Jer 52
52
Tkawin Sedekyiy
(2 R 24.18-20; 2 Cr 36.11-16)
1Tetoq junaq jun (21) ab'q'i Sedekyiy ttzyet tkawin, ex junlajoj (11) ab'q'i kawin Jerusalen. Amutal tb'iju' ttxu, tmyal Jeremiy ex aj Lib'na. 2Myab'a'n tb'inchb'aj twitz Qman Dyos, kse'nx tb'inchb'aj Joakyim. 3Qu'mtzun tzaj tq'oj Qman Dyos ti'j Jerusalen ex ti'j Juda, ex eb'je'x t-xla'ja'n twitz.
Kub'ti'j Jerusalen
(2 R 24.20—25.7; Jer 39.1-7)
Yajxi'tzuntl jawtiq'i'ntib' Sedekyiy ti'ju' nimaqkawil aj B'ab'ilon. 4Toj lajoj tajlal tlajoji'n xjaw te tb'eljoji'n ab'q'i nkawin Sedekyiy, ulju' nimaqkawil Nab'ukodonosor kyuk'i'l t-xjal te q'oj ti'j Jerusalen, ex b'aj kytxoli'nti'j. E'kub'ten tu'me'l ttziju' tnam, ex b'jaw kyb'incha'n kyxwe'lil tu'n kyq'ojin ti'jile. 5Kub' mqo'n ti'ju' nintnam tzmax toj junlajoj (11) ab'q'i nkawin Sedekyiy. 6Tzajxi'x we'yaj toju' nintnam toj b'eljoj tajlal tkyaji'n xjaw teju' ab'q'i lu, ex mixti'tltoq titi' tu'n t-xikywan xjal. 7Kyb'inchatzun jun kyb'e kyoju' nimaqtapi ti'ju' nintnam, b'a'nqa txoli'ntoqti'j kyu'n kaldey, ex oq nimaqkawil kyuk'i'l t-xjal te q'oj toj qonik'an. Xi' e'exa' ttziju' nintnam kyxol kab'e' nimaqtapi, toj kyb'eyil tawal nimaqkawb'il, exi'tzuntz toju' tb'eyil b'ya' ttzi nin a' Jordan. 8Aye'tzu'n xjal te q'oj kaldey exi' knolteti'j nimaqkawil Sedekyiy, ex kub'ti'j kyu'n kyoj plan tx'otx' te Jeriko. Kyej kolb'e'n kyu'n kykyaqilju' t-xjal te q'oj ex b'ajx kypa'n kyib'. 9Tzyetju' nimaqkawil kyu'n kaldey ex xikyiq'i'n twitz nimaqkawil aj B'ab'ilon atitoq Rib'la, toj kytx'otx' aj Amat. Atzuntzu' tmaya' Nab'ukodonosor tz'e'ysb'il twitz Sedekyiy, 10ex twitzku' tchaq'a' tu'n kyel tx'e'mu' kywi' tk'wal ex kywi' kykyaqil nimaqxjal aj Juda. 11Tchaq'tzuntz tu'n kyb'je'tzq'i'n twitz Sedekyiy, ex tu'n tokq'o'n taq'e'l xpatx'k'uxb'il tu'n txiq'i'n B'ab'ilon, atzuntzu' okxa' jpu'n tzmax tkyim.
Tkub' xitu'n ja te k'u'lb'il
(2 R 25.8-21; 2 Cr 36.17-21; Jer 39.8-10)
12Toj lajoj tajlaj tjwe'yi'n xjaw te b'eljlajoj ab'q'i nkawin Nab'ukodonosor, nimaqkawil aj B'ab'ilon, ul Neb'usaradan toj Jerusalen, nim toklen ex chaq'ul kye xq'uqil ti'n nimaqkawil, 13ex oktq'o'n kyq'aq'al tja Dyos, tja nimaqkawb'il ex kykyaqilju' ja toju' nintnam, aye'xi'xpe' kyja kykyaqil nimaqxjal toj kawb'il toju', 14aye'tzu'n xjal te q'oj kaldey lepchqe'ktoq ti'j b'ajkub' kyxitu'n nimaqtapi ti'jile Jerusalen. 15Eb'je'xtzun tiq'i'n Neb'usaradan ju' xjal ate'xtoq toju' nintnam exqe' ojetoq kyaq'kyib' tuk'i'l nimaqkawil aj B'ab'ilon, exu' jte'tl b'inchal chukchaq aq'untl, eb'ajx tiq'i'n B'ab'ilon. 16Naq jte'tl kyxolju' prowqe'xi'x e'kyaj tq'o'n tu'n kyaq'unanteju' tx'otx' ex tqan ub'a.
