1 S 26
26
Exch'yon tchwinqlal Sawul te Dab'i
1Exi' junjun xjal aj Sip q'malte tqanil Dab'i te Sawul toj Kib'ea, xikyma'n te: Atzu' nnewana' te Dab'i twi' witz Akyila tu'me'lju' chq'ajlaj, chechij.
2Xi'tzun Sawultz kyuk'i'l wuqk'al lajnaq (3,000) xjal te q'oj kuwqe'xi'x kyxol aj Israel toju' chq'ajlaj Sip jyolte Dab'i. 3Kub'ten twi' b'o's witz Akyila, ttx'u'ku' b'e nnik' ttzi chq'ajlaj. Tetzunj atitoq Dab'i toj chq'ajlaj, tb'i qa intoq jyon Sawul ti'j tzmaxtzu', 4e'tzajtzun tchq'o'n nenul toj ewaj ex tb'inte qa ax matxitoq pon Sawul. 5Yajxi'tzuntel xi' japona' Sawul ex b'aj tka'yi'n b'a'nxi'x ja nche wtana' Sawul tuk'i'l Ab'ner, tk'wal Ner, ju' nejenel kye xjal te q'oj. Ex til atoqtzu' nwtana' Sawul tojxi'ju' xmuj, txoli'nkyib'u' t-xjal ti'jile. 6Yolintzun Dab'itz tuk'i'l Aymelek, ju' itit ex tuk'i'l Ab'isay, tk'wal Saruya ex titz'in mo ttzik Joab', xitqani'n kye:
—¿Alkye ktq'a'tib' tu'n tku'x wuk'i'le' toju' xmuj tzmax jata' Sawul kyuk'i'lju' t-xjal?, chij.
—Chin b'elexwe' tuk'i'la, chi Ab'isay xittzaq'we'n:
7Textzu'n qonik'an lu, exi' Dab'i tuk'i'l Ab'isay toju' t-xmuj Sawul. Intoq wtan Sawul toju' xmuj, txpo'nku'xju' tch'ut toj tx'otx' tk'etz twi'. Kuẍliqe'toq Ab'ner kyuk'i'lju' xjal te q'oj ti'jile Sawul. 8Xi'tzun tma'n Ab'isay te Dab'i:
—Matxi' kub' tq'o'n Qman Dyos tajq'oja toj tq'ob'a. Q'ontza anb'il weye' tu'n tkub' nb'yo'ne' ja'lo, kb'el nxyu'ne' twitz tx'otx' tu'nxu' tch'ut. Naq tu'n junxte' ajtaq'pon, chij.
9Atzunte Dab'i xitma'n te:
—Lalun kub' tb'yo'na, qu'n alkyete matzaq'pon tq'ob' ti'ju' nimaqkawil sk'o'n tu'n Qman Dyos, tzul tz'e'ysb'il twitz. 10Lu Qman Dyos nka'yin, ate kb'el b'yonte Sawul, qa ajtpon kmuj tu'n tkyim mujqa ajtex q'ojil. 11Awt Qman Dyos myonweye' tu'n lalun kub' nxima'ne' tu'n tkub' nb'yo'ne' nimaqkawil sk'o'n tu'n. O'kxte' ch'ut q'intza exju' jun xar a' ati tk'etzu' tq'axwe, qo'tzuntza, chij te.
12Ikytzu'n ela' tiq'i'n Dab'i ch'ut exu' jun xar a' ate'toq tk'etz tq'axwe Sawul, exi'tzuntz. Mix-a'lote ka'yinkye ex b'inkye; mix-a'lo' tzaj tna'ntib'; kykyaqil ntoq che wtan, qu'n majx e'kyim tu'n watl tu'n Qman Dyos. 13Tb'ajlenxi'tzun ja'lu ik'x Dab'i jlajxi' b'ya', twi' jun witz, najchaqinx kyxol. 14Tzaj ẍch'intzuntz kuw te Ab'ner ex kyeju' xjal te q'oj:
—¡Na'ntztib'a Ab'ner!, chij.
