Nehemia 3
3
De List von de Buoabeida
1Eljaschib, de Huagapriesta, muak sikj met siene Breeda, de aundre Priesta, toop opp, un bud daut Schopspuat. See weiden daut en un muaken de Däaren aun. See buden oba uk wieda aun de Mia bat däm Hundat Torm un bat aun dän Torm Hananel. #Neh 12,10; Jer 31,38 2Biesied an buden de Mana von Jericho. Un von doa wieda bud Sakur, Imri sien Sän. 3Oba daut Feschpuat buden Senaa siene Säns. See läden de Baulkjes doaräwa un muaken de Däaren met äare Veräajlungen doa naun. 4Un von doa wieda bud Meremot, dee Uria sien Sän, un Hakoz sien Grootsän wia. Un biesied am bud Meschullam, dee Berechja sien Sän, un Meschesabel sien Grootsän wia. Un biesied am bud Zadok, Baana sien Sän. 5Un doa wieda buden de Enwona von Tekoa. Oba äare väanäme Mana wäaden sikj dän Deenst to doonen, waut an oppjedroacht wort. 6Daut oole Puat daut buden Jojada, Paseach sien Sän; un Meschullam, Besodja sien Sän. See läden de Baulkjes doaräwa un muaken de Däaren met äare Veräajlungen doa naun. 7Un von doa wieda buden Melatja von Gibeon un Jadon von Meronot, un de Mana von Gibeon un Mizpa, waut unja de Rejierunk von de wastne Sied Eufrat jehieeden. 8Un doa wieda bud Usiel, Harhaja sien Sän, de Goltschmett. Un biesied am bud Hananja, eena waut Saulw moaken deed. See buden Jerusalem bat aun de breede Mia. 9Un doa wieda bud Refaja, Hur sien Sän, dee dän haulwen Deel von Jerusalem väastonen deed. 10Biesied am bud Jedaja, Harumaf sien Sän, jäajen sien Hus. Un doa wieda bud Hatusch, Haschabneja sien Sän. 11Oba Malkija, Harim sien Sän, un Haschub, Pahat Moab sien Sän, buden wieda een Enj bat däm Owentorm. 12Un von doa bud Schalum, Lohesch sien Sän, dee eene Halft von Jerusalem väastonen deed. Hee un siene Dajchta deeden daut toop buen. 13Daut Tolpuat buden Hanun un de Enwona von Sanoach; see buden daut un muaken de Däaren met äare Veräajlungen doa naun. Un buta daut buden see noch 500 Meeta von de Mia bat aun daut Mestpuat. 14Oba daut Mestpuat bud Malkija, Rechab sien Sän, dee een Deel von Bet Kerem väastonen deed. Hee bud daut un muak de Däaren met äare Veräajlungen doa naun. 15Oba daut Kjwalpuat bud Schalun, Kolhose sien Sän, dee de Jäajent von Mizpa väastonen deed. Hee bud daut un dakjt daut un muak de Däaren met äare Veräajlungen doa naun. Un dan bud hee noch de Mia bie däm Puddel fa de Wotaleidinj bie däm Kjennichs Goaden bat aun de Stoopen, waut von de Davidstaut raufkomen. #2Kjen 20,20; Neh 2,14; Joh 9,7 16Hinja am bud Nehemja, Asbuk sien Sän, dee eene Halft von Bet Zur väastonen deed. Hee bud jäajen de Jräwa von David un siene Nofolja, bat aun dän jemoakten Puddel un daut Hus von de Helden. 17Hinja am buden de Leviten: Rehum, Bani sien Sän. Un biesied am bud Haschabja, de väaschta äwa daut haulwe Keila, fa sienen Deel. 18Un hinja am buden äare Breeda, unja de Aunleidunk von Binnui, Henadad sien Sän, de väaschta äwa de aundre Halft von Keila. 19Biesied am bud Eser, Jeschua sien Sän, de väaschta von Mizpa. Hee bud een Enj bie däm Winkjel wua daut boajopp jeit no de Stowen fa de Jewäaren. 20Hinja am bud Baruch, Sabai sien Sän, een Enj von de Mia von däm Winkjel bat aun de Däa, von däm Huagenpriesta Eljaschib sien Hus. #Neh 3,1 21Un hinja am bud Meremot, Uria sien Sän, un Hakoz sien Grootsän. Hee bud de Mia von Eljaschib siene Husdäa bat daut Enj von daut Hus. #Esra 8,33 22Hinja am buden de Priesta, de Mana ut de Jäajent vom Jordan. 23Hinja an buden Benjamin un Haschub, jäajen äare Hiesa. Hinja an bud Asarja, Maaseja sien Sän, un Ananja sien Grootsän, biesied sien Hus. 24Hinja am bud Binnui, Henadad sien Sän, noch eene Strakj von Asarja sien Hus bat däm Winkjel un bat aun de Akj. 25Palal, Usai sien Sän, bud jäajen däm Winkjel un däm huagen Torm, waut bie däm Wajchta Hoff bie daut Kjennichshus väastuak. Hinja am bud Pedaja, Parosch sien Sän. #Jer 32,2 26De Tempeldeena wonden aum Ofel bat aun daut Wotapuat em Oosten un däm Torm waut doa to seenen es. 27Doa hinja buden de Mana von Tekoa eene wiedre Strakj jäajen däm huagen Torm, un bat aun de Mia vom Ofel. 28Oba von daut Pieetspuat wieda buden de Priesta, jieda eena jäajen sien Hus. #2Kjen 11,16 29Hinja an bud Zadok, Immer sien Sän, jäajen sien Hus. Hinja am bud Schemaja, Schechanja sien Sän, de Puatenwajchta fa daut Oostpuat. 30Hinja am buden Hananja, Schelemja sien Sän, un Hanun, Zalaf sien sasta Sän, eene wiedre Strakj. Hinja an bud Meschullam, Berechja sien Sän, jäajen siene Woninj. 31Hinja am bud Malkija, dee to de Goltschmets jehieed, bat aun daut Hus von de Tempeldeena un de Hendla jäajen daut Wajchta Puat un bat aun de Bowastow oppe Akj von de Mia. 32Un tweschen de Bowastow oppe Akj un daut Schopspuat buden de Goltschmets un de Hendla.
De Jäajna äa Plon woat vedorwen
33Aus Sanbalat daut hieed, daut wie de Mia buden, wort hee doll un wia sea veoajat un spott äwa de Juden #Neh 2,10.19 34un säd ver siene Breeda un de Kjrichsmana von Samaria: Waut moaken dise onmajchtje Juden? Woat daut tochjeloten woaren? Woaren see daut met Opfa enweien? Woaren see daut en dise Doag noch foadich kjrieen? Woaren see ut däm Prellklompen de Steena läwendich moaken, waut doch vebrent sent? 35Oba Tobija, de Amonita, stunt biesied am un säd: Lot an bloos buen; wan een Foss opp äare Steenmia noppsprinjt, schmitt hee dee om. Soo spotten see äwa ons.
36Horch, ons Gott, woo veacht wie sent! Lot äaren Spott opp äaren Kopp komen, un lot daut too, daut see bestolen un aus Jefangne veschlapt woaren! 37Dakj äare schlajchte Doten nich too, un lasch äare Sinden ver die nich ut. Wiels see haben de Buoabeida jelastat! 38Wie oba buden de Mia un muaken dee bat oppe haulwe Hecht too, wiels daut Volkj freschen Moot toom oabeiden kjrieech.
Currently Selected:
Nehemia 3: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.