Abakuku 3
3
Abakuku mbwaakapaila
1Uyu ngumupailo wangu neAbakuku kwiinda mumukumo wa Shigiyonoti.
2NoBaami baLesa ndakanyumfwa sheesho nshemwakacita.
Nebo ndamulemeka abuumbi ceebo ca shintu isho nshemucita.
Ono amushicite alimwi munshiku shesu shino.
Ee, amushipukishe muciindi cesu cino.
Kamutunyumfwila nkumbu nabi mwakalala.
3Lesa wakesa kuswa kuEdomu,
Lesa usalalite wakesa kuswa kuKalundu ka Palani.
Bulemu bwakwe bwakafwekelesha liculu
alimwi bamucishi ca panshi boonse bakamulumbaisha.
4Bulemu bwakwe bwakalinga anga ndisuba litooswa.
Mibengebenge yakaswa mumaansaakwe
umo mwaakashisa nkusu shakwe.
5Kunembo lyakwe kwakalinga mwaalu,
pesule lyakwe pakalinga bulwashi buyoosha.
6Cishi coonse catenkaana ndyaakeemikana.
Lyalo ndyaakalangilisha, mishobo ya bantu yakatutuma.
Tulundu tukulukulu twakasekemuka.
Atwalo tulundu tuniini tukulukulu twakawa
ndyaakeenda munshila shakwe shikulukulu.
7Ndakabona bene Kushani kabaloonda
alimwi abene Midyani kabatutuma.
8NoBaami baLesa, sa njiimilonga yakamukalasha?
Sa ndweenge lwakamulengesha kukalala?
Ncakwiila mwebo mwakeendela mumakumbi,
likumbi lya mfula lyakaba ncecikoci canu
ndimwakalengesha bantu banu kukoma.
9Mwakalibambila kusebensesha buta bwanu,
alimwi mwakalibambila kuwaala mifwi yanu.
Kalumba kanu kakalila akupasula cishi.
10Tulundu nditwakamubona twakatalika kutenkaana.
Mfula yakaloka abuumbi.
Lweenge lulaamfu lwakawoota
aalo maaba akakomena abuumbi.
11Lisuba amweenshi shakacileka kweenda
ndishakabona kubekooka kwa mifwi yanu
akubekabeka kwa lisumo lyanu.
12Mubukali bwanu mwakeenda kucilingana cishi ca panshi.
Ncakwiila mubukali bwanu buyoosha mwakalyatoola bantu bamumishobo yoonse.
13Mwakesa mukufuna bantu banu,
ee, akupulusha baabo mbomwakasala.
Mwakapwayoola mutanjilili wa bamucita shibi
akunyonyoola bantu bakwe boonse.
14Mwakayasa mutanjilili wa bamucita shibi alisumo lyakwe mwiine.
Mwakamuyasa ciindi likoto lyakwe lya bashilumamba ndilyakesa
anga nkapupuulwa kwaamba ayi litupalanganye.
Wakalinga kusangalala anga wesa mukunyonyoola bakandu cabushishi.
15Mwebo mwakalyatooka lweenge amaaki anu.
Aalo maanshi ayo acite nkusu akatukuka lyoofu.
16Ndindakanyumfwa shintu ishi, mubili wangu wakatutuma
ayalo milomo yangu yakatutuma kuboowa.
Ncakwiila mubili wangu woonse wakalefuka.
Ee, amyeendo yangu yakabukuma kuboowa.
Nakubi boobo ndaakulindilila camoyonteeka
ciindi ico Lesa aakwisa mukupa mulandu bantu batulwana.
17Nakubi kwaamba ayi mikuyu teecite maluba,
nabi myuunda ya minyansa teekwe kucata shisepo,
nabi shisamu sha maolifi tashikwe kucata,
nabi myuunda yoonse teekwe kukusha shilyo
nabi taamu mbelele mushimpati
alimwi aŋombe mushimpati sha nshisho
18ndaakusekelela muMwaami Lesa,
ndushinisho ndaakusangalala muli Lesa, Mupulushi wangu.
19Mwaami Lesa ngoompa nkusu shoonse.
Ulanengesha kulyata panshi cakushimpa
alimwi ulandama ciindi ndyeemba patulundu.#2 Samwe 22:34; Kulu 18:33
Currently Selected:
Abakuku 3: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.