2 KORINTENA 11
11
Paulus hiɗi apostolayna sa bay-gasina
Gal 1:6-9; 2 Kor 12:11-15
1Humgi kuɗ yoboyna van ma ɦay-ɦayna kayni ne' humge. Awa gasi, nigi ma hum kuɗanu hiɗi ŋali. 2Kay nan ka li hunay kigiya hiɗi hunayta vi Lawna, kay nan dargiyawa mi juf ma kepna, kay nargi tam Kristu ki goota-cata ta bay wi sa tuwa nala. 3May, ki guyna ɗut Eva hiɗi nelemda valam nala, nan ka li nar ala varta vigi ma muɗ liwisi, kay nigi ma cal goy hiɗi peldetta ta hay Kristuta klasige! 4Kay la sa mara co katgiya kusgi labara kay Yesu mara'a, ma numa may kusum tigiɗina, lebo la nigi fi Ŋusta tara'a ta nigi may fa' jewɗi, lebo la labara ma firina mara'a ma nigi vumu, nigi asay a ziyim ŋaa (ku'u) su?
5Kay nan var ala sa apostolayna sa nigi ɗuwsi ŋolo suwanna nan may kiɗay goy katsi hay vaɗi. 6La nan wi vun ma di cet-cetna manɗi kaw, wida van ka'a, numa ɗek kayni goy haraŋi hay slen kaf jargiya.
7Hay li ma nan hot yan gaa'a, vulgi ŋolda migi nigiya, hay li ma nan kus labar ma firina bay wurakŋa jargiya kaw, hay na'ta nan li suluku su? 8Nan yaw gurjuta hay ɓam sa viyna segena kay gutgi hiɗi na'a, hay li ma nan ay jargiya, la sle ma ŋom ŋil tuwan mayɗi kaw, nan mak saɗi. 9Kay ɓosiyonna sa may goy hay Makedoniya pa vulan sle ma ŋom ŋil tuwan kayn si nisiya, hay slen kaf nan ŋom tuwanu, kay nan ma cigi nekɗi, nan ma ŋom tuwan dok-doko. 10Ki gasita vi Kristu ka hayan nala, suburta kayni fi yaw goy kanu hay nagata Akayaɗi. 11Kay mige? Kayni kay nan mingiɗi su? Lawna wi kayni.
12May va ma nan ka lumna kayni nan ma lum lo, kay nisi sa gar hagata kay ŋra tuwsi hiɗi numa'a hay sle ma nisi subur tuwsi hiɗi namna ma fi hagatɗi. 13Kay sum nisina sa apostolayna sa bay-gasina, sa li lop hiɗi ɗutta, sa muɗ tuwsi goy sa apostolayna vi Kristu. 14Kayni as muɗ sa ɦuyumɗi, kay Satan kay tuwam kaw as muɗ tuwam goy sunda wuralawna vi haraŋa. 15La sa sunda valamu muɗ tuwsi goy sa sunda vi ɗigerta nala, kayni may li sa ɦuyumɗi kaw. Dabaŋgu'ta visiya kuɗ lopna visiya.
Lopna vi Paulus hiɗi makka valamu
2 Kor 4:9-13; 6:3-10
16Nan fi di lo, hin sa ɗuwan ki sa ɦay-ɦayna nalaɗi; la naɗi nigi ma van jargi ki sa ma ɦay-ɦayna nala, kay nan kaw, nan fi subur tuwan neeɗa. 17Va ma nan ka dum wulin kayni, may kuɗ minda vi Bum-Sumunɗi, may ki hay ɦay-ɦayta nala, kay nan wi va ma nan subur tuwan kalamna. 18Kay mige sumuna ŋolo min subur tuwsiya hay sliwna, nala nan kaw nagay kay subur tuwanu. 19Nigi sa ŋalda vigi ka tigiya, may nigi ziy sum sa ɦay-ɦayna. 20Kay nigi li ŋali tam sumuna kay nisi ligi gorvo'o, kay nisi yaw slena vigiya, kay nisi tigi ɓuraŋi, kay nisi subur tuwsi katgiya, kay nisi cigi kulo gelaygiya. 21Nan di kayni hiɗi zulo'o, ki numa'a maŋay nala. May la san jigal tuwam kay va'a, (nan di hay ɦay-ɦayta) nan jigal tuwanu kaw.
22Nisi si sa Hebren su? Nan nala kaw. Nisi si sa Israyel su? Nan nala kaw. Nisiya si jafna vi Abraham su? Nanu nala kaw. 23Nisi si sa sunda vi Kristu su? -- Nan ka law ki sa ma viy goy diwiŋ nala -- nanu suwsiya: Nan li lop suwsiya, nan fi watta suwsiya, nan ti daŋgayta suwsiya, sem ŋolo goboy vun mitta, 24sem vasl nan fi watta hiɗi klekŋa, hini kep ɦawa a tew dok-fiɗi. 25Nisi watan hiɗi libetna sem ɦidi, nisi gan hiɗi goorhoyona sem kepe, lumna ko goloŋ hiɗi nanu sem ɦidi, nan bur tos, busa he' kaw gaa hay zul ma wiŋŋa. 26Hay rogoyta van sem ŋolo, niy-lumna goboy a banu, sa coŋcoloŋŋa goboy a canu, sum sa hay jafna vanu (sa Yudiyana) goboy a can goyo, sa waana goboy a can goyo, sum sa hoyok-ziyna goboy a canu, nan goboy a ba goy hay fulda, goboy a ba jar niy-lum ma ŋolla, goboy a ba jar ɓosiyon sa bay-gasina. 27Hay lopna hiɗi zumalda, sem ŋolo hay bay-senda, hay mayta hiɗi laata, dok-dok hay laata, hay sleɗna hiɗi nalata. 28Sle hen ŋolo ka'a, may va ma nan varam hay buurta kaf kayni, mi varta kay (gut) tapna hay liyn kaf. 29Sa muɗ maŋaya, bay nan kay tuwan muɗ maŋay su? Sa puk gaa'a, bay dikan tan kalam su?
30La nan subur tuwanu, nan as subur tuwanu kay maŋayta vanu. 31Lawna Bum Bum-Sumuna vaya Yesu Kristu, nam ma bolda ka kalamu ta-ta hay vatɗita, nam wi ala nan ka sinɗi. 32Hay Damas, guvernera vi mulla Aretas lak sumun kay ŋom hoyok-ziyna kay nisi ma vanu, 33may sumun siran gaa hiɗi tikisina kir fenetrena vi gulmunna, nala nan pir goy vun ɓalamu.#11:33 Ɗuw kayni hay Lop Ap 9:24-25.
Currently Selected:
2 KORINTENA 11: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001