Filipieŋ 1
1
Me tsey guma a vaw
1La, Pol ta Timotey, gawla ma Yezu Kriste hay, la windəmatar a ndaw kokwaɗ ana hay tabiyaha da Yezu Kriste, a bay ’ar ata na ma kəlatar ke mey ana ta diyakre ta hay, na taya tabiyaha da Filipi ana. 2Hayna hahaya ta zozoy ma Bay ma Bəla Baba lakwa, ta Bay’ərlam Yezu Kriste ka ndzey ta kuray.
Me mey sise ta me ɗuley mey
3Ka pas a ɗaw andza i dzeley aha 'ar ka kuray na, i madara sise a Bay ma Bəla ɗaw. 4Ka pas ka pas da ma ɗuley mey ka kuray tabiyaha na, i ɗuley mey na ta wuiya ha. 5Hərway ma lakwa ma dzəmakwa dzaya ka Mey Wayna, zla ta pas tsəfəmey aha na, kasl ekəɗey. 6Me dzeley 'ar a ɗaw na, andza neney: Ndaw ana ma zələrawa me key mber mambay mambay aha da vaw kwar ana na, a da husada, a da ndaslada ba kasl ka pas ma Yezu Kriste. 7Təɗe kassla i ma ndzaha andza neney hərway kwar tabiyaha na na, hayaha, hərway i wuɗakwar aha da mevel a ɗaw, kuray a neney andza da daŋgay ɗaw, andza da me dzəŋgərey ta ma ɓadama ta Mey Wayna ta gədaŋ, ndzam tobiya kwar ahiya da hahaya ma kəmiyawa na. 8Ayaw, Bay ma Bəla a key seydewe ɗaw ana, i wuɗakwar tabiyaha da kokwoɗ ma Yezu Kriste. 9Arka me ɗuley mey ɗaw na ŋga kəɗey: hayna ma wuɗa vaw kwar ka səkey a fənada adiya sa, ma ka vəlakwar tsəveɗ ma nəkada tek hay haya haya ha ta ma sərada tek. 10Ma kuray ka səradama ma sesəkey tek na ŋgama na hay, kəɗey na, kuray ka da kam tsəzlak ahiya, mandzara me ŋgəley bəzay ta pas ma da sawa ma Kriste. 11Ka da kam na ma rəhaya ta tek ma dzerey na ma sandukurawa da Yezu Kriste ana, ma da hasəkadara bəzay ta ma da sambəra Bay ma Bəla.
Daŋgay ma Pol, ta me gəley ma Mey Wayna
12Malam aɗaw hay, a saya na kuray ka səradama, tek ana ma safiyawa na na, dzadzak a da dzəney na ma gəlada Mey Wayna. 13Tobiyaha da 'ay bay, akwa na, kwa ka waray ka waray na, a səradama i da daŋgay na mavəday i kar mber a Kriste. 14Arka har a var a sa malam a hay, ma pa ’ar ahiya ka Bay’ərlam ta me zəgey ɗaw a neney a daŋgay ana na na, ma ndzafam gədaŋ adiya, ma tələkey mey ta Guma ma Bay ma Bəla mandzara me wesey. 15Dərka na, sa na hay a kama na da səleŋ, kəla andza waway aha, ama sa na hay a tələkadama mey ta Kriste na, ta mevel hayna. 16Taya na, a kama da ma wuɗa vaw, a səradama i ka sləna na, hərway ma me dzəŋgərey ka Mey Wayna. 17Taya na hana na hay na, a tələkadama mey ta Kriste na, ta səleŋ aha da mevel, tek ata na me key na, ma zləɓa hiya, a dzalam na, ma aza banay ɗaw da daŋgay ka səkey adiya. 18Amana, mey ma ndaw mey! Ka key teŋgey teŋgey na, kwa a dzalama da hayna dakay da na haya kakay ana na, Kriste na ma tələka mey aha ba, arka na, a daya 'ar bəza kakay, a fəna na tok na, a da daya 'ar a fəna sa. 19Hərway i sərada ha tek a neney a da ndekey na, me buwey yah, kuse ma ma ɗula mey kwar ta Mesəfrey ma Yezu Kriste ma hutafaya na. 20Da me hutey ɗaw ana hatsatsa ta me pey dey ɗaw ana na, hwaray a dakaya ha dakay, ama mevel a ɗaw ma ndza ha na, ndar ndar. Ekəɗey ana, kwa ma ka pas ka pas aha na, Kriste a da ɓey vaw da vaw ɗaw, ka key na, da mendzey ɗaw, dakay da memətsey ɗaw na. 21Hərway yah na, mendzey ta dey na, Kriste, me mətsey na, a kafaya andza riba. 22Ama haɗaw mendzey ka dala neney a da sadərawa mber, ma da yawa kava adiya na, na ŋga na i sərada i ka zəgey na, na waray sakay. 23I ma ndza ha na, gaŋga ka-a: a saya akwa na, ma daway tek aɗaw, ma da ndzey ta Kriste, ma saya ɗoh na ŋga. 24Ama me ndzey ka sləna ka dala na, a nefey a fəna na, hərway kwar. 25Arka satsa na i sərada ha, i da ndzey andza kuray tabiyaha, ma kuray ka gəlam adiya da wuiya ma me pey 'ar a kwar, 26ma aza kuse ma ma da maɓa ɗaw ka tsakay kwar na, maram a kwar ma ndzafam da Kriste na, ka gəley adiya.
Mendzey ma dam ka vaw ta Mey Wayna
27Haya dzadzak na, ndzam andza na ma Mey Wayna ma Kriste, haɗaw i da daɓa ma da nəkurawa na, kwa kendzey i dakay na, i tsənada a tsam aha ka kuray, ma ɓadəmaya kuray mandzaya mambay aha da mesəfrey ana asləta, ka kəɗam aha vaw ka masləta ha, ta mevel asləta, andza ma me pey 'ar ma Mey Wayna. 28Mandzara kuray ka mbəkadəmatara vaw a ndaw dugwan hay, ka wuɗadəmakwar mey zlay, a da tərey ka taya na, zeheɗ ma ma zəɗey ta, ta me buwey kwar, arka tek aŋga na a da sawa na da Bay ma Bəla. 29Hərway ka kakwar hahaya ba kavəday ma Kriste, ama da me pey'ar ka ŋga dada tsa kakay, ama satsa na, da me key tsetseh hərway ŋga, 30ta me kəɗey vaw andza na ŋga ɗaw, kuray ma nəkadəmaya i me key andza ha na na, kuray ana ka səradama ha, re i kəɗey aha vaw sa təŋga.
Currently Selected:
Filipieŋ 1: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun