EFESENA 3
3
Ŋayayta vi yita vi sa waana
Kol 1:24-29; 2:1-3
1Kay na'ta kayni nan Paulus sa ma daŋgayna vi Kristu Yesu kigi nigi sa waana, 2la nigi humawa kay vulda-slugota vi Lawna ta vuli manu kay nan da' goy tigiya. 3A nam vul ŋayayta goy haraŋi tanu, ki nan ɗomis tigiya hay dita ŋolɗi ne' ɦawa nala. 4Hay li ma nigi lak jaŋamu, nigi ma hum caw yalda ta nan fi'e kuɗ ŋayayta vi Kristu. 5Ŋayayta na'ta may ɗekay goy tam gurona vi sumuna hay liyn ma jewnɗi, may na' ɗekawa goy haraŋ wulini hay Ŋusta tam sa apostolayna hiɗi sa jobta-Lawna sa peldetna: 6Sa waana tapay yaw voco na'ta, nisi muɗi mi tuw namna ma kepna, nisi as yaw deŋga na'ta hay Kristu kaw, kuɗ labara ma firina,
7ma nan muɗin mi sa ma sunda valamna, kuɗ vulda-slugota vi Lawna ta vulanti manu, kuɗ lita vi gaŋeraŋa valamu. 8Tan nanu, ma kiɗayna jar sa peldetna kaf, slugota kayni vuli tanu kay kus labara ma firina tam sa waana, kay sle ma ŋulona vi Kristu ma sa as fum cawamɗi, 9kay ɗek goy haraŋi ɓurawta vi ŋayayta ta ay ŋayay kirlak' hay vatɗita pa hay Lawna, nam ma kot slen kafna. 10kay tapta ma ɗek goyo wulini yalla vi Lawna kuɗ jafamu jafamu vok gaŋeraŋa hiɗi donota hay liyn ma kulona, 11kuɗ varta vatɗita valam ta nam daba' ya' hay Kristu Yesu Bum-Sumuna vaya, 12nam ma nay hay namu, fi butta-goyta kay ma goboy talamu hiɗi dikay kep hay vida. 13Nala nan siɗawgiya kay nigi ma lak kursuliya kuɗ lasta ta nan fa' kuɗgita, kayni mi gajijita vigiya.
14kay na'ta kayni nan girif gaa vok Bumna, 15nam ma jafn kaf hay dukalawna, kay nagata kaw may goy hayam pana, 16a nam vulgiya, kuɗ asta ŋolda vi gajijita valamu, vul donota mi sana ma haygi kalafna kaw, hiɗi donota vi Ŋusta; 17a Kristu ma mus hay dikgiya hay vida, ta-ta nigi fi col dono'o hiɗi sutaygi piy gaa'a hay minda, 18kay, hiɗi sa peldetna kaf, nigi ma fi donota kay hum be'da, fiyokka, zulla, fiyok ma kulona, 19a wi minda vi Kristu ta suw wida kaf, ta-ta nigi fi hob tam hobta vi Lawna.
20May, tam nam ma hiɗi donota ta ka li lop hayaya, nam as li slena ŋolo suw ma nay varamu, siɗaw kalam kaw, 21talam namu gajijita hay tapna, hay Kristu Yesu kaw, hay jafna vokomu vokomu ta-ta hay vatɗita vatɗita. Amen!
Currently Selected:
EFESENA 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001