Jeremías 50
50
Babilonia nación vencesqa kananmanta
1 #
Is 13.1—14.23; 47.1-15. Babilonia nacionpa chaynataq Caldea runakunapa contranpim Jeremiasnintakama Tayta Dios kaynata nirqa:
2Llapallan nacionkunaman willakamuychik,
banderata hoqarispa qapariychik,
mana imata pakaspa kaynata niychik:
“Babilonia nacionmi vencesqa rikurirun,
Bel sutiyuq idolonkum penqaypi rikurirun,
# 50.2 Marducqa Babiloniapa idolonmi. Huknin sutinqa Merodacmi. Marduc sutiyuq idolonkupas ñutupasqam kachkan,
tukuy rikchaq idolonkunapas penqakuypaqmi ñutupasqa kachkan”, nispaykichik.
3Norte lawmantam Babiloniapa contranpi hamuchkanku,
Caldea naciontam pasaypaqta purmachinqaku.
Runakunapas chaynataq animalkunapas
manañam chaypiqa kanqañachu,
chay allpamantaqa lliwmi ayqekunqaku, nispa.
Israelpa mirayninkuna Tayta Diosman kutirikunankumanta
4Ñoqa Tayta Diosmi kaynata nini:
Chay tiempokunapim Israel runakunawan Judá runakuna, ñoqa Tayta Diosta waqastin maskawanqaku. 5Sión llaqtaman maynin chayanankutam tapukunqaku, hinaspam chay llaqta lawman qawarispanku ninqaku: “Tayta Diospaman hakuchik, mana haykapipas qonqanapaq wiñaypaq pactota ruwaspa payman hukllawakamusunchik”, nispanku.
6Llaqtayqa chinkasqa ovejakuna hinam karqa, michiqninkunam ñanta pantarachispa orqokunapi cheqesqata saqerurqaku. Orqon-orqon purispankum kanchankutapas qonqarurqakuña. 7Enemigonkunam tariruspanku mikururqaku, hinaspam kaynataraq nirqaku: “Manam ñoqanchikpaqqa huchanchikchu, paykunaqa Tayta Diospa contranpim huchallikururqaku. Tayta Diosqa mikunanku pasto hinam karqa, ñawpa taytankupa hapipakunanmi payqa karqa”, nispanku.
8 #
Ap 18.4. ¡Babilonia nacionmanta lluptiychik,
Caldea allpamanta lloqsiychik!
¡Ayqeqkunapa ñawpaqninta kallpaychik!
9Babilonia naciontam
norte lawmanta hamuq atiyniyuq nacionkunawan atacachisaq,
llapallankum huklla yaykuspa munaychakurunqaku;
paykunaqa flechakunawan allin peleaq soldadokunam,
flechaspapas hapichinkupunim.
10Caldea nacionpa tukuy imantam apakunqaku,
mana apaypas atinankukamam qechunqaku.
Ñoqa Tayta Diosmi chaynata nini.
Babilonia nación tuñichisqa kananmanta
11Caldea nacionpi runakuna,
maynatam kusikurqankichik,
kusikuyllawanñam llaqtayta purmachirqankichik,
llullu pastowan saksaruq vaquilla hinam pawaykacharqankichik,
caballokuna hinam weqeqeqerqankichik.
12Mamaykichik Babilonia nacionmi penqaypi kachan,
wachakusuqniki nacionmi pantaypi kachkan;
wakin nacionkunamantapas aswan qepallapiñam rikurirunqa,
mana yakuyuq chunniq pampam kanqa.
13Ñoqa Tayta Dios piñakurusqayraykum
manaña runayuq chunninqa,
pasaypaq purmachisqam kanqa.
Babilonia lawninta pasaqkunam admirakunqaku,
purmachisqa kasqanmantam burlakunqaku.
14¡Llapa flechaqkuna,
Babiloniapa muyuriqninpi churakuychik!
¡Ñoqa Tayta Diospa contraypi huchallikusqanmanta
mana samaykuspa flechaykichikta kachariychik!
15Muyuriqninmanta ¡Guerra! nispa qapariychik,
¡Babilonia nacionmi wichirun!
¡Torrenkunawan murallankunam wichirun!
