2 TIMOTEWUS 4
4
1Nan daŋ gasita vok ir Lawna, vok ir Kristu Yesu kaw, nam ma ka kitata kay sa irina hiɗi sa mitina, hay semda vi mata valamu hiɗi mulda valamu, 2kusaŋ yoboyna, lawaŋ ɗeŋe hay liyn kaf, hay li ma ŋaana lebo marige kaw, muɗaŋ varta vi sumuna, disi kirsiya gatsiya, hatsi hiɗi ŋalda kaw. 3Kay liyn ma sumun ziy hatta ta bay-gesta loɗin ma ma'a; may kuɗ darta visiya, hiɗi humsi ma mutsi siy kay hum slena, nisi ma jok kuɗ sa hatta sara'a sara'a; 4nisi ma muɗ humsi goy tam gasita, ma muɗ humum mi kasla ma jew ɓa-ɓana. 5May naŋu, laŋ ŋali hay slen kaf, ziyaŋ lasta, laŋ lopna vi evanzelistena, hobaŋ vun lopna vaŋ hay liyam ŋaa'a.
Paulus ka var kay mitta valamu, nam yi Timotewus aya
Fil 1:20-23
6May nanu, wulini tuwan vuli goy ɗifin vatiya, liyna vi kalta vanu coowa goboyo. 7Nan dur duur ma ŋaanawa, nan vat jaŋŋawa, nan ŋom vidawa. 8Bogorayna vi ɗigerta ka ŋomay kulo'o kay cubanu, Bum-Sumuna ma ka kitat ɗigere ma vulan bogoray namna hay buur namna ɗawni, may man nan kepɗi, may mi nisi sa ka cub mata valam kafe.
9Garaŋ hagata kay ma tan gosoyo, 10kay Demas hinanawa, kay dikam minim mi sle ma hay nagat tanna, nam kalay hay Tesalonika, Kreskens kalay hay Galatiya, Titus kalay hay Dalmatiya. 11Hini hiɗi nan mi Lukas kepe. Naŋ ma vi Markus maram kuɗaŋu, kay nam ŋaa'a kanu kay sunanu. 12May Tikikus nan gum sunu hay Efesus. 13Hay li ma naŋ payawa, sligar-tuwna ma nan hinim ay hay Trowas vo vi Karpus, naŋ ma yawamiya, hiɗi ɗerwella kaw, suw pet ɗerwel ma ɗigiyna.
Vatta
14Aleksander ma zli cafna lan joo'o ŋolo. Bum-Sumuna ma wurakam kuɗ lopna valamu. 15Naŋ ma li ŋal hiɗi namu kaw, kay nam ci way ŋolo hiɗi yoboyna vaya.
16Hay li ma nan vi sem lawta van goyo hay sem ma jewna, sa may gut kuɗanɗi, may nisi kaf hinan goyo. Lawt kayni ma ŋaɓ kisiɗige! 17May Bum-Sumuna mi ma gut kuɗanu, nam vulan donota, kay nan ma nar kusta vi labara ma firina goy tam sumun kaf hay asta valamu, a sum sa waana ma humum kafe kaw. Bum-Sumuna butan goyo hay vun zlona kaw. 18Bum-Sumuna ma butan goyo hay lop ma joon kaf, ma suɗan goyo kaw, kay naran kulo hay mulda valamu hay wuralawna. Tam namu gajijita hay vatɗita vatɗita Amen.
19Naŋ ma gi deɓ mi Priskila hiɗi Akuilas, hiɗi jafna vi Onesiforus.
20Erastus ay hini hay Korinte, Trofimus nan hinim ay moyo hay Miletus.
21Naŋ ma gar hagata a co tani jew cayda. Eubulus hiɗi Pudens hiɗi Linus hiɗi Klawdiya hiɗi ɓosiyayn kaf gaŋ deɓe.
22Bum-Sumuna mus hiɗi ŋusta vaŋ musge. Slugota mus hiɗi nigi musge.
Currently Selected:
2 TIMOTEWUS 4: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001