Esra 10
10
De Mischehen woaren jeschieden
1Aus Esra doa ver daut Gotteshus opp siene Kjneeen lach un met Tronen bäden un bekjanen deed, saumeld sikj eene groote Vesaumlunk von Mana, Frues un Kjinja, ut Israel rom am; un daut Volkj hield sea. 2Un Schechanja, Jehiel sien Sän von Elam siene Nokomen, säd to Esra: Wie sent ontru jeworden, aus wie ons framde Frues von de Velkja em Launt neemen. Oba doa es trotzdäm noch Hopninj fa Israel! 3Wie motten nu met onsen Gott eenen Bunt schluten un vespräakjen, daut wie aule framde Frues un de Kjinja, dee von an jebuaren sent, wajchschekjen, soo aus du, un dee, dee onsen Gott siene Jebooten ferchten, ons jerot haben. 4Doawäajen sto nu opp! Daut es aun die to haundlen, un wie stonen doahinja. Nemm dienen Moot toop un doo daut! 5Dan stunt Esra opp un leet de väaschte Priesta, de Leviten un gaunz Israel, schwieren, daut see no dise Wieed haundlen sullen. Un see schwuaren daut. 6Un dan jinkj Esra wajch von däm Plauz ver daut Gotteshus un jinkj en Johanan, Eljaschib sienen Sän, siene Stow nenn. Doa bleef hee äwa Nacht, un eet kjeen Broot un drunk kjeen Wota, wiels am daut leet deed om dee äa ontruet, waut ut de Jefangenschoft jekomen wieren.
7Un see leeten fa aulem en Juda un Jerusalem bekauntmoaken, daut dee waut ut de Jefangenschoft jekomen wieren sikj en Jerusalem vesaumlen sullen. 8Un wäa von dee, dee ut de Jefangenschoft jekomen sent, nich en dree Doag kjemt, woat no däm Beschluss von de väaschte Mana un de Leida, ut de Vesaumlunk utjeschloten woaren, un sien Kaptol saul unja dän Baun jestalt. 9Dan vesaumelden sikj aule Mana von Juda un Benjamin aum dredden Dach en Jerusalem. Daut wia aum 20. Dach en de 9. Moonat. Un daut Volkj saut aula opp däm Plauz ver daut Gotteshus, un zettad wäajen de Sach, uk wäajen dän streemenden Räajen. 10Dan stunt de Priesta Esra opp un säd to an: Jie sent däm Harn ontru jeworden, aus jie junt met framde Frues befrieden un haben Israel äare Veschuldjunk vejratat. 11Nu doot däm Harn, june Vodasch äaren Gott, dee bekjanen, un haundelt no sienen Wellen un trant junt von de Enwona em Launt un von de framde Frues! 12Dan auntwuad de gaunze Vesaumlunk un roopt lud: Daut saul soo passieren, aus du jesajcht hast! 13Oba hia es väl Volkj, un daut räajent; hia jeit nich buten to stonen. Un daut es uk nich en eent ooda twee Doag jedonen, wiels en dise Sach haben väle jesindicht. 14Onse väaschte Mana sellen hia bliewen un de gaunze Vesaumlunk väastonen. Dan sellen aul dee, dee sikj en onse Städa framde Frues jefriet haben, to eene bestemde Tiet met Leida un Rechta toop von äare Staut häa komen, bat ons Gott sienen Oaja wäajen dise Sach von ons wajchdreit. 15Bloos, Jonatan, Asael sien Sän, un Jachseja, Tikwa sien Sän, stalden sikj jäajenaun, un Meschullam un de Levit Schabetai unjastetten an. 16Oba dee waut ut de Jefangenschoft jekomen wieren, haundelden soo, aus see vesproaken hauden. Un de Priesta Esra wäld sikj Mana, waut Leida en äare Volkjsgruppen wieren, aula met Nomen jenant, un see kjeemen aum 1. Dach en de 10. Moonat toop, om dise Sach to unjasieekjen. 17Un see brochten daut bie aule Mana, waut framde Frues hauden, bat däm 1. Dach en de 1. Moonat toom Aufschluss.
De Mana äare Lest waut framde Frues haben
18Un mank de Priesta worden dise jefungen, waut sikj framde Frues jefriet hauden: Bie Jeschua siene Säns, dee een Sän von Jozadak wia, un siene Breeda: Maaseja, Elieser, Jarib un Gedalja. #Esra 3,2 19Un see jeewen äare Haunt doaropp, daut see äare Frues wajchschekjen un eenen Schopsbock aus Schultopfa jäwen wullen. 20Bie Immer siene Nokomen wieren: Hanani un Sebadja. 21Bie Harim siene Nokomen wieren: Maaseja, Elia, Schemaja, Jehiel un Usija. 22Bie Paschhur siene Nokomen wieren: Eljoenai, Maaseja, Jischmael, Netanel, Josabad un Elasa. 23Mank de Leviten wieren: Josabad, Schimi, Kelaja, dee uk Kelita jenant woat, Petachja, Juda un Elieser. #Neh 8,7; 10,11 24Mank de Sinja wia: Eljaschib; un mank de Puatenwajchta: Schalum, Telem un Uri. 25Un mank de äwaje Israeliten wieren bie Parosch siene Nokomen: Ramja, Jisija, Malkija, Mijamin, Eleasar, Haschabja un Benaja. 26Un bie Elam siene Nokomen: Matanja, Secharja, Jehiel, Abdi, Jeremot un Elia. 27Bie Satu siene Nokomen: Eljoenai, Eljaschib, Matanja, Jeremot, Sabad un Asisa. 28Bie Bebai siene Nokomen: Johanan, Hananja, Sabai un Atlai. 29Bie Bani siene Nokomen: Meschullam, Maluch, Adaja, Jaschub, Scheal un Jeremot. 30Bie Pahat Moab siene Nokomen: Adna, Kelal, Benaja, Maaseja, Matanja, Bezalel, Binnui un Manasse. 31Bie Harim siene Nokomen: Elieser, Jischija, Malkija, Schemaja, Simeon, 32Benjamin, Maluch un Schemarja. 33Bie Haschum siene Nokomen: Matenai, Matata, Sabad, Elifelet, Jeremai, Manasse un Schimi. 34Bie Bigwai siene Nokomen: Maadai, Amram, Uel, 35Benaja, Bedja, Keluhi, 36Wanja, Meremot, Eljaschib, 37Matanja, Matenai un Jaasai. 38Bie Binnui siene Nokomen: Schimi, 39Schelemja, Natan, Adaja, 40Machnadbai, Schaschai, Scharai. 41Asarel, Schelemja, Schemarja, 42Schalum, Amarja un Josef. 43Bie Nebo siene Nokomen: Jeiel, Matitja, Sabad, Sebina, Jadai, Joel un Benaja. 44Dise hauden sikj aula framde Frues jefriet. Un eenje von de Frues hauden Kjinja to Welt jebrocht.
Currently Selected:
Esra 10: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.