¡Kayqa ñoqa Tayta Diospa vengakuyniymi!
¡Imaynam ruwasusqaykichikta hina paykunatapas ruwaychik!
16Babiloniapiqa tarpuqtapas cosechaqtapas lliwta wañuchiychik.
Guerrata qawaykuspankum huklaw nacionniyuqkunapas,
sapakama maymi kasqanku nacionman lluptikunqaku.
Israelpa mirayninkuna kutimunankumanta
17Israelqa leonkunapa cheqerachisqan chinkasqa oveja hinam. Puntatam Asiria nación mikururqa, paypa qepantañataqmi Babilonia nacionpa reynin Nabucodonosor tullunkunatawanpas katkarqa. 18Chayraykum Israelpa yupaychasqan Tukuy Atiyniyuq Tayta Dios kaynata nin: Asiria nacionpa reynin castigasqayta hinam Babilonia nacionpa reynin Nabucodonosortapas chaynataq runankunatapas castigasaq. 19Israeltam pastonman kutichimusaq; Carmelo orqopi, Basán lawpi, Efraín orqokunapi hinaspa Galaad lawpi pastokunatam saksanankukama mikunqaku, nispa. 20Ñoqa Tayta Diosmi kaynata nini: Chay punchawkunapiqa, Israel nacionpa mana allin ruwasqankuta maskaspankupas manam tarinqakuñachu, Judá nacionpa huchankunata maskaspankupas manam tarinqakuñachu. Puchuchisqay runakunapa huchantam ñoqa pampachasaq, nispa.
21 # 50.21 Hebreo simipi Merataim ninanqa: “Iskay kutikama contranpi hoqarikuq” ninanmi. Merataim llaqtatayá atacamuychik,
# 50.21 Hebreo simipi Pecod ninanqa, “castigo” ninanmi. Pecod llaqtayuqkunatayá atacamuychik,
ñoqapa kamachisqayman hina,
qatikachaspa pasaypaqta chinkachimuychik;
kamachisqayman hina ruwamuychik,
ñoqa Tayta Diosmi chaynata kamachikuni.
22Peleaqkunapa qapariyninmi chay allpapi uyarikuchkan,
hatun ñakariymi uyarikuchkan.
23Nacionkunata tuñichiq martilloman rikchakuq Babilonia nacionmi
pakipasqa rikurirun,
¡Babilonia llaqta purmarusqanwanmi
llapa nacionkuna mancharisqallaña kachkanku!
24Yaw, Babilonia llaqta,
contraykipim toqllata churaruni;
mana musyakuspam chay toqllaman wichiykunki.
Tayta Diospa contraypi hatarisqaykiraykum
hapirachikuspa presocharachikunki.
25Tayta Diosmi armankuna waqaychanan wasita kicharun,
piñakuy armankunatam hurqoramun;
Tukuy Atiyniyuq Tayta Diosmi
Caldea runakunawan imam ruwananta ruwanqa.
26¡Tukuy hinastinmanta hamuspa Babiloniata atacaychik,
kawsaykuna waqaychanan taqekunata kichaychik!
¡Runakunata huñuruspa lliwta wañuchiychik,
ama hukllapas puchuchunchu!
27Soldadonkunata wañuchiychik,
nakana wasiman pusaychik.
¡Ay, imaynaraq kanqaku,
castigasqa kananku punchawmi chayaramunña!
28Babiloniamanta lluptiqkunapa qayakuyninmi uyarikun,
Tayta Diospa vengakusqantam Sión llaqtapi willakuchkanku,
templon tuñichisqankumanta vengakusqantam willakuchkanku.
29 #
Ap 18.6. Paykunam ninku:
“Babiloniata atacamunankupaq flechawan peleaqkunata huñumuychik;
mana pipas lluptinanpaq muyuriqninkupi campamentota sayachimuychik.
Imam ruwasqankuman hina pagamuychik,
imam ruwasqanta hina paytapas ruwamuychik.
Paykunaqa Israelpa yupaychasqan Tayta Diospa contranpim hatarirqaku”, nispanku.
30Chayraykum jovenninkunapas plazankunapi wañuchisqa kanqaku,
chay punchawpim allinnin qari-qari soldadonkunapas wañunqaku.
