LEVIHEY 4
4
Mikuli ngi pula mungra
a. Mikuli ngi masay madiɗa
1Bumbulvuŋ a ɓa Moyise: 2«Ɓa Israyeleye na: Ɓimuɗuva nga ya Bumbulvuŋ, mitika jiviɗ taŋ le ngi gi ngi gi gar na, da mbur a gi le pal asi taŋ tir manja sin naŋ, yo da a ngil le purla a wuzla taŋ na, sey a ga gwat anihĩ: 3da i masay madiɗa miga mungra nah, yo mungra nah a tiri ti mizli le gar i migi malambaˀhay na, sey a so di da ya Bumbulvuŋ i gusoŋ manja hereweɗ ava ngi gi mikuli ngi pula mungra. 4A so ti gusoŋ a mbuŋ ɗu, ya Bumbulvuŋ a mizlingre guɗuk ngi zlir ti ya. Mbur vuna, a buca haŋ bac a hirnga gusoŋ, waɗ a sla ˀay naŋ daˀ a mbuŋ ɗu ya Bumbulvuŋ. 5Masay madiɗa, a wuɗ pumbus ngi gusoŋ tuwa, ar di ng'ar guɗuk ngi zlir ti ya Bumbulvuŋ. 6A ca muzuŋ haŋ yop ar pumbuso, a kuca pumbus tuwa is tarnaˀ da godo vay mapur ngir li mipal misi a mbuŋ ɗu na. 7Li gi mikuli ti urdi misi a mbuŋ ɗu, ya Bumbulvuŋ angi guɗuk ngi zlir ti ya, mivay naŋhay muyoŋ yoŋ kaɓa durumoyo masay a ga taŋ pumbuso njoffo njoffo. Yo waɗ is ngi pumbus ngi gusoŋ tuwa na, a pa gar ng'asi virzi ngi li gi mikuli mizlam zlam wãˀ misi a mizlingre guɗuk ngi zlir ti ya. 8Gusoŋ migam di mikuli ngi pula mungra tuwa, li misi mal naŋhaya gar na, a zuɓa taŋ paɗ paɗa: i mungul misirit ar gwat ar gwat ngi kwacayaya wãˀ, 9yo ɗugur dubahaya cuw taŋ, mal naŋhay ati meficek ngi ɗugur dubahay milaw law avu taŋ, waɗ guzluzluk ngi mevele torro bac ng'avu ɗugur dubahaya. 10A zuɓam di i li misi mupurla kaɓa muzuɓaka avu useˀ ngi gusoŋ ngi mikuli ngi ngiɓiˀay tuwa, joˀ masay a wura taŋ ar li gi mikuli ngi zluma gwata. 11Garak ngi gusoŋ tuwa, useˀ naŋ gar waɗ hirnga naŋ jom ati poprok naŋhaya, gwat ngi kwacaya jom ti zaya, 12na zle, is ngi useˀ ngi gusoŋ vuna wãˀ si, a bi di nga duba gala, ng'ar li manja dili, li mapaka fucu misi mal ngiˀ ngiˀ ava na, a zluma ar vu miɗiya ti musluŋvu