SA KA KITANA 8
8
1Sumuna vi Efrayim di tam Gedeyon: Naŋ li van ki kayn nala katma'a kay mige? Hay li ma naŋ tuɗ dur sa Madiyanna, naŋ min dumaɗi kayn kay mige? Nisi gar cirepta ŋolo hiɗi namu. 2Gedeyon hot di tisiya: Nigiya, va ma nan lum a ŋra hiɗi nigin mi mige? ɦelena vi wana ma nigi garamna nam suw wan kay tuwamu ma gurona vi Abiyezer feɗemna ɗisu? 3Oreb hiɗi Zep muliyana vi Madiyan Lawna vulsi kayn hay ɓigi nigiɗi su? Va ma nan lum asay ŋray hiɗi nigina mi mige? Hay li ma nam disi ki kayn nala dina, diksi bulasa.
Nisi jaŋ kuɗ sumuna ta-ta goy bugol Yordan
4Gedeyon hiɗi sumuna valam sa kis-ɦidina co hay Yordan, jik kay Yordan kaw, nisi ay makay ŋolo, may ka sli sem sa Madiyanna dok-dok. 5Gedeyon di tam sum sa hay Sukkotna: Nan siɗawgiya, sum sa kuɗanna nigi vulsi va ma ti ne', kay nisi makay ŋolo, kay nan ka sli giɗer Zebak hiɗi Salmuna, muliyan sa hay Madiyanna.
6Muliyan sa hay Sukkotna di'e: Naŋ hiɗi sojena vaŋ numa vulgi va ma tin kayni Zebak hiɗi Salmuna yaway kigi yaw su? 7Gedeyon disiya: Kayn ŋaa'a, hay li ma Zebak hiɗi Salmuna Lawn vulsi ayawa hay ɓanu, nan ma jetgi sliwgi goy ne' ne' hiɗi zigiy ma fulla hiɗi zigiy-olla. 8Nam fokis hay liy namna pa kal hay Penuwel. Sum sa hay Penuwel nam jobsi va ma ti kaw. Dit ta nisi hotomtita ŋray ca ki sum sa hay Sukkot nala kaw. 9Sum sa hay Penuwel nam ka disi ala: La nan hotiyawa ŋaa'a ni, gulmun namna zawni nan min ɦom gaa'a.
10Zebak hiɗi Salmuna ka hay Karkor, hiɗi dir sojena visi kuɗsi ir ki birim doogo yam vasl nala. Kayni mi dir sojena vi sum sa gal kuɗuwna ma hinina tuta. Sa birim kis kalam dok-ma'na sa wi duura ciy goy kafe.
11Gedeyon jik hay hagata vi sum sa li ziy hay guɗukŋa, hay gal ma kuɗuwna vi Noba hiɗi Jokbeha. Soje sa hay liy namna var ala nisi ŋayawa, may nam co cisiya.
12Zebak hiɗi Salmuna pir jaŋi, nam jaŋ kuɗsiya, muliyan nisi sa ma'na vi Madiyan nam yawsiya, sojena visiya nam jaysi goy pek-pek'.
13Gedeyon goora vi Yowas hotay bugolomu hay duur pa. Nam sla'ay ti hagata ta hay Heresta. 14Goor ma joriyo kep hay hoyok-ziyna Sukkot, nam vumu jobom kay sem sum sa ŋulona hiɗi sa ŋom hoyok-ziyna Sukkot. Goor namna ɗosi semda visi gaa'a. Nisi noŋ kaf sumun dok-siɗiya yam siɗiya. 15Bugolda nam co tam sum sa hay Sukkotna nam disiya: Heɗe! Zebak hiɗi Salmuna lakŋi; nigi panan ala nan hiɗi sumuna van sa kuɗanna la numa makay ŋol kaw nigi vulma va ma ti kayn nisi yaway kuma lak su? May nisi lakŋi. 16Nam yaw sum sa ŋulona sa hay hoyok-ziyna hiɗi sum sa hay Sukkotna kaf, nam watsi hiɗi zigiy ma fulla hiɗi zigiy-olla. 17Gulmunna ma ŋuyi tam Penuwel kaw nam ɦom gaa'a, sum sa hay hoyok-ziyna nam cisi goy kirap'.