Ñoqa Tayta Diosmi chaynata nini.
31Ñoqa Tukuy Atiyniyuq Tayta Diosmi kaynata nini:
Hatunchakuq nación, contraykipim kachkani,
punchawnikim chayaramun,
castiganay punchawmi chayaramun.
32Hatun tukuq nación, mitkaruspam urmarunki,
manam hatarichisuqnikipas kanqachu.
Llaqtaykikunatam kañaykusaq,
chay ninam muyuriqnikipi kaqkunatapas rupanqa, nispa.
33Tukuy Atiyniyuq Tayta Diosmi kaynata nin:
Israel runakunawan Judá runakunam ñakarichisqa kachkanku,
enemigonkunam presocharuspa mana kachariyta munankuchu.
34Chaywanpas paykunapa reclamaqninqa atiyniyuqmi,
Tukuy Atiyniyuq Tayta Diosmi sutinpas.
Paymi nanachikuspan allin arreglota ruwanqa,
nacionmanpas hawkayaytam apamunqa,
Babiloniamanñataqmi hatun manchakuyta apamunqa.
35Ñoqa Tayta Diosmi kaynata nini:
Caldea runakunapa contranpi peleamuychik,
Babilonia nacionpa contranpi peleamuychik,
kamachiqninkunapa contranpi peleamuychik,
yachaysapankunapa contranpi peleamuychik.
36Locoyanankukama layqankunapa contranpi peleamuychik,
allinnin qari-qari soldadonkunapas manchakuymanta katkatatachunku.
37Carretankunatawan caballonkunatapas espadawan wañuchimuychik,
warmi hinaña katkatatanankukama soldadonkunatapas wañuchimuychik,
qori-qollqenkupa contranpi peleamuychik, lliwta suwa apachun.
38Mayunkunapa contranpi peleamuychik, chay mayukuna chakichun,
Babiloniaqa tukuy rikchaq idolokunapa kananmi,
chay idolonkum paykunata locoyarachin.
39 #
Ap 18.2. Chayraykum Babiloniapiqa purun animalkunawan, atoqkuna hinaspa avestruzkunallaña yachanqa. Chaypiqa wiñaypaqmi manaña pipas yachanqachu.
40 #
Gn 19.24-25. Sodoma, Gomorra chaynataq muyuriqninpi llaqtakuna hinam Babilonia nacionqa manaña runayuq chunninqa, manañam pipas chaypiqa yachanqakuñachu, nitaqmi chayninta pasaqkunapas samarinqakuñachu. Ñoqa Tayta Diosmi chaynata nini.
41Norte lawmantam huk nación hamuchkan,
huk hatun nacionpa tropanmi hamuchkan,
kay pachapa cantonmantam achkallaña reykuna hatarimuchkan.
42Flechana arcokunawan lanzakunawan armasqam hamuchkanku,
pasaypaq mana llakipayakuq runakunam hamuchkanku,
Lamar qocha hinaraqmi qaparinkupas,
Caballopi silladam hamuchkanku,
Babiloniata atacanankupaqmi hamuchkanku.
43Babilonia nacionpa reyninmi chay willakuyta uyarirun,
makinkunapas manaña kallpayuqmi rikurirun,
manchakuypa pampasqanmi rikurirun,
wachakuywan ñakariq warmi hinaraqmi rikurirun.
44Jordán mayupa patan montemanta pastokunapa kasqanman lloqsiq león hinam, qonqaymanta lloqsiruspay Babilonia runakunata lluptirachisaq. ¿Pitaq ñoqa hina kanman? ¿Pitaq ñoqawan atipanakunman? ¿Mayqan michiqtaq ñoqawan churanakunman? 45Chaynaqa, Babilonia nacionpa contranpi tanteasqaytawan Caldea runakunapa contranpi tanteasqayta uyariychik: Uña ovejankunatapas aysaspam apanqaku, pastonkunatapas kañaykunqakum. 46Babilonia nacionta venceruptinkum allpapas katkatatanqaraq, qapariyninpas wakin nacionkunamanraqmi uyarikunqa.
Currently Selected:
Jeremías 50: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012