Atzunte Ab'ner tzaj ttzaq'we'n:
¿Titi' toklena tu'nju' ntzaj ẍch'ina teju' nimaqkawil?, chij.
15Xi'tzun tma'n Dab'i te:
—¿Ma myatzunju'ya ichan q'uq'lixi'x tk'u'ju' nimaqkawil ti'ja toj Israel? ¿Se'ntzun taq'wi min ntxq'uqi'na nimaqkawil ju' tajawa? Matz'okx jun t-xjalilxa tu'n tkub' tb'yo'n. 16Myab'a'n xtb'inchaya. Lu Qman Dyos nka'yin, b'a'n tu'nkykyime', qu'n na'mx kyxq'uqinteye' nimaqkawil jaw t-sk'o'n Qman Dyos. ¡Jyonxpe'ya tch'ut nimaqkawil exu' jun xar a' atitoq tk'etzu' tq'axwe, qama tz'el yal tu'na!, chij.
17Tetzunj teltnik' Sawul teju' yolin Dab'i, tma:
¡Ma aju'ya Dab'i, nky'ajul, nyolintza!, chij.
Atzunte Dab'i xittzaq'we'n:
—Ayinna'tzune', nimaqkawil. 18¿Tiqu'ntzun ljo'na' toj nq'ije' tu'na nimaqkawil, ayine' ajb'el teya? ¿Ti'tzu'n myab'a'n xnb'inchaye'? ¿Titi' wile'? 19B'inchama xtalb'il, nimaqkawil, chin tb'itza ayine' ajb'el teya: qama txitk'mo'n Qman Dyos jun oyaj, atzuntz xjaw iq'inteya nimaqkawil, tu'n tq'ojina wi'je'; qatzun tnab'l ichan ja'lu, tzajxwit taq'wixil kyib'aje' tu'n Qman Dyos. Qu'n machin etz kyxla'ja'ne' toju' tx'otx' te Qman Dyos, ex tu'nju' lu nchinx kychq'o'ne' tu'n wajb'ene' kye txqantl dyos. 20Min wajb'ilwe' tu'n tkub' qojl nchk'ele' najchaq ti'j Qman Dyos, ¡atzunta nimaqkawil, matz'etza naku' jyol ky'aq, ex lepchoka wi'je' kywi'witz naku'j kse'n njyet jun xlak'uk'!, chij te.
21Atzunte Sawul tma:
—¡Dab'i, nky'ajul, ayinwe' matxi' chin b'inchan il! ¡Matxi' chin okye' mixti' nnab'le', matxi' chin nelyale' toj nchuksb'ene'! Kutanjtz ti'ja, lay nb'inchantlwe' teya, qu'n matyek'uya tk'u'jlalila toju' q'ij lu, chij te.
22Atzunte Dab'i xittzaq'we'n:
Luju' tch'uta lu nimaqkawil, kuttzaj junju' tmajina iq'ilte, 23awttzun Qman Dyos q'onte tu'me'l t-xel teyile junjun kse'nxju' tb'inchb'aj. Mapena' kub' q'o'na nimaqkawil tu'n Qman Dyos toj nq'ob'e', min saq'ponwe' nq'ob' ti'ja, qu'n aku'te xjaw sk'o'nteya. 24Ikxwittzu'n kse'nwe' xnb'incha teya ja'lo nimaqkawil, ikxwittzunwe' lalun taj Qman Dyos tu'n toktz'aq jun ti'xti' wi'je', chi Dab'i. 25Jawtzuntma'n Sawultz:
¡K'iwla'nxwita Dab'i, nky'ajul! ¡Che b'entel ti'xti' nimaq kyoklen tu'na ex tkyaqilju' ktb'incha'ya k'elelb'a'n! chij.
Anjtzun Sawultz tja, atzunte Dab'i xitljo'n tb'e.
Currently Selected:
1 S 26: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999