18Nam di tam Zebak hiɗi Salmuna: Sum sa nigi cisi hay Tabor nisi ay nanige? Nisi hot dita: Nisi ay slaŋ naŋ nala, nisi kaf voksi ay ki vok gurona vi muliyana nala. 19Gedeyon disiya: Nisi kayni si ɓosiyonna, gurona vi sunu. Hay sem Lawna! Lali nigi hinsi hini iriya, nan kaw as a cigi nigi goyɗi lay.
20Nam di tam Yeter goora valam ma ŋolla: Yeter, fokaŋ kulo'o, cisi goyo. May goor ma joriyona min calsi hiɗi kew-gaferaŋaɗi, tuwam nari kay nam ay goor tuwa. 21Zebak hiɗi Salmuna di'e: Fokaŋay kulo'o, cuma goyo mi naŋ kay tuwaŋu. Kay donom as sa jufn kayn mi sa jufn lay. Gedeyon kay tuwam fok kulo'o, nam cisi goyo, ganna ma kel lamgana visina nam yawamu.
Mulda vuli mi Gedeyon may nam mina'ɗi
22Sum sa Israyella di tam Gedeyon: Wulin kayn taŋ mul kuma'a, tunis taŋ naŋ pa, tam goora vaŋ kaw, tam guro-ŋolona vaŋ kaw, kay mige suɗma goy hay ɓam sa Madiyanna kayni mi naŋu. 23Gedeyon disiya: Nan as ti mul kigiɗi, gurona van kaw as ti mul kigiɗi lay, ti mul kigi mi Ma-Vatɗina tuta.
24Gedeyon disiya: Nan jobgi va'a: Wayta ta nigi yawa'ay vun duura nigi ma vulan kep kep. (Kay sum sa nisi kol kisina ka hiɗi ora, nisin si sum sa Ismayelitna.)
25Nisi dumu: Numa vulaŋga hiɗi hayma haɓi. Nisi bar sligar gaa'a, gigekaw cuk wayta valam ta nam yawa'ayt gaa'a gaa'a. 26Ora ma Gedeyon jobsi kalamna co goboy ir kilo dok-ma'. Sle guray ma ganta, sle ma cukum humna, sligar purpella ma muliyana vi Madiyan cukum tisina, hiɗi kerme ma kel lamgana visin kaw may ŋayɗi. 27Gedeyon in va ma girifimna kep hiɗi namu, nam colom hay hoyok-ziyna valam hay Ofra zaw. Nam muɗ kayni mi va ma gurona vi Israyel li tuwsi viyuw hiɗi namu. Va namna gan jawta vok Gedeyon hiɗi ziyna valam kaf.
28Sum sa Israyella hot yam sum sa Madiyanna gaa kuɗsiya, nisi fi a di delsi kulo ɗeŋ noŋɗi. Nagat fi tun-sukka ta-ta busat dok-fiɗi. Kayn hay li ma Gedeyon ka iri tuwana.
29Yerubaal goora vi Yowas hot vo'o, nam mus hay ziyna valamu. 30Gedeyon vuɗ guron dok-siɗiya, kayn si sa nam vuɗsi kay tuwamna, kay nam yaw boyn ŋolo. 31Cat ta sunumta ta goy Sikem vuɗum goor kep lay. Goor namna nam tunum selem ala Abimelek. 32Gedeyon goora vi Yowas mit kayn muɗi busay ŋolo. Nisi pum hay Ofra, hay zulda vi bulum Yowas, kayn ti zulda vi jafna vi Abiyezer.
Abimelek ci ɓosiyomna gurona vi Gedeyon goyo
33Bugol mitta vi Gedeyon kayni, gurona vi Israyel tun caw li tuwsi viyuw kuɗ Baal lo, nisi tun caw ɗuw Baal-Berit ki lawna visi nala. 34Lawna Ma-Vatɗina ma but sa Israyel goy hay ɓam sa gawta sa ŋuyi tisina humsi min gisi kalam loɗi. 35Yisi jok kay li ŋaat tam ziyna vi Gedeyon ma yum Yerubaal; humsi min gisi kay ŋaata ta nam la'ays tam sum sa Israyella loɗi.
Currently Selected:
SA KA KITANA 8: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001