2 Ti 4
4
1Kxe'l woqxenine' teya twitz Dyos ex twitz Jesukrist, ju' nimaqkawil tzul toj tajwalil tu'n kyok kykyaqil xjal toj xjel tu'n, e' itz'qe'x exqe' kyimniqe'tl 2tu'n txi' tpakb'a'na tpakb'al b'a'n, q'manxa kye xjal qa ati anb'il ex maskye mixti' anb'il teya. Kub'sama ti'j kynab'l, tzak'unqe'xa ex kuwsanqe'xa, lalun siktiya tu'n t-xnaq'tzana kye. 3Qu'n kpomel tq'ijlalil mya kyajb'il xjal tu'n kyb'inteju' b'a'n xnaq'tzb'il; a kyajb'ilu' tu'n kyb'inte junxi'tl xnaq'tzb'il, che kyjya' txqantl kyxnaq'tzal tu'n kyq'on xnaq'tzb'il kye axju' kyajb'il tu'n kyb'inte. 4Kb'el kyẍkyinsa'n kyib' teju' ax, aju' la'j kxe'l kyb'i'n. 5Atzunta tenx tnab'la toj tkyaqil, tzik'xku' yajb'il tu'na, q'onk tilila tu'n tpakb'etju' tpakb'al b'a'n, japunxju' taq'una tu'na.
6Naqch'inxtl nkub'yo'nwe' kse'n chojb'il, ch'inxtl tpon kmuj tu'n wik'e' twitz tx'otx'. 7Matxi' kub'ti'ju' q'oj wu'ne' tu'n tb'inchet tajb'il Dyos, matxi' japunju wojqeli'ne', machin tene' kukxju' toju' okslab'l. 8Tu'ntzunju' machin nimane' te, ati jun oyaj ktzajel tq'o'n Qajaw, Ajkawil tnik'alxi'xti'j, weye' toju' tq'ijlalil tzul. Ex myanaq o'kx weye' ktzajela' tq'o'n, ex ktzajel tq'o'n kye kykyaqilju' nxi'x che ayon te tu'n tkyaqil kyk'u'j ajtul.
Chik'b'ab'l tu'n tb'inchante Timotey
9Lwix kuttzaja ka'yilweye'; 10machin kyej tleb'a'ne' Demas, xi' soka' t-xon tk'u'j ti'ju' te twitz tx'otx' ex matxi' Tesalonik. Atzunte Kresent matxi' toj tx'otx' Kalasya, atzun Tito matxi' Dalmasya. 11O'kx Lukas ati wuk'i'le'. Jyoma Kuẍ ex k'lentza tuk'i'la, qu'n ati tajb'en tu'n tonin wuk'i'le'. 12Matxi nchq'o'ne' Tikyiko toj tnam Epeso. 13Ajttzaja, a tzik'a q'ilte npinpa'te' kyej nq'o'ne' tja Karpo toj tnam Troade; exqe' u'j, aye'xi'xpe' wuje' tz'u'n u'j.
14Nim taq'wix matxi' tb'incha Ljantr tx'nol k'uxb'il weye'; ate Qajaw kq'olte tu'me'l t-xel te tu'nju' tb'inchb'aj. 15Ex ka'yinxtib'a te, qu'n ajq'ojxi'x ti'ju' qpakb'ab'l.
16Mix-a'lo'xte jun oninweye' tej txinma'ne' kolb'ilweye' tnejel maj kywitz tzyul kawb'il aj Rom; kykyaqil nkyaj kyleb'ane'. Naqwit lay tz'e'ysa'njtz kywitz tu'n Dyos tu'n tpaju' lu. 17Atzunte Qajaw Jesukrist onin wi'je' ex tzaj tq'o'n wipumale' tu'n tb'ent txi' npakb'a'ne' tpakb'al b'a'n te kolb'ilkye xjal min nche niman te Dyos. Ikytzu'n ntkole' Qajaw toj ttzi b'alun, 18ex chin tkla'ye' te tkyaqil myab'a'n, chin tkla'ye' ex chin xel tiq'i'ne' toju' tkawb'il toj kya'j. ¡Ajwalinjtzwit tejumajx! Ikxwitju'.
Q'olb'eb'l te b'ajsb'il
19Q'onxa q'olb'eb'l kye Priska ex Akyila, ex kye toj tja Onesiporo. 20Xi'xkyaja' Erast toj Korint, atzun Tropimo yab', makyej nq'o'ne' toj tnam Milet. 21Qonk tilila tu'n tula namxku' tetz jb'alil. Nxi' q'olb'e'na kyu'n Ewb'ulo, Pudent, Lino, Klawdyo ex kykyaqilju' okslal.
22Awt Qajaw Jesukrist ten tuk'i'la ex tzajxwit tq'o'n Dyos t-xtalb'il kyib'aje' kykyaqile'.
Currently Selected:
2 Ti 4: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999