1 Ti 6
6
1Aye'tzunju' okslal majenqe' ati tu'n kyokslan kyeju' tajaw aq'untl, tu'ntzun lalun che yolin xjal myab'a'n ti'j Dyos ex ti'ju' xnaq'tzb'il. 2Qatzun aye'ju' tajaw aq'untl okslalqe', lalun kximaju' majen qa mixti' tu'n kyokslan naq tu'nju' kyitz'inkyib' toj okslab'l. Ape' kb'inchaju', ati tu'n kyajb'en b'a'nxi'x, qu'n okslalqekye' janche ajb'ena' ex nkyk'u'jla'nkyib' kyuk'i'l.
Aju' okslab'l exju' tzalajb'il ti'ju' ati qe
Atzun xnaq'tzanxjuya lu kye ex q'onxa knab'l: 3Qa ati jun xjal nq'o'n junxi'tl xnaq'tzb'il ex myaju' se'nju' xnaq'tzb'il tu'n Qajaw Jesukrist, exqa mya junx tnab'l tuk'ilju' qokslab'l, 4jun xjalte' naq njaw tnima'ntib' extzun mixti'xte b'a'n tu'n. Ate xjal lu ati tyab' twi'; qu'n a tajb'ilju' tu'n tq'ojin ex tu'n twulin kyi'ju' yol, ex tu'n tpajtzun ja'lu ntzaja' tx'a'lti'j kk'u'j xjal, inche yasun, ex nche' ximan myab'a'n kyi'j txqantl 5ex nche' wulin kukxju' qu'n tzpetjni knab'l ex minti' ojtzqi'nju' axx kyu'n, ex in kxima'n qa aju' okslab'l najb'en kye tu'n kq'inumax. 6B'ayte' iknatzunju' ate' okslab'l ti'j Dyos jun q'inumalte', qa nqo' tzalaj ti'ju' ati qe. 7Qu'n mixti'xte sul qi'n twitzju' tx'otx' lu ex mixti'xte' k'anjel qi'n; 8naqa ati qwa ex qi'j, yaqintzunte', qu'mtzun ati tu'n qten toj tzalajb'il. 9Aye'tzunkye' kyajb'il tu'n kjaw q'inumax lwiy nche kub' tz'aq toj t-xpatxab' tajaw il, ex majx nche'x b'inchal txqan ti'xti' mixti'x tajb'en ex nche' k'ixb'i xjal tu'n, ex majx nche' mulq'aj xjal tu'n tejumajx toj xitb'il ex naje'n. 10Qu'n tkyaqilju' taq'wixil atzu' ntzaja' ti'ju' tq'aq'al pwaq; ex ate' junjun matxi' che eltxalpuj ti'ju' kyokslab'l tu'n tpaj inxi'x nkyk'u'jla'nju' pwaq, ex tu'nxju' knab'l nche' yajtiya' toj nim k'ixk'oj.
Aju' tu'n toktilil qu'n toj qokslab'l
11Atzunta aya najb'ena te Dyos kutoqa te tkyaqil ja'lu. Q'onk tilila tu'n toka tnik'alxi'xti'j, ex nimana te Dyos, tenx tokslab'la, tenx tk'ujlalila, tenx tpasensiya ex tz'okxa me's. 12Tz'okx tilil tu'na toj tokslab'la se'n jun xjal te q'oj, tu'ntzun tkub'ti'j myab'a'n tu'na; ex lalun ttzaqpiya chwinqlal tejumajx, qu'n a xtxokla'ya tu'n Dyos ex oje tchik'b'aya tokslab'la kywitz b'a'npun tziyal. 13Atzun ja'lo twitzku' Dyos aju' nq'onte kychwinqlal kkyaqil ti'xti', ex twitzku' Jesukrist aj taq' jun tziyb'il b'a'nxi'x twitz Pons pilat kxe'l wab'tzina' teya tu'n 14txi' toksla'na matxi' b'ajx nma'ne' teya, tu'ntzun mix-a'lo' jun xjal kpoqolteya toj il, b'inchama tkyaqil ja'lu akxku' nul Qajaw Jesukrist. 15Ajtzun tjapunju' tq'ijlalil, ktzajel yek'un Jesukrist tu'n Dyos, qu'n ate in kawin kyib'aj tkyaqil, ate Dyos Nimaqkawil kyib'aj kykyaqil nimaqkawil ex ate nimxi'x toklen kyib'aj kykyaqilju' nimaq kyoklen. 16Qu'n o'kxte Dyos milo kkyimela', ex atzu' najla' toju' spik'un aj lay b'ent qpon lq'e tk'etz. Mix-a'lox jun ichan oje tz'ilwente ex mix-a'lox jun k'okyel ka'yinte. ¡O'kxwittzun Dyos nimanjtz ex tu'n tten tipumal tejumajx! Ikxwitju'.
17Q'manxa kyeju' q'inun toju' tq'ijlalil ja'lo tu'n lalun jaw knima'nkyib' ex tu'n lalun tz'okqe kk'u'j ti'ju' kq'inumal, qu'n ate q'inumal mya q'uqlite tk'u'jlalil. Ate' b'a'nju' tu'n kb'inchante aju' tu'n tokqe kk'u'j ti'j Dyos, ntzaj q'onte tkyaqil ti'xti' qe ex ntzaj tq'o'n nimxi'x tu'n qtzalaj ti'j. 18Q'manxa kye tu'n kb'inchanteju' b'a'n, tu'n kq'inumax toju' b'a'n aq'untl ex tu'n kyaq'punteju' ati kye ex tu'n kq'onte se'nxju' tb'is kk'u'j. 19Iktzu'n ktenb'ila' kq'inumal mi b'ajel toju' juntl chwinqlal tuk'i'l Dyos ex q'uqlitzun kk'u'jtzu' ti'ju' chwinqlal te jumajx.
Aju' xitab'tzi'n Pawl te Timotey tu'n tb'inchante
20Aya Timotey, ka'yinxa taq'una matxi' tzaj q'o'n teya tu'n Dyos. Lalun txi' tb'ina kyol xjal mixti' tchiylal Dyos kye, qu'n aju' kyol mixti'x tajb'en, ex pa'mil tib'a kyi'ju' inkyma'n qa nim kyojtzqib'l extzun mixti' b'a'n kyu'n; 21qu'n ate' junjun matxi' txi' kb'i'n, ex matxi' che eltxalpuj ti'ju' kyokslab'l.
Awttzun Dyos k'iwlankyeye'. Ikxwitju'.
Currently Selected:
1 Ti 6: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999