Openboarunk 4
4
Gottesdeenst om eenen Troon em Himmel
1Aus dit äwa wia, kjikjt ekj un sach doa ver mie em Himmel eene Däa opstonen. Un dee Stemm, dee ekj aul ea haud soo aus eene Trompeet to mie räden hieet, säd: Komm nopp hiahäa, un ekj woa die wiesen, waut nu no dit passieren mott. #Opb 1,10
2Un soo wia ekj uk fuaz em Jeist. Un doa, ver mie, wia een Troon em Himmel, opp dän eena setten deed. #Psa 47,9; Jes 6,1; Hes 1,26-28 3Un dän, dee doabowen saut, sach daut soo aus een Jaspies un Sarder; un om dän Troon wia een Räajenboagen, dän daut soo sach aus een Smaracht. 4Un om dän Troon wieren 24 aundre Troons, un opp de Troons sauten 24 Eltestasch, met witte Kjleeda aunjetrocken. Dee hauden goldne Kroonen opp de Kjap. 5Un von dän Troon kjeemen Blitzstrolen un Jewittaschläaj un Stemmen; un ver dän Troon brenden säwen Lichta, daut Gott siene säwen Jeista sent. #2Mo 19,16; Opb 1,4
Daut Glausmäa ver däm Troon
6Ver dän Troon wia waut, daut et soo sach aus een Glausmäa von Kristal, un medden aum Troon un om dän Troon wieren vea Tieren, von väaren bat hinjen voll Uagen. #Hes 1,5.10.22 7Un daut ieeschte Tia sach daut aus een Leiw, un daut aundre Tia wia soo aus een Kaulf, un daut dredde haud een Jesecht aus een Mensch, un daut vieede Tia wia soo aus een flieejenda Odla. #Hes 10,14 8Un dee vea Tieren hauden jieda sas Flichten, wieren runtom voll Uagen, soogoa unja de Flichten, hauden Dach un Nacht nich Ru un säden:
Heilich, heilich, heilich
es de aulmajchtja Gott un Har,
dee doa wia, dee doa es, un dee doa kjemt. #2Mo 3,14; Jes 6,2-3
9Un wan de Tieren däm lowden, ieeden un dankten, dee opp däm Troon saut, dee von Eewichkjeit to Eewichkjeit läft, 10follen de 24 Eltestasch ver däm dol, dee opp däm Troon sett, un bäden dän aun, dee doa von Eewichkjeit to Eewichkjeit läft, un schmeeten äare Kroonen ver dän Troon han un säden:
11Du best daut wieet, oo Har, Harlichkjeit un Iea un Krauft to nämen,
wiels du aules jemoakt hast.
Derch dienen Wellen es aules doa un jemoakt worden.
Currently Selected:
Openboarunk 4: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.