Hesekiel 47
47
De Stroom von em Tempel
1Un de Maun brocht mie wada no de Däa vom Tempel em Bennahoff. Un doa sach ekj waut Wota von unjare Tempelschwal ranen. Daut rand nom Oosten. De väakaunt vom Tempel es je aun de oostne Sied. Un daut Wota rand aun de siedne Kaunt vom Tempel, un aun de siedne Kaunt von däm Aultoa vebie. #(1-12) 1Mo 2,10-14; Joel 4,18; Opb 22,1 2Un dan brocht hee mie derch daut Puat aun de nuadne Sied ut däm Tempelhoff rut, un rom no daut oostne Puat. Un doa rand daut Wota, von unja de siedne Waunt. 3Un de Maun leid mie nom Oosten. Hee haud eenen Motbaunt bie sikj, un hee maut 1.000 Ellen auf. Doa leid hee mie derch daut Wota derch, un mie kjeem daut bat aun de Kjnechel. #Hes 40,3 4Dan maut hee noch een mol 1.000 Ellen un leid mie wada derch daut Wota. Hia kjeem mie daut Wota bat aun de Kjnee. Un hee maut noch een mol 1.000 Ellen wieda, un leid mie derch daut Wota. Un hia kjeem mie daut Wota bat aun de Lint. 5Dan maut hee noch een mol 1.000 Ellen, un doa wia daut een Riefa, soo deep daut ekj doa nich derchgonen kunn. Daut Wota wia doa soo huach, daut eena schwamen must, eena kunn doa nich derchgonen. 6Un hee säd to mie: Menschensän, hast du dit beoobacht? Un hee leid mie een Enjskje trigj velenjd däm Riefa. 7Un aus ekj soo trigj jinkj, foll mie daut opp, daut doa väl Beem aun beid Sieden von däm Riefa wieren. 8Un hee säd to mie: Dit Wota rant nom Oosten han em Jordan Tol nenn, un dan en daut Solt Mäa nenn. Un wan dit Wota en daut Mäa, wua nuscht läwen kaun, nenn rant, dan woat daut Wota em Mäa jesundet Wota woaren. 9Aulawäajen wua de Riefa hanrant, schwoarmt dee met aules waut em Wota läft. Doa woaren väl Fesch sennen wan dit Wota doahan kjemt, un aules woat jesunt sennen un läwen wua dis Riefa hankjemt. #2Mo 15,23 10Un doa woaren Menschen aun daut Mäa stonen un feschen. Daut Enj von En Gedi bat En Eglajim woaren see Nats hanspreeden toom drieejen, wiels doa woaren väl Fesch von aule Sorten sennen, soo aus en daut Meddelmäa. 11Oba de sompje Städen delenjd däm Mäa woaren nich goodet Wota haben. Daut woat soo bliewen daut see doa Solt holen kjennen. 12Un delenjd dän Riefa woaren aun jieda Sied veschiedne Fruchtbeem waussen. De Bläda aun de Beem woaren nich vewalkjen, un doa woat emma Frucht aun de Beem sennen. Doa woat aule Moonat niee Frucht aun de Beem sennen, wiels dee Wota kjrieen, waut von de heilje Städ kjemt. De Menschen woaren de Frucht äten, un woaren met de Bläda een Jesuntheitsmeddel moaken. #Jes 32,15; Opb 22,2
13Dit es waut Gott de Har sajcht: Dit sent de Jrensen von daut Launt, daut jie de twalw Stam von Israel toodeelen sellen. De Staum Josef saul twee Poat kjrieen. #1Mo 48,5; Jos 17,17 14Daut saul fa eenen jiedren äwareen toojedeelt woaren. Ekj hab emol miene Haunt oppjehowen un june Vodasch vesproaken, daut ekj an dit Launt jäwen wudd, un nu saul daut junt sennen. #1Mo 12,7
15Aun de nuadne Sied von jun Launt saul de Jrens von daut Meddelmäa no Hetlon gonen, un dan no Zedad, #(15-20) 4Mo 34,2-12 16derch dän Hamat Stich, un no Berota un Sibrajim, oppe Jrens tweschen Damaskus un Hamat, un no Hazar Enan, waut aun de Jrens met Hauran es. 17Daut es woo de Jrens saul vom Mäa bat Hazar Enan gonen, daut tweschen Damaskus un Hamat licht. Damaskus un Hamat sellen nuaden von de Jrens sennen. Dit es dan de nuadne Jrens.
18Un dan aun de oostne Sied saul de Jrens tweschen Hauran un Damaskus sennen, un tweschen Gilead un Israel delenjd däm Jordan rauf bat daut Solt Mäa un Tamar. Daut es dan de oostne Jrens.
19Aun de siedne Kaunt rant de Jrens von Tamar bat dän bewessaden Plauz bie Kadesch, un dan delenjd dän Ägiptischen Riefa no daut Meddelmäa. Daut es dan de siedne Jrens. #4Mo 20,13; 34,5
20Aun de wastne Sied saul daut Meddelmäa de Jrens sennen bat jäajen Hamat. Daut es dan de wastne Jrens.
21Jie sellen junt daut Launt mank june Stam von Israel vedeelen, 22met een Loss. Jie sellen daut fa junt un de framde, dee mank junt wonen un Kjinja jehaut haben, vedeelen. Jie sellen de framde soo mettalen aus dee waut to jun Volkj jebuaren sent. Dee sellen met de israelitische Stam toop oawen, #3Mo 19,33-34 23un een Poat von daut Launt kjrieen, een jiedra von däm Staum wua hee wont, sajcht Gott de Har.
Currently Selected:
Hesekiel 47: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.