17B'aj kytxiju' kaldey txqan ti'xti' q'ank'uxb'ilqe' ate'toq toju' tja Dyos: e'tqan, nin tkb'el a' exqe' tq'uqlil, ex b'ajx kyiq'i'n tkyaqil q'ank'uxb'il B'ab'ilon. 18Ex b'ajx kyiq'i'n jotb'il tza'j, e'jotb'il, eb'inchb'il kytxa'n kantil, e'nimaqlaq, e'pak' ex tkyaqil nche ajb'en toj k'u'lb'il q'ank'uxb'ilqe'. 19Ex eb'ajx tiq'i'n chaq'ul kye xq'uqil tkyaqil ti'xti' q'anpwaq ex saqpuaq: e'tkb'el a', e'ti'j q'ob'aj, e'nimaqlaq, e'jotb'il tza'j, e'kyb'el kantil, e'pak' ex b'as tkb'el oyaj b'in. 20Aye'tzu'n kab'e' tqan, aju' nin tkb'el a' kyuk'i'lju' kab'lajoj (12) tman wakx q'ank'uxb'ilqe' qonte exqe' tq'uqlil tchaq' nimaqkawil Salomon tu'n kyb'inchet teju' tja Dyos, mixb'enta' t-ximet talal. 21Te wajxaq metr tk'ich'intl twe' junjun tqan, atzun jwe' metr tk'i' nik'jan ttole; jultoq kyoj, ex wuq sentimetro tpimalju' q'ank'uxb'il ti'j. 22Teyile junjun tqan atitoq jun tilb'ilal q'ank'uxb'il tojx twi'xi', te kab'e' metr tk'ich'i'ntl twe', atitoq jun kutxb'il ti'jile q'ank'uxb'ilile, wiqo'n kranadiy ti'j. Junileqe'toqju' kab'e' tqan. 23Jo'naq kranadiy toktoq ti'jile junjun tilb'ila, kyajnaq qaqlajojtzu'n q'ancha'ltoq.
Aye' aj Juda eb'je'xq'i'n
24Ex e'ttzuy chaq'ul kye xq'uqil, Serayiy kynejel pale, ex Soponiy lepchix toklen ti'j kyxol pale, exqe' oxe' xq'uqil ttzi tja Dyos. 25E'ttzuyju' nejenel ntoq chaq'un kye xjal te q'oj, e'wuq ichan ajb'el teku' nimaqkawil ate'toq toju' nintnam, exju' nim toklen ntoq xnaq'tzankye xjal te q'ojil, ex oxnaq (60) xjal ate'toq toju' nintnam. 26-27Eb'ajx tiq'i'n Neb'usaradan kykyaqil twitz nimaqkawil aj B'ab'ilon, atitoq Rib'la, toj kytx'otx' aj Amat. Ex ttchaq' nimaqkawil aj B'ab'ilon atzu' tu'n kykub'yet.
Ikytzu'n eb'je'xq'i'n aj Juda toju' kytx'otx'. 28A kyajlal xjal ja'lu eb'je'x tiq'i'n Nab'ukodonosor toju' kytx'otx': eb'je'x tiq'i'n wuqk'al junlajnaq oxe' (3,023) xjal aj Juda toj twuqi'n ab'q'i ntoq kawin; 29atzun kab'k'al junaq kab'lajoj (832) aj Jerusalen b'je'x tiq'i'n toj twajxaqi'n ab'q'i nkawin; 30atzun junk'al wuqlajnaq jwe' (745) aj Juda extiq'i'n Neb'usaradan toj junaq oxe' (23) ab'q'i nkawin, japuntzun kyajlaltz toj junlajk'al lajnaq (4,600) xjal eb'je'xq'i'n.
Tzaqpet Joakyin ex tk'am toklen toj B'ab'ilon
(2 R 25.27-30)
31Tojtzun junaq jwe' (25) tajlal tkab'lajoji'n xjaw te junaq wuqlajoj (37) ab'q'i texlen q'i'n nimaqkawil Joakyin toj Juda, tzyet tkawin nimaqkawil Eb'il-merodak toj B'ab'ilon, majx b'a'n xjal oka' te Joakyin ex etztiq'i'n toj kars, 32b'a'n tb'inchate ex xitq'o'n toklen kyb'aju' txqantl nimaqkawil ate'toq tuk'i'l B'ab'ilon. 33Ikytzu'n b'enta' tel tiq'i'n Joakyin t-xb'alun ntoq ajb'en tu'n toj kars, ex wan tk'etzju' nimaqkawil toju' jni'tl tchwinqlal. 34Expe' tk'am Joakyin jun pwaq toj tkyaqilju' jni'tl tchwinqlal, tzmax tkyim, teju' nimaqkawil toj B'ab'ilon.
Currently Selected:
Jer 52: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999