SA MA KUSTA 4
4
1Nan ɗuw tam curoɗ ma sumun ka curoɗ nuroysina gaa kuɗ fatta, nisi sa ka hay curo'da ka tiy hiɗi zimiyna, sa ma teŋsi irsi mayɗi, donot ka hay ɓam sa curoɗsina, sa ma teŋsi irsi mayɗi kaw. 2Sum sa mitina nan ɗuwsi kayni, nisi ka hay sle'ta suw sum sa iri vaydina, 3may sa ma musi hay sle'ta ta ŋolda kayni mi nam ma vuɗ malam goyɗina, ma wi lop ma joona ma li gaa kuɗ fatta malamɗina.
La hay curo'da, la vaŋ kepe, la nay tapay kep kaw mi mak tuw wa'a
4Nan wi ala makka ma san fum hay lopna, fita ma san fum hay lopna kaw, kaf lakŋi mi hunayta vi sana kat sugolomna, kayni lo mi va waa'a hiɗi jaŋga kuɗ simeɗna.
5Sa ma ɦay-ɦayna slet ɓalam war-digamu, nam mut sliw-tuwamu. 6La way-ɓaŋ kep hobay hiɗi tun-sukka, kayn suw way-ɓaŋ ma' pete hobay hiɗi lopna hiɗi jaŋga kuɗ simeɗna.
7Nan wi va mara ma waa'a ɦawa lo gaa kuɗ fatta. 8Sa ma valam kepna, sa valam mara mayɗina, goor valam mayɗina, ɓasulum mayɗi kawna, may lopna valamu yalam may dabɗi, iram cuki can kuɗ farayn na ca, nala nam li lop kayni mi gige? Nala nam tel ŋaata-ŋolda goy kay ciwta valam kayni kay mige? Kayni lo mi va ma waa'a, mi var ma joo'o kaw.
9Sum sa ma'na suw sa ma kepna, kay nisi fi wurakŋa asaya kuɗ lopna visiya. 10Kay la nisi cuk gaa'a, kep jarsiya as a vi niramna kulo'o; may sa ma valam kepna, la nam puk gaa kaw, sa ma vum ɓalam kulo mayɗi. 11Nala kaw, la sumun ma' bur dari, tuwsi as kuɗusa; may sa ma buri gaa valam kep waŋŋa, tuwam as kuɗus ɗawn kuɗus tige? 12La sana donom suw sa ma kepna, sum sa ma'na as slum vunamu; zigew ma dokay kay tuwam ɦidina as ja goy gosoyɗi.
13Goorgoor ma haw ma yalla valam ka'ana, nam suw mul ma muɗi maari, may ɦay-ɦay ŋolo, hum dita vi saɗina. 14Kay nam as kal ay goy hay daŋgayna pa kay ti mulu, lali nam vuɗi hawi hay mulda valamu kaw. 15Nan wi sum sa irina sa poy gaa kuɗ fatta ŋuy goorgoora ma min vurna hay mulda. 16Sum nisin kaf kayni dabta visi tay noŋɗi, nisi sa nam ay ti mulda kisina. May hiɗi kayni kaf sum sa min co bugolsiya as li firi kalam noŋɗi. Kay kayni kaw mi va ma waa'a hiɗi jaŋga kuɗ simeɗna.
Va ma yi kaŋu bay var kalam jewna
17Laŋ ŋali hiɗi seŋu hay li ma naŋ kal kalaf hay ziyda-Lawna, ɦuraŋ kulo goboyo kay huma, kay kayni suw lita vi ɗifinna vi sa ɦay-ɦayna; kay nisi may wi ala nisi lum kayn jooɗi.
Currently Selected:
SA MA KUSTA 4: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001