1 Baami 4
4
Meena a bacinenenene bakwe Solomoni
1Solomoni wakalinga mwaami wa cishi ca Isilaeli coonse. 2Ono bakalinga bacinenenene bakwe mbaaba. Mupailishi wakalinga Asaliya mwanaakwe Sadoki.
3Balembi bakalinga Eliolepi aAija, bana bakwe Shisha. Shikulemba makani a kubwalo wakalinga Jeoshafati mwanaakwe Ayiludi. 4Mutanjilili wa bashilumamba wakalinga Benaiya mwanaakwe Jeoiyada. Bapailishi bakalinga Sadoki aAbiyata. 5Munene wa beendeleshi mushipansha sha cishi wakalinga Asaliya mwanaakwe Natani. Mupailishi, shikupanda maano mwaami wakalinga Sabudi mwanaakwe Natani. 6Shikweendelesha ŋanda ya bwaami wakalinga Aisha. Shikweendelesha beshikucatwa cibalu wakalinga Adonilamu mwanaakwe Abida.
7Solomoni wakasala beendeleshi likumi abobilo mushipansha sha cishi coonse ca Isilaeli. Aba mulimo wabo wakalinga ngwakuleta shakulya kumwaami abamuŋanda yakwe kuswa mushipansha shabo. Uli woonse wakalinga kuleta shakulya shikwana mweenshi womwi mumwaaka. 8Meena abo ashipansha nshebakalinga kweendelesha ngaaya. Beni Elu wakalinga kweendelesha cishi ca tulundu cakwe Efuleemu. 9Beni Deka wakalinga kweendelesha ndabala inene ya Makasi, Shalibimu, Beti Shemeshi, Eloni aya Beti Anani. 10Beni Esedi wakalinga kweendelesha ndabala inene ya Alubotu aya Soko alimwi acishi coonse ca Eefa. 11Beni Abinadabu, uyo wakalinga kweebete Tafati mwanaakwe Solomoni, wakalinga kweendelesha musena woonse wa Dole. 12Baana mwanaakwe Ayiludi wakalinga kweendelesha ndabala inene ya Taanaki aya Megido pantu pomwi amusena woonse wakalinga pafwaafwi andabala ya Beti Shani, pafwaafwi andabala ya Saletani, kumalenge lya ndabala ya Jesiliilu kuya mukushika akundabala inene ya Abelo Mewola alimwi andabala inene ya Jokimeyamu. 13Beni Geba wakalinga kweendelesha ndabala inene ya Lamoti mucishi ca Gilyadi, amishi ya muGilyadi yakalinga ya mukowa wakwe Jeya wamulunyungu lwakwe Manase. Wakalinga kweendelesha amusena wa Agobu mucishi ca Bashani. Mandabala anene ayo oonse akalinga 60. Yomwi ayomwi kaishingulushitwe alubumbu ashisasa sha paminjililo sha nshimbi sha bulonse. 14Ainadabu mwanaakwe Ido wakalinga kweendelesha cipansha ca Maanaimu. 15Aimaasi uyo wakalinga kweebete Basemati mwanaakwe Solomoni mwanakashi umwi, wakalinga kweendelesha cishi ca bene Nafutali. 16Baana mwanaakwe Ushayi wakalinga kweendelesha cishi ca bene Asha andabala ya Biloti. 17Jeoshafati mwanaakwe Paluwa wakalinga kweendelesha cishi ca bene Isaka. 18Shimeyi mwanaakwe Ela wakalinga kweendelesha cishi ca bene Benjameni. 19Geba mwanaakwe Uli wakalinga kweendelesha mucishi ca Gilyadi ico cakalinga kulelwa amwaami Sioni wa bene Amoli alimwi amwaami Ogi wa kuBashani. Ono kuleka baaba bali likumi abobilo, kwakalinga mweendeleshi wa cishi coonse ca Juda.
Kulela kwakwe Solomoni mbokwakaswitilila
20Bene Juda abene Isilaeli bakafula anga ngumuseese wa kuloombe lwa lweenge. Bakalinga kulya akunwa, alimwi bakalinga kusangalete. 21Solomoni wakalinga kweendelesha shishi shoonse kuswa kuMulonga wa Yufuletisi kuya mukushika kucishi ca Filisitiya kumanyinsa a Ijipiti. Aba boonse bakalinga kusonkela kuli nguwe alimwi wakabeendelesha kwabuumi bwakwe boonse.#Mata 15:18; 2 Maka 9:26
22Shintu shakalinga kusuni Solomoni pabushiku bomwi abomwi ngamalita ali 5,000 a fulaulo upelekete, malita ali 10,000 a busu, 23ŋombe likumi shilya shakulya sha mumankubala, ŋombe makumi obilo shilya mweemfu, mbelele mwaanda, kubikaako abakonse, shaambololo, bananja alimwi abayuni beenite.
24Solomoni wakalinga kulela cishi coonse cakalinga kumbo lya Mulonga wa Yufuletisi kuswa kuTifusa kuya mukushika akundabala inene ya Gasa. Bamaami boonse kumbo lya Yufuletisi bakalinga mumaansaakwe alimwi wakalinga kwikala muluumuno ashishi shakalinga kumushingulukite. 25Bene Juda abene Isilaeli boonse kuswa kuDani kuya mukushika kuBiyasheba bakalinga kwikala muluumuno kwabuumi bwakwe boonsebo. Mukobo womwi awomwi wakalinga kucite minyansa yakwe ashisamu sha nkuyu.
26Solomoni wakalinga kucite shipinda sha maaki atinta shikoci shili 4,000 pantu pomwi amaaki amwi ali 12,000.#1 Baami 10:26; 2 Maka 1:14; 9:25 27Beendeleshi bakwe bali likumi abobilo, womwi awomwi mumweenshi ngwaakapekwa wakalinga kutumya shakulya kumwaami Solomoni shalinga kuyandika kuli nguwe abaabo boonse mbwaakalinga kulyaabo. 28Mweendeleshi womwi awomwi wakalinga kutumya cipansha cakwe ca bale abwiisu, sha maaki atinta shikoci shankondo amaaki amwi uko nkoshayandika.
29Lesa wakapa Solomoni busongo, kunyumfwishisha kwa shintu shoonse alushibo luteelekwa. 30Solomoni wakalinga kucite busongo kwiinda basongo ba kwicwe nabi basongo bene Ijipiti. 31Wakalinga musongo wiinda bantu boonse. Ee, wakalinga musongo kwiinda Etani mwine Esila, alimwi aEmani, Kaluko aDada bana bakwe Maoli. Impuwo yakwe yakamwaika kushishi shakalinga kushingulukite.#Kulu 89 32Wakapanga tushimpi tuli 3,000 alimwi anyiimbo shili 1,000 akwiindilila.#Tushimpi 1:1 33Wakalinga kwiisha pashisamu, shishango alimwi ashisamu sha sida sha kuLebanoni kushika akumitenga ya Isopu iyo itandabalila kulubumbu. Wakalinga kwiisha apabanyama, bayuni, ntale ashintu sha mushobo uyo alimwi apanswi. 34Bamaami boonse ba mucishi bakanyumfwa shabusongo bwakwe akutuma bantu ayi baye bamukutike.
Currently Selected:
1 Baami 4: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.