Tʋma Labʋ KAJALAƔ TƆM
KAJALAƔ TƆM
Laŋhɛzɩyɛ Tɔm Takayaɣ ŋgá Luka mawa yɔ, ka-wayɩ lɛ, ɛma ɖɔɖɔ Yesu Tiyiyaa Tʋma Labʋ Tɔm Takayaɣ. Takayaɣ kanɛ kɛkɛdɩɣ ɛzɩma Yesu tiyiyaa susi ɛ-tɔm yɔ. Pacalɩ-tʋ susuu Yeruusalɛm tɛtʋ taa, pʋwayɩ lɛ, powolo hɔɔlɩŋ weyi ɩmalɩnɩ tɛtʋ ńdʋ́ yɔ ɩ-taa, nɛ pɛtɛzɩnɩ ajɛya wena awɛ Mediterranee teŋgu nɔɔ yɔɔ kpɛɛ yɔ. Tʋmɩyɛ nɖɩ́ Yesu ɖʋ-wɛ yɔ, ɖɩtɛma lɛ (Luka 24.47-48 nɛ Tʋma Labʋ 1.8).
Yesu Tiyiyaa Tʋma Labʋ Tɔm Takaya kajalaɣ hɔɔlʋʋ taa lɛ, ɖɩnaɣ se Yesu kpaɣ ɛsɔdaa, Ɛsɔ cɔlɔ (1.9). Nɔɔnɔɔ lɛ, paatasɩɣ-ɩ naʋ ɛzɩ ɖooo lɛ yɔ. Ɛlɛ́, etiyiɣni e-tiyiyaa Fezuu Kiɖeɖeu ŋgʋ́ kɩlɩnɩ Ɛsɔ cɔlɔ yɔ (ñʋʋ 2 ñɩŋgʋ). Fezuu Kiɖeɖeu ŋ́gʋ́, ŋ́gʋ́ haɣnɩ-wɛ ɖoŋ se peheyi ɛyáa tʋma sɔsɔna wena Ɛsɔ lakɩ-yɛ yɔ a-tɔm. Yesu Tiyiyaa Tʋma Labʋ Tɔm Takayaɣ tɩŋa taa, Fezuu Kiɖeɖeu lakɩ nɛ ɛyáa sakɩyɛ pazɩ wɛnaʋ lidaʋ Yesu Krɩstʋ yɔɔ.
Kpaɣnɩ Yesu Tiyiyaa Tʋma Labʋ Tɔm Takayaɣ kajalaɣ hɔɔlʋʋ nɛ pʋkɔɔ pɩsɩɩnɩ ñʋʋ 12 ñɩŋgʋ taa, tiyiyu Pɩyɛ tɔm pakɩlɩɣ yɔɔdʋʋ.
Yesu tiyiyaa kaakɛ Yuda ñɩma. Pɔɖɔŋ wobu Yeruusalɛm Ɛsɔ sɛʋ ŋgbɛyɛ taa nɛ pɔyɔɔdʋʋ pa-caa tɔm. Kɛlɛ ɛzɩ Yesu yɔ, pa nɛ cɔjɔnaa sɔsaa paanɩɣnɩ ɖama (kpaɣnɩ ñʋʋ 3 ñɩŋgʋ nɛ pɩsɩɩnɩ 8 ñɩŋgʋ taa).
Peeɖe mbá pɛwɛnɩ lidaʋ Yesu yɔɔ yɔ, papazɩ wobu paa le, Yudee egeetiye taa, Samarɩɩ egeetiye taa, nɛ hɔɔlɩŋ lɛɛŋ taa nɛ peheyiɣ ɖɔɖɔ Ɛsɔtɔm mbá pɛtɛkɛ Yuda ñɩma yɔ (kpaɣnɩ ñʋʋ 8 ñɩŋgʋ nɛ pɩsɩɩnɩ 12 ñɩŋgʋ). Patatɩɩlabɩda ḿbʋ́ wiɖiyi. Alɩwaatʋ ńdʋ́ tɩ-taa lɛ, Yuda ñɩma ɖeke kaatɩlɩnɩ Ɛsɔ Caabiyuu. Pamaɣzaɣ se mbá patɩŋɩɣ Ɛsɔ nɩmaŋ lɛɛŋ yɔ, paapɩzɩɣ patɩlɩ Ɛsɔ. Kɛlɛ Yesu Krɩstʋ ñahaɣ ɛyáa tɩŋa nʋmɔʋ se pa nɛ Ɛsɔ pɛkɛ kʋɖʋm. Krɩstʋ ñɩma aŋgba nɛ coocinaa pazɩ ñɔʋ. Pɛwɛɛ nɛ pɔɖɔʋ paa ɖooye. Aŋgba ana nɛ coocinaa ḿbá pa-taa lɛ, ɖɩnaɣ Yuda ñɩma nɛ mbá pɛtɛkɛ Yuda ñɩma yɔ.
Kpaɣnɩ ñʋʋ 13 ñɩŋgʋ taa lɛ, tiyiyu Pɔɔlɩ lɛzɩɣ Pɩyɛ Yesu Tiyiyaa Tʋma Labʋ Tɔm Takayaɣ taa. Yesu Krɩstʋ yanɩ Pɔɔlɩ (ñʋʋ 9). Siiri Antɩyɔɔsɩ cooci taa ɛyáa lɩzɩ ɛ nɛ ɛ-taabalaa nabɛyɛ se powolo poliŋ nɛ peheyi ɛyáa Yesu laŋhɛzɩyɛ tɔm. Pɔɔlɩ nʋmɔʋ ɖɔm tɔm pɔyɔɔdʋʋ kpaɣnɩ ñʋʋ 13 ñɩŋgʋ nɛ pɩsɩɩnɩ 28 ñɩŋgʋ taa. Pɛkɛdɩɣ ɖɔɖɔ ɛzɩma Yesu laŋhɛzɩyɛ tɔm yɛlɩ Mediterranee teŋgu nɔɔ yɔɔ kpɛɛɛ nɛ halɩ tɩtalɩ Room, ɛjaɖɛ ńɖɩ́ ɖɩ-tɛtʋ sɔsɔtʋ taa yɔ pʋ-tɔm.
Luka Laŋhɛzɩyɛ Tɔm Takayaɣ yɔɔdʋʋ Yesu alɩwaatʋ taa tɔm. Yesu Tiyiyaa Tʋma Labʋ Tɔm Takayaɣ taa lɛ, cooci alɩwaatʋ pazɩɣna. Alɩwaatʋ ńdʋ́ tɩ-taa Krɩstʋ ñɩma woki tam hɔɔlɩŋ tɩŋa taa nɛ peheyiɣ ɛyáa Krɩstʋ Yesu tɔm. Tɔm ńdʋ́, peheyiɣ-tʋ ɛyáa ndɩ ndɩ. Ɛyáa ḿbá, pa nɛ pɔ-sɔnzɩ nɛ pɛ-Ɛsɔ nɩmaŋ. Pa-taa lɛ, ɖɩnaɣ piya nɛ sɔsaa, kʋñɔndɩnaa nɛ ñɩm tɩnaa.
Currently Selected:
Tʋma Labʋ KAJALAƔ TƆM: KABI
Highlight
Share
Copy
Want to have your highlights saved across all your devices? Sign up or sign in