Proverbios 13
13
1Ca ñalec ỹaanaxanaxaic ỹaconeguet na lapaxaguenataxanaxacpi ca lta'a,
qaq ca saiuooneguet da qaitaxaỹot qalaq saiqocha'a na nqataxacpi.
2Ñi 'oonolec maiche ỹaconeguet da alaỹaxac na la'aqtacpi,
qaq na que'elaqtaxanaxaicpi qalaq huo'o da lyaxa da ỹo'ot da loquiaxac.
3Ca ilo'oguelo naua la'aqtaqa qalaq maiche ntela'a da nachaalataxac,
qaq ca qalota na la'aqtacpi qalaq maiche nlaxattapeguela't.
4Ca hualaic huo'o ca nqopittaique qalaxaye saishet da ỹanata,
qaq ca 'onataxanaxaic qalaxaye ishet da nquictasheguem.
5Ca no'on da lataxac saisheteguet ca natenataxanaxac,
qaq ca qauemaic qalaq ỹo'ot da na'agaxa qataq qauem da na'aqtaguec.
6Naua ỹaỹamaqchiyiñi lataxaco mpaxattaleguete ca ỹale qaica ca ỹasouaxat,
qaq na qauemsat qalaq nlaxaañi ca 'etaxaloxoic.
7Huo'o na qaica ca ye qalaq 'eetega sallaxanec,
qataq huo'o na sallaxanec qalaq ỹe'enaxat da choxoraq.
8Da lsallaxa ca sallaxanec nachera da nca'alaxatec da nachaalataxac,
qaq ca choxoraq qalaq saishet da hua'aqtega ca narenaguec.
9Ca no'on da lataxac 'eeta'am ana ncoỹaraxanaxaqui da 'ettaigui,
qaq na qauemaicpi qalaq 'eeta'am aca ncoỹaraxanaxaqui da 'omchigui.
10Da 'amqaanaxac ỹo'oteua'a da loquiaxac,
qaq da naỹaanec qalaq hueta'aguet ca sa na'amaqten.
11Da nỹalaqtoc nsallaxa, damaye taỹañecra,
qaq ca npottac da laỹonaxanaxac qalaq nquictasheguem da lsallaxa.
12Ca aquitaxac maye saipaigui, qalaq daỹalli naqa'en añi nquiyaqte,
qaq ca qoỹeetapeguec da ipacchigui
qalaq 'eeta'am aca qo'oipaq maye huo'o da lca'alaxa.
13Ca saishet da ilo'oguet ca napaxaguenataxanaxac qalaq taỹa'a da deqat,
qaq ca huo'o naq 'enec naqa'en ca namaxasoxonaxac qalaq huo'o ca nsheetenaguec.
14Da lapaxaguenataxanaxac ca ỹaanaxanaxaic
chegaqaigui da nca'alaxa qataq ishet da nca'alaxateeguesop
ca ỹale da loxonaxanaxac da nleuaxa.
15Naua qailoteguelo na'aqtaqa ỹo'ot da qaỹauotec ca shiỹaxaua,
qaq da llecỹaxac na saipaguelguete naua la'aqtaqa qalaq taỹa'a da nlaguiñi.
16Ca huo'o na ỹaỹaten qalaq ỹaỹamaxatchiguiñi da huo'o ca ỹo'ot,
qaq na qaica ca ỹaỹaanapec qalaq na'amqaañigui da no'oopashaxac.
17Ca na'aqtaxanaxanec qauemaic ỹo'ot na cotaxacpi,
qaq ca no'on na'aqtaxanaxanec qalaq ỹo'ot da nlagaxayec.
18Ca ỹo'otan na nqataxacpi qalaq taỹa'a
da lachoxoyec qataq qaica ca llo'oxoyec,
qaq ca ỹasateguet da qaitaxaỹaua'a
qalaq ỹaconeguet ca ño'oxonnataguec.
19Da ipacchigui ca qoỹeetapeguec qalaq ỹo'ot da namaicỹaxac.
Qaq na qaica ca ỹaỹaanapec qalaq saishet da ca'ai na qauem.
20Ca sa iỹotec na ỹaanaxanaxaicpi qalaq nataqa'en ỹaanaxanaxaic,
qaq ca sa iỹotec na qaica ca ỹaỹaanapec qalaq taỹa'a da deqat.
21Na qauemsat qalaq ca'attapiguiñi' na 'etaxaloxoicpi,
qaq na no'on da lataxac qalaq nsheetenaxat da ỹaỹamaqchiguiñi.
22Ca ỹale no'on da lataxac qalaq no'onaxata'aguet na laualpi na lalamaxatpi,
qaq da lsallaxa ca 'etaxaloxoic qalaq talec ca no'on da lataxac.
23Ca no'onaxa ca choxoraq qalaq saqoue na qanallec,
qalaxaye qalota na daqat namaye
souaxat da qaica ca nalochiguiñi da lataxac.
24Ca saishet da nlaxanec ca llalec qache saishet da ỹauotec,
qaq ca ỹauotec ca llalec qalaq nlaxanec da lataxac camaye.
25Ca no'on da lataxac qalaq ỹataqta comaraxaic da deque'e,
qaq ca qauemaic qalaq nda'a't na lqouaxa.
Currently Selected:
Proverbios 13: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.