Openboarunk 7
7
144.000 Israeliten vesäajelt aun de Stiern
1Aus dit äwa wia, sach ekj en de vea Weltrechtungen vea Enjel stonen. Dee hilden dän Wint von aule vea Rechtungen trigj, daut dee nich äwa de Ieed un daut Mäa, ooda äwa irjent een Boom, blosen sull. #Dan 7,2 2Un ekj sach een aundren Enjel vom Sonnen Oppgank verendach komen, dee haud dän läwendjen Gott sien Säajel aun sikj. Un dee schrieech met lude Stemm no de vea Enjel, dän doa wia Krauft jejäft worden, de Ieed un daut Mäa Schoden to doonen, 3un säd: Doot de Ieed un daut Mäa un de Beem kjeen Schoden aun, bat wie onsen Gott siene Deena aum Stiern jetieekjent haben. #Hes 9,4.6; Opb 9,4
4Dan hieed ekj de Zol, wooväl doa wieren jetieekjent worden. Un daut wieren 144.000 von aule Stam en Israel, dee met Gott sien Säajel wieren jetieekjent worden: #Opb 14,1.3 5Von Juda sien Staum 12.000, von Ruben sien Staum 12.000, von Gad sien Staum 12.000, 6von Asser sien Staum 12.000, von Naftali sien Staum 12.000, von Manasse sien Staum 12.000, 7von Simeon sien Staum 12.000, von Levi sien Staum 12.000, von Isachar sien Staum 12.000, 8von Sebulon sien Staum 12.000, von Josef sien Staum 12.000, von Benjamin sien Staum 12.000.
Eene groote ontalboare Häad von Menschen
9Aus dit äwa wia, sach ekj von aule Raussen, Volkjsstam, Sproaken un Menschen, eene Häad, dee kjeena talen kunn, ver dän Troon bie daut Laum en witte Kjleeda stonen, met Paulm Asta en de Henj. 10Un dee schrieejen met lude Stemm: Onse Radunk kjemt von onsen Gott, dee opp däm Troon sett, un von daut Laum! 11Un aule Enjel stunden om dän Troon un om de Eltestasch un om de vea Tieren. See schmeeten sikj dol, met däm Kopp bat de Ieed un bäden Gott aun 12un säden: Amen! Säajen un Harlichkjeit un Weisheit un Dank un Iea un Krauft un Jewault jehieet onsen Gott von Eewichkjeit to Eewichkjeit! Amen.
13Dan auntwuad eena von de Eltestasch un säd to mie: Wäa sent dise, en de witte Kjleeda, un von wua komen dee? 14Un dan säd ekj to am: Har, daut weetst du. Dan säd hee to mie: Dit sent dee, dee ut de groote Vefoljunk jekomen sent. Dee haben äare Kjleeda em Bloot vom Laum kloa witt jewoschen. #Mat 24,21; Opb 12,11 15Doawäajen sent see ver Gott sien Troon un deenen am Dach un Nacht en sienen Tempel. Un dee, dee opp däm Troon sett woat mank an wonen. 16An saul nich mea hungren uk nich mea darschten; un doa woat uk nich mea de Sonn, ooda irjent eene aundre Hett, äwa an komen, #Jes 49,10 17wiels daut Laum medden opp däm Troon woat an weiden un no läwendje Wotakjwalen leiden, un Gott woat an aule Tronen von de Uagen weschen. #Psa 23,2; Jes 25,8; Opb 21,4
Currently Selected:
Openboarunk 7: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.