Proverbios 27
27
1Saishet da 'ana'amaqteeta'aguet
ca lỹa na'a'q,
cha'aye sa 'auaỹaten ca huaigui qom nvi' camaye.
2'Aua'aqta'a da ỹaqa'a ca 'am ỹo'oxoren,
cha'aye saỹaỹamaxañi da maiche 'año'oxoreetapeguela't.
3Na coma'pi qataq na lsoche namaye ỹataqta qapa'atta,
qalaxaye ỹactec da qapa'atta da lalemataic ca qaica ca ỹaỹaanapec.
4Da nayeloxo ỹataqta qauem qataq da nalemataic
ishet da huo'o ca ilaxachigui,
qalaxaye da nquiỹaxanaqtaic qaica ca ishet da mpaxata'aguet.
5Qataq ỹaỹamaqchiguiñi ca qaichoxotta nviraqtaxanaxac,
saq 'ena'am da nauotaxanaqtaic maye saqaichoxot.
6Qataq ỹactec da naigui da qaipi'iỹa'a
ca auochaxaua maye deque'emaqtaxan,
qaq saq 'ena'am ca choche napigoxoi' ca ipa'agueetac.
7Ca comaraxaic qalaq ivira'a na te'esaq lta'a lli'i da ỹo'otan,
qaq ca iqouat qalaq ivira'a na chem 'eeta'am da ama naqa'en.
8Qataq 'eeta'am ca qoỹo da huaỹoteguelec
ca huaña cam qaỹoqta naña ca lpata'c,
nachera da 'eetec ca shiỹaxaua da coleeteguelec
ca huaña cam qaỹoqta naña ca lma'.
9Ca no'on coraxat qataq nchenaxanaxat ama na laita,
ỹo'o't da machiguiñi naqa'en da nquiyacteỹaxac,
qataq da no'on lqataxac ca auochaxaua
huo'o da lamaic naqa'en da achaalataxac.
10Saishet qome da 'aualat ca 'anauochaxaua,
qataq ca nauochaxauapi ca 'arta'a.
Qataq saishet qome da 'anqo'ona ca lma' ca 'arqaỹa
qom huo'o ca qouaigui.
Ỹactec da no'on ca nhuoreua maye saqaỹapeque,
qaq saq 'ena'am ca qaỹoqta nqaỹa.
11'Anaỹaanaxanaqcheno' 'am ỹalcolec,
yaqto' samachiguiñi,
yaqto' aỹem ishet qome da sasateguet
ca aỹem ipa'agueetac.
12Ca huo'o na ỹaỹaten da ila'a ca lchec nache ivita'a,
qaq ca qaica ca ỹaỹaanapec qalaq nache queta
choche ivitta'a da nque'etaxangui ca qauem.
13Qataq ca nañaalec da isheeten aca lavigaxaiste ca saỹauatton,
qalaq 'auaconalo caua alogo da lpatanaqa 'anqa'en.
14Da qaỹa'alaxalec da qaiquin ca auochaxaua
da ña qaỹa'aguet na na'a'q,
nache damaye 'eeta'am da qainogoqchettac camaye.
15Qaq nache 'eetec nataqa'en aca 'alo maye loquiaxai,
da 'eeta'am ana sanme llo'oxo da anactac na auot.
16Qataq da qanshetaique da qanllañi acamaye
qalaq 'eeta'am da qanshetaique da qaỹa'axaneguet na la'at,
huo'otaq da qaỹachalec na nhuaq lauel
da qanshetaique da qanllañi na aceite.
17Da qaiqueuoc ca lcat qalaq qaira'a ca nqueuogaxanaxat lcat,
qaq nache 'eetec ca ỹale da maiche
ỹaỹamaxaañi da lataxac ca lỹa ỹale.
18Ca ntela'a aca higo lcheyec camaye chec qome ana ala acamaye,
qataq ca ntela'a ca na'aco' camaye huo'o da ño'oxonnataguec.
19Qataq da 'eetec da qaỹalliguingui na 'etaxat,
nache yo'oqtelec naqa'en da nasheguiỹaxac,
qaq nache 'eetec da lashiguiỹaxac ca ỹale
da yo'oqta naqa'en da lquiyaqteỹaxac.
20Da nleuaxa qataq aca huachiqui
saishet da huo'o ca loga't
qataq nache 'eetec da lqopitaxanaqtaic ca ỹale
saishet da imeuo,
21Na lcat oro qataq na plata qalaq norec
na ichoxot da ỹoqta 'eesa,
qaq ca ỹale qalaq ichoxot da lataxac
da ño'oxonnataguec.
22Ca qaica ca ỹaỹaanapec na'aictoxo' da 'eeta'am
aca nañiguishe ala da ỹataqta qailaxachigui da qaisoigui,
qalaxaye camaye saishet da qanqateeguesop da qaica ca ỹaỹaten.
23Ỹataqta 'auchemaxatta qome da lataxac
ana 'arelo qaguetapi,
qataq ỹataqta 'antela'a ne'ena 'ana'atetpi,
24Cha'aye de'era nsallaxa saishet da tatec,
qataq da lataxac ca nta'a saishet da nache queta.
25Cha'aye da ivita da ñaxat na 'auaqpi,
qataq darala ana lañaxataxai,
qataq da qalaỹona't na 'auaqpi maye huaigui na aviaq,
26nache na 'arelo qagueta llalec
chegaqaigui na laue na 'ogoxotpi,
qaq na 'arelo quetaq llalec qalaq chegaqaigui aca 'om
da 'ausheenaxana ca 'ana'alhua,
27nache ana'ana 'arelo quetaq ỹataqta qalota na lche'
da yaqto' 'auque'etac 'am qataq na 'aỹa'alaqpi
qataq 'enauac na 'aro'onataxanaxanecpi.
Currently Selected:
Proverbios 27: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.