2 S 4
4
Kub' b'yo'n Is-b'oset
1Tetzunj tb'inte Is-b'oset, tk'wal Sawul qa matxi'toq kyim Ab'ner toj Eb'ron, majx kub'numj, ex kykyaqil aj Israel oktchi kyi'j. 2Ate'toqtzun kab'e' ichan kyitz'inkyib' intoq che ajb'en te Is-b'oset nejenelqe'toq kye jun tnej eleq'. B'aana tb'i jun, atzu'n juntl Rekab'. Tk'wal Rimonqe' aj B'eerot, tyajajil B'enjamin, qu'n aju' tnam B'eerot intoq okq'o'n te tyajajil B'enjamin, 3expe' ikxtej kyxi' oqju' aj B'eerot toj Witaym, ja najlqe' kse'n jun ajb'etun.
4Atzunte Jonatan, tk'wal Sawul, atitoq jun tk'wal Mepi-b'oset tb'i. Tetoqtzun jwe' ab'q'i Mepi-b'oset tej tpon tqanil qa matxi'toq b'aj Sawul ex Jonatan toj Jesreel; atzunju' qya ka'yilte ik'tiq'i'n ex xi' oq tuk'i'l, tu'ntzunju' ojqeltoq tel, eltz'aqju' k'wal tu'n ex majx kyej tzkajix tqan.
5Atzunte Rekab' ex B'aana, tk'wal Rimon aj B'eerot, exi' tja Is-b'oset, ex e'pon tojku'xi'xju' kmuj kuw tq'ob' q'ij, intoq ojlan Is-b'oset, ex majx tzaj twatl. 6Atzunju' qya xq'uqil ttzija intoq xq'iq'in triy, o'kx tik' wtan, qu'mtzun mix-a'lo' lonkye Rekab' ex B'aana ju' titz'in tej kyokx. 7Tej kyokx toju' ja, kuẍlitoq Is-b'oset tib'aj tkuẍb'il; axtzuntzu' kub'a' kyb'yo'na' ex el kyk'uẍpi'n twi', xikyiq'i'ntzuntz ex eb'et b'aj qonik'an toj tb'eyil Arab'a 8tu'n tpon kyiq'i'n te Dab'i toj Eb'ron. Xikyma'ntzuntz teju' nimaqkawil:
—Luju' twi' Is-b'oset tk'wal Sawul lu, nimaqkawil, aju' tajq'oja ex tajb'il tu'n tb'aja tu'n. Makub' q'o'n toj tq'ob'a ja'lo tu'n Qman Dyos tu'n tok tu'me'l t-xel tu'na te Sawul ex kyeju' tyajajil, chechij.
9Atzunte Dab'i xittzaq'we'n kye:
—Lu Qman Dyos in ka'yin, aju' matxi' chin tkolxi'ye' toj yajb'il, 10tetzunj tul jun xjal q'malte weye' qa matxi'toq kyim Sawul, toj tnab'l qa b'a'nju' tqanil tzaj tma'n, wichaqa tu'nxju' tqanil lu kub' njpu'ne' ex kub' nb'yo'ne' toj Siklaj. 11¡Ikxtzunkye' kb'ajel kyi'j ja'lo, b'inchal myab'a'n, tu'nju' makub' kyb'yo'ne' jun xjal mixti' til, tej intoq ojlan, extzun tojku' tja! Qu'mtzun, ¡kkychja'ye' tkamik! ¡Che b'el nnajsa'ne' twitzju' tx'otx' lu!, chij kye. 12Tchaq'tzun Dab'itz kyeju' nejenel kye t-xjal, tu'n kykub' kyb'yo'n; b'je'l kytx'e'mu'n kq'ob' ex kyqan, ex eb'jaw kyyob'i'n tk'etzu' tkb'el a' toj Eb'ron. Yajxi'tzuntl xikyiq'i'n twi' Is-b'oset ex ku'x kymqu'n toj Eb'ron, toj tmuqb'il Ab'ner.
Currently Selected:
2 S 4: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999