue camaye nache ỹaỹamaqchiguiñi naqa'en
da lataxac que'eca qanayeuta'a.
3Qaq ca qauemaic maye nhuo' na choxoraqpi,
qalaq 'eeta'am na lta'araic auot da nlaxaañi
na ala na nañiguishec.
4Qaq ca ca'ai da llec na napaxaguenataxanaxacpi
camaye ỹo'oxoreetac qome na qauemaicpi,
qaq ca ỹalaxaguet na napaxaguenataxanaxacpi
qalaq dataỹa'aguet namayepi.
5Na qauemaicpi qalaq saishet da ỹaỹaten da llec
ca ỹaỹamaqchiguiñi lataxac,
qaq na nmitaique Ñim Nataxala' qalaq ỹaỹaten 'enauac namayepi.
6Na'aictoxo' da choxoraq ca ỹale qalaxaye huo'o da llo'oxoyec,
qaq saq 'ena'am ca sallaxanec qalaxaye qauema naua lhuennataxaco.
7Ca ñalec ỹaanataxanaxaic camaye ipacchiguilo
naua lqataxaco Ñim Lo'onatac 'Enauacna,
qaq ca saiỹotec ca quia'axaic qalaq ỹo'ot da lcoxo ca lta'a.
8Ca lapootasheguem da lsallaxa
maye ỹachegoxotaigui ana nsheetenaxanaqte,
camaye laỹootasheguem da lsallaxa
da yaqto' talec qome ca nqouaguec na choxoraqpi.
9Ñim Lo'onatac 'Enauacna sa ỹaconeguet da natamnaxac,
ca sa ỹalaxagueta naua lqataxaco Ñimaye.
10Ca ỹauecta'a ca qauem nqa'aic ca no'on da lataxac,
camaye tangui aca maiche lqoina,
qalaxaye ca ỹale nalochiguiñi da lataxac, camaye talec da no'on.
11Ca sallaxanec ipi'itaxaatega da ỹaanaxanaxaic,
qalaxaye ca choxoraq qataq ỹaanataxanaxaic,
ishet da ỹaỹaten camaye da 'eesa da ỹaanaxanaxaic.
12Da ivita da dauegaxan na no'on da lataxac,
nache qaỹo'ot ca lta'araic na'ashaxac,
qaq da dauegaxan na qauem da lataxac,
qalaq nqañoxooñi na shiỹaxauapi.
13Qaq ca ỹoxotchiguiñi ca lasouaxashet
qalaq saishet da no'on da llecỹaxac,
qaq ca ỹa'axatta qataq ỹaxanec ca lasouaxashet,
camaye ishet da qaichoxoren.
14Ỹataqta machiguiñi ca shiỹaxaua
da huo'o naq 'enec naqa'en Ñim Nataxala',
qalaxaye ca qaramta da lquiyaqteỹaxac
qalaq taỹa'a da lachoxoyec.
15'Eeta'am ca llon maye desoqtac,
huo'otaq aca potai maye nqouaqato,
ca qauemaic maye ilotague' na shiỹaxauapi choxoraq.
16Ca nta'a qaica ca ỹaỹaanapec
camaye nquigaxattauec
da huetaiya' naqa'en na shiỹaxauapi,
qaq ca saishet da mataxalaic qalaq logoraic da nachaalataxac.
17Ca dalaataxan, camaye saishet da vi'iiguet
da naneltaxaatac choche ivitta'a aca huachiqui,
nache qaica ca ishet da ỹe'egueeta'a da ỹa'axaneguet.
18Ca ỹale ỹo'oxoraic camaye ishet da nca'alec,
qaq ca 'etaxaloxoic qalaq taỹa'a da lachoxoyec.
19Ca do'onataxaatapeguelec ca na'alhua,
camaye ivira'a da chochaq huañi na aloq,
qaq ca quetague' ca sa do'onataxan
qalaq nda'a't da chochaq huañi da lachoxoyec.
20Ca shiỹaxaua maye npe'et camaye ivira'a da qaỹo'oxoreetac,
qaq ca nda'a't da iỹalata'a da lsallaxa,
qalaq saishet da saqca ca nhuaxanaguec.
21Qataq saỹaỹamaxañi da qalca'atagui na shiỹaxauapi,
cha'aye ivira'a catai' saq 'amaqtaq nallecolec ishet da qaỹasoilec.
22Ca nda'a't da iuennatega da nsallaxa,
camaye saỹaỹaten da naỹa'a da lachoxoyec.
23Ca ishet da nlaxan ca lỹa
camaye ivira'a da huo'o da nauoche,
qaq saq 'ena'am ca choche no'onaxa't naua la'aqtaqa.
24Ca decachiỹot ca lta'a huo'otaq aca late'e,
nache camaye 'eetega da qaica ca lasouaxashet.
Qaq camaye nache nauochaxaua na laataxanaxaicpi.
25Ca quetague' da lqopitaxanaqtaic
camaye ỹo'otteua'a da loquiaxac,
qaq ca pi'iỹa'a Ñim Nataxala' qalaq camaye nquictasheguem.
26Qataq ca pe'etegalo naua maiche lhuennataxaco
camaye qaica ca ỹaỹaanapec,
qaq ca ỹaỹamaqchiyiñi naua laỹaanataxanaxaco
qalaq huo'o da lca'alaxa.
27Ca itauaatac na choxoraq camaye qaica ca iueetac,
qaq ca saishet da itauan na choxoraq
qalaq camaye qalota da nsheunaguec.
28Da ivita da dauegaxan na qauemaicpi,
nache na shiỹaxauapi nqañoxooñi,
qalaxaye da imeuo namayepi
nache nachaañi na no'on da lataxac.
Currently Selected:
Proverbios 28: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.