1 Timotey 1
1
Ma səra vaw ta me tsey guma a vaw
1Yah Pol, maslaŋ ma Kriste Yezu, da me wuɗey ma Bay ma Bəla me buwey lakwa, ta Kriste Yezu na lakwa ma pakwar dey ana, 2a Timotey bəzey ɗaw dərka na da me pey 'ar: hayna ndzefey hahaya, me key da vaw, ta zozoy da har ma Bay ma Bəla Baba, ta Kriste Yezu Bay’ərlam a lakwa.
Ndaw me tetəkey ndaw maləwaɗay ana hay
3Andza na ŋga ɗaw ma tsəkawa, mba i ka daway a Masedowan ana na, ndzey da Efez ma kah ka təkata sa ma ndaw hay, ma tatəkadəmata ndaw hay ta guma mekelehe na, 4ka da tapam ka 'ərmbez hay ta me mbəsley baba tete hay na me ndesley ŋga na dakay ana zlay, na ŋga na na, a sadərawa na, me kəɗey waway zləna, andza tek ma Bay ma Bəla me dzeley me key da me pey 'ar ana tikay. 5Tek ana ma wuɗam da Mewey ana na, ma wuɗa vaw ma sawa da mevel tsəzləkka na, da me ndzey ma ndaw hayna, ta me pey 'ar me teɓey kakay ana. 6Ma sa ma ndaw hay ma ŋgəɗam ba ka tsəveɗ a neney hayna na, ma zləgam a me bebəley tek lamba na hay. 7A kadama vaw ta na, ndaw me sesəkey mewey ahiya, kwa azlakwa zlay a səradama tek ata na ma tsam ana kakay, kwa tek ata ma tsam kava ma gədaŋ tsəmma andza ha na kakay.
Mber ma mewey hayna
8Ka səradama ha seŋgey, akwa mewey na, haya ha, kendzey andza a ka dama mber andza mewey aha na. 9Akwa na, tsənadakwa tek a neney haya haya ha: mewey ma ka ha na ma ndaw dzerey ana hay kakay, ama na ma ndaw ma tsənam sləmay kakay ana hay ta ndaw ma bəra na hay, ma ndaw ma zləɓa na hay ta ndaw ma ŋgəsa na hay, ma ndaw me ŋgəsey kuley ana hay, ta ndaw me rəsey kuley hay, ma ndaw me kəɗey baba ta maya ta vagay aha na hay, ma ndaw me kəɗey ndaw vagay aha na hay. 10ma ndaw ma tsəlam so na hay, ma ndaw ma nam ta tsəla ta na hay, ma ndaw ma filam beke na hay, ma ndaw me tsey maləwaɗay hay ta ndaw me mbəɗey so na hay, ma ndaw ma kam tek dugwan aha ka me tetəkey dzerey ana hay. 11Nəkafa neney na tek ma dam ka vaw ta Mey Wayna ma me wezley dey ma Bay ma Bəla wuiya ha na, ma vəladəmiyawa na.
Ma madara sise a Kriste
12I madara sise haɗadzidzay a ndaw ma vəliyawa gədaŋ, Kriste Yezu, Bay’ərlam a lakwa, ma nəkafiyawa yah ɗa ndaw aha, ma paya 'ar ka da zəgaya a Meslərey ŋga na na, 13yah a neney da tsəfəmey aha, ndaw me tseɗey Bay'ərlam aha, ndaw me key tatakoy ta ndaw hay, həma ha na, amana, i ka kar ba da vaw, hərway ma mey na, i ka na, i sərada kakay, i pey aha 'ar kakay. 14Ayaw, hahaya ma Bay’ərlam na, ka batəkwafiyawa ba haɗadzidzay, satsa na, me pey 'ar ta ma wuɗa vaw da Kriste Yezu ana. 15Guma neney ana na, guma ma wasa kakay, a dafa na, ndaw hay tabiyaha ka təɓama haya hayaha: Kriste Yezu a sawa ka bəla na, ma da buwey ndaw ma ŋgəsa na hay, da walaŋ ata tsəfəmey aha na, yah. 16Amana, i ka kar ba da vaw, ma aza da yah, ndaw tsəfəmey ana na, Kriste Yezu ma ɓada kokwoɗ aŋga tabiyaha, andza tek me tsey dey kava ha ma ndaw ma pam 'ar ka ŋga na hay, ma da ndzafada mendzey me ndəvey kakay ana. 17A Bay ɗuhwa na ma kwoza ha, a Bay ma Bəla me memətsey tikay ana, me nəkey kakay ana, ŋga asləta na, me hasəkey bəzay ta me wezley dey ma vəla ma ŋga da mevey temere, da mevey temere. Amen!
Me kəɗey vaw hayna
18Timotey dem a ɗaw, nəkafa me tetəkey na i ma vəlaka na, kassla andza na ma guma ma ndaw sek hay, ma tsəmawa ka kah ana, ma aza, ka vəlaka gədaŋ tsoy na, kah ka slafa me kəɗey vaw hayna, 19da me pey 'ar ta me ndzey hayna. Sa na hay na, ka kəladama ba, arka na me pey 'ar ata ka zəɗey ba. 20Da walaŋ ata na na, Imemey ta Alekzaŋdre; i ka mbəkafata har ba a har ma Sataŋ, ma aza ka da mafama me tseɗey Bay'ərlam sazlay.
Currently Selected:
1 Timotey 1: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun