SA MA KUSTA 6
6
1Nan wi joota tara kep gaa kuɗ fatta, na' to sutay sana. 2Sana Lawna vulum farayn ŋolo, sle hena hena ŋolo hiɗi gajijita kaw, va ma dikam daramu, ma nam bay fumɗi mayɗi, may Lawna hinim ti mul kay slen ta-taɗi, hin firi kay sle namna kayni mi sa mara ma bugolomu. Kayni mi va ma waa'a, mi joo ma ŋolo kaw. 3La san vuɗ guron kis, mus hay nagat busat ŋolo, la buura vi irita valam ir ŋol nanige kaw, la dikam may hob hiɗi ŋaata-ŋoldaɗi, la zul ma pum hayam kaw mayɗi, nan fi di ala goor ma suroɓi goyna kaw suwumu. 4Kay nam vuɗ goy kayni waa'a, nam hot ɗawn kaw hay jufunda, semda valam kaw hin ɗawn dok-dok hay jufunda lay. 5Kay nam may wi fattaɗi, ɗuwa' hiɗi iramɗi kaw, nam ka hay tun-sukka suw sa ma farayna. 6May la sa ma farayna mus iri malam ir busat birim ma' kaw, la nam firi hay ŋaata-ŋoldaɗi ni, kaf kal kayni hay liy kepe ɗisu?
7Lopna kafe ma san lumna, nam lum kayni kay gar tina, may hiɗi kayni kaf darta valam may hobɗi. 8Sa ma yalla suw sa ma ɦay-ɦayna hiɗi mige? Sa ma ka hay makka poyta valam ta jar sumuna ŋaata va' mi mige? 9Va ma iraŋ wumna nam ŋaa'a suw niŋana vi darta, kayni lo mi va ma waa'a hiɗi jaŋga kuɗ simeɗna. 10Va ma ka vaydi mi va ma ay yiy hiɗi selem hay buur ma kalayna yi', nay wi goy haraŋ ala sana ma yum ala sana as ci way hiɗi nam ma dono suwumnaɗi. 11La dit ka ŋolo, sle ma waana ka haya' ŋolo kaw, ŋaata ma sana fum kuɗum kayn mi mige? 12Sana hay irita valamu, hay ŋaɓta vi buura vi irita valamu ta goy waata, ta ki ŋus-gun nalata, sa ma as wi va ma ŋaa'a kalamu mi gige? Sa ma as vi labara tam sana kay va ma min li bugolom gaa kuɗ fatta mi gige?
Currently Selected:
SA MA KUSTA 6: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001