2 KORINTENA 10
10
PAULUS KA DUR KAY LOP-SUNDA VALAMU
Paulus di goy ala nam mi apostolla gasi
1 Kor 2:1-5; Rom 15:17-21; 2 Kor 6:4-7
1Wulini nan Paulus, nan siɗawgiya hiɗi zigin-zlata hiɗi ŋaata ŋolda vi Kristu -- nan mi sa ma yan hoti gaa kuɗgiya, hay li ma nan ka goy gine hiɗi nigiya, nan muɗi ɗeŋ ŋolo katgiya -- 2Nan siɗawgiya, kay hay li ma nan ma coys jargiya, gatta ta ɗeŋga ta nan var ala nan min li dono hiɗi na'a tam segena sa poy kirma ki hay sliwna nala, nan min hina' goyo. 3La numa poy hay sliwna kaw, numa dur kuɗ minda vi sliwnɗi. 4Kay sle-ma-duura ma numa dur hiɗi namna, may mi slena vi sliwnɗi, may nam mi donota vok Lawna, kay ɦo gulmunna gaa'a. 5Numa ɦo gaa'a subur-tuwta ta wul tuwa' kulo suw wida vi Lawna, varta kaf numa juna' gaa kuɗ humda kuɗ Kristu. 6Tuwma kotay kot' kay gat ŋel-vunda kuɗ jafa' kaf, hay li ma humda vigi nigiya asawa.
7Nigi ka ɗuw slen ma vokgi ɦawa. La san vi goy gasi ala nam ka hay Kristu, nam ma var kay slen kayni: La nam ka hay Kristu, numa kaw ka hay Kristu. 8Kay la nan subur tuwanu kay donota vuma'a, (ta Bum-Sumuna vulmatawa kay ingi kulo'o, kay ɦogi gaaɗi), nan ma muɗ zuloɗi. 9Nan may min muɗgi nari hiɗi ɗerwelda vanɗi. 10Kay nisi di ala: Ɗerwelda valamu law ɗeŋ ŋolo, dono ŋolo kaw, may nam kay tuwam hayɗin maŋaya, dita valam kaw bisi. 11Sa ma di nalana hinim var ala: Sle ma numa ɗom hay ɗerwelda vuma'a hay li ma numa may jargiɗina, hiɗi sle ma numa lumu hay li ma numa ka jargiya nam ŋray ca.
12Kay numa min ŋra tuwma hiɗi sum sa sli yisi kulonɗi. May hay li ma nisi ŋra tuwsi hiɗi tuwsiya, ŋaɓ tuwsi hiɗi tuwsi kaw, hay na'ta yalla visi mayɗi. 13May numa'a, numa min subur tuwma'a goy bugol ŋaɓtaɗi, va ma numa min colom kay li ŋaɓta hiɗi nam kayni mi galla ma Lawna ɓurawam tumana, hay li ma numa co ta-ta katgiya. 14Numa jik goy kay va ma ŋaɓay kumana ki numa bay co ta-ta katgiya naɗi, kay numa coy ta-ta katgiya hiɗi labar ma firina vi Kristu. 15Numa may subur tuwma kay jik ta-ta goy bugol ŋaɓta kuɗ lopna vi sa maraɗi, may numa cub hiɗi sle'ta, kay vida vigiya ma wul kulo'o, kay numa as li lop ma ŋulo suwa jargiya, hay li ma numa lak dok-doko hay ŋaɓta ta Lawna ŋra' kuma'a, 16hay li ma numa kus yoboyna hay nagat ta goy gine hiɗi nigiya, numa as subur tuwma kay liy ma segen ka li lop hayamnaɗi.
17May sa ma subur tuwamu, nam ma subur tuwamu hay Bum-Sumuna. 18Sa ma nagay kay wakka kayni may mi sa ma ɗek tuwam kirgi kay tuwamɗi, may mi nam ma Bum-Sumun ɗekem kirgina.
Currently Selected:
2 KORINTENA 10: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001