Deuteronómio 34
34
Da l-leuaxa so Moisés
1So Moisés chegoqchiguiña co'ollaxa ye toolec 'alhua ye Moab da tasheguema añi qasoxonaxa Nebo, nache ivittasheguema na pa'asheguem añi qasoxonaxa Pisga maye nalotta ye Jericó. Qaq nache huaña co'ollaxa da Ñim Nataxala' ỹallelec naqa'en 'enauac ye 'alhua ye Galaad, ivitta'a ye na'alhua so Dan, 2qataq ye na'alhua so Neftalí, Efraín, qataq so Manasés, qataq 'enauac ye na'alhua so Judá, ivitta'a aye auaxai Mediterráneo, 3qataq ye Néguev, qataq ye nalochiguiñi 'alhua, qataq ye ca'amapega't ye Jericó, qataq ye huaqta'a't nỹecpi ye chaisat, ivitta'a ye Sóar. 4Nache Ñim Nataxala', 'eeta':
«'Ena nam 'alhua maye sachaxanapeguem co'ollaxa so Abraham, Isaac, qataq so Jacob da yaqto' sanem nam chegoxoguetpi. Qaq 'am sachaxana namaye da 'auallelec, qalaxaye saishet da 'anoxoneua'a qome.»
5Qaq nache huaña ye Moab da ileu so Moisés maye lamaxashec Ñim Nataxala', nache ipacchigui da la'aqtac Ñim Nataxala', 6qaq nache qailareña co'ollaxa yi'iye ca'amapega'tpi ye 'alhua Moab, maye datatta ye Bet Pegor, qalaxaye saishet da qaỹaỹaten ca ỹataqta huichiguiña choche ivitta'a nagui. 7Qaq so Moisés, ivi' ciento veinte vi'iye da nachaalataxac co'ollaq ileu, qaq somaye ñaq nauaachiguiñi qataq nalota't da la'añaxac.
8Nache so Israel le'ecpi nỹeetapeguelec co'ollaxa so Moisés soua treinta na'axa'te huaña ye ca'amapega't 'alhua ye Moab, nache qaipacchigui da lataxac da nasouaxac. 9Qaq so Josué maye llalec so Nun, ỹataqta huo'o da laỹaanec, cha'aye so Moisés ỹashel-lec co'ollaxa somaye, qaq na Israel le'ecpi ỹataqta ỹalaxaguet somaye, da ỹo'ot na lamaxasoxonaxacpi Ñim Nataxala' maye ỹamem co'ollaxa so Moisés.
10Qaq nache chegoqchiguiña co'ollaxa da qaica ca lỹa na'aqtaxanaxanec ye Israel da 'eeta'am so Moisés, da ishet da datata'aguet da na'aqtaxaatague' Ñim Nataxala', 11huo'otaq da ỹo'ot so na'anecpi maye ỹo'ot da na'aalaxa maye ỹamaxalec Ñim Nataxala' da yaqto' ỹo'otec so faraón qataq so ltauapi, qataq 'enauac na 'alhua ye Egipto, 12qataq qaica ca lỹa da 'eeta'am da la'añaxac, qataq da ỹataqta chaqaic nam ỹo'otpi maye ỹauaachigui naqa'en 'enauac na Israel le'ecpi.
Currently Selected:
Deuteronómio 34: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.