EFESENA 4
4
Tapta-kepta vi vida
Kol 3:12-14; Rom 12:4-8
1Nan siɗawgiya, nan sa ma daŋgayna hay Bum-Sumuna, kay nigi ma poy nagay ki yita ta nigi yi ay hiɗi na'ta nala, 2hay hot-yamda gaata hiɗi ŋalda, hiɗi cubta-ŋalda, ziygi tuwgi jar-tuwgiya tuwgiya hiɗi minda, 3kay nigi ma so tuwgiya kay ŋom tapta vi Ŋusta ta tapgi kep hay sle'ta. 4Tuwna ka kepe, hiɗi Ŋusta kep kaw, ki nam yigiyawa hay cubta-sle'ta, hay yita vigiya; 5Bum-Sumuna kep, vida kep, baptisma kep, 6Lawn kepe, nam mi bum slen kafe, nam ma ka kulo'o kay slen kafna, jarsi kaf, haysi kaf kaw.
7May tam gigekaw jaraya slugota vuli kuɗ ŋrata vi vulda vi Kristu. 8Kuɗ kayni dit di ala:
Nam jiki kulo'o hay liyn ma kulona,
Nam mar sa daŋgayna ay goyo,
Nam vul vulda mi sumuna kaw.#4:8 fi dita kayni goy hay Nul 68:19.
9May nam kalay kulo'o kayn ɗek mige? La nalaɗina, kayni mi nam ma jiki gaa hay liyn ma gaana vi nagata kaw ɗi su? 10Nam ma jiki gaana, kayni mi nam ma kalay musi kulo kay dukalawn kafe, kay nam fi hob vun slen kafe. 11Kayni mi namu ma vulay sum segena ki sa apostolayna nala, sum sara'a ki sa jobta-Lawna nala, sara'a ki sa kus yoboyna nala, sa hena lo ki sa pasterayna hiɗi sa hatna nala kaw, 12kay sa peldetna fi muɗ pasiyaki hay lopna vi sunda, kay in tuwna vi Kristu kulo'o, 13ta-ta nay kaf co kulo tam tapta-kepta vi vida, tam wida vi goora vi Lawna, tam sana ma niyina, tam wulda ta ŋra hiɗi hobta vi Kristu. 14Kay nay ma lak ki gurosgurayna nala loɗi, dol kulo'o tap kuɗ hatna vi simeɗ mige mige kafɗi, tap kuɗ gi-yamda vi sumunɗi hiɗi nilamda hay lop ma yalla vi ba-goytaɗi kaw, 15may day gasita hay minda, nay ma wul hay slen kaf hay nam ma yamda, kayni Kristu. 16Hay namu, tuwna kaf ŋiray vun tuwam dono'o, tap goy kep, kuɗ gaslna valamu ma tapay vun tuwam dono'o, nam wul kulo'o kuɗ donota ta may goy tam gige gige kuɗ ɓetna vi tuwamu, nam fi donota kay tuwamu hay minda.
Irita ta busayta hiɗi ta wulita
Kol 3:1-16; Gal 5:10-25
17Kayni mi va ma nan dumu, di goy hay Bum-sumuna kaw, kay nigi ma poy ki sa waana poy hay varta waata vi yamda-wida visi kay tuwsi naɗi. 18Varta visi muɗi jufunu, nisi pulu hay irita vi Lawna, kuɗ bay-wida ma ka haysiya hiɗi so'otta vi diksiya. 19Nisi sa say li sle ma ŋaana loɗi, nisi vul tuwsi goy hay zlata-zulota ta-ta nisi li liwista kaf ta tapay hiɗi haramda kaw.
20May nigiya, kayni may mi va ma nigi hatamu kay wi Kristu hiɗi namnaɗi, 21may la nigi hum kalamu, hatay hayamu kaw, ki gasita ta ka hay Yesu nala, nigi hat hayam kayn kay fok tuwgi goyo, 22a nigi kuɗ poyta vigi ta jewta, vi sana ma busayna ma ɓulak goyo kuɗ darta ta viy sumun goyta, 23kay muɗ wuliya hay Ŋusta vi yamda-wida vigiya, 24kay cuk tigiya sana ma wulina, ma kotay kay Lawna, hay ɗigerta hiɗi peldetta vi gasita.
25Kay na'ta hingi sinda goyo, san gigekaw ma di gasita tam sugolomna kay nay kaf mi ɓetna vi tuway jar-tuwaya. 26La nigi muɗ ɦiya, ligi sulukɗi, hin fatta ɗik gaa'a kay hiyda vigiɗi. 27Vulgi liyna mi Matnaɗi kaw. 28Sa ma kul jewe, nam ma kul loɗi, may ŋaat kayni nam ma li lop hiɗi ɓalam ŋaa'a, kay nam ma fi va'a kay vul mi sa ma va valam mayɗina. 29Hin yoboy ma liwisi kal goy hay vungi noŋɗi, may yoboyn ma ŋaana kay ingi kulo'o, vul ŋaata mi nisi sa humumna kaw. 30Ligi va ma Ŋusta-Peldetta vi Lawna yor kuɗumɗi, na'a ta tuni tigiya ki tampoŋ nala tam fattiɗeŋ vi butta-goyta. 31Galakka, purcakka, ɦiyda, siwelda, ŋulda hiɗi joota kaf kaw nigi ma hinim jargi noŋɗi. 32Ligi ŋaata tam tuwgiya jar-tuwgiya, tiygi kay tuwgiya, vulgi gida jar-tuwgiya, ki Lawna vulgi gidawa hay Kristu nala.
Currently Selected:
EFESENA 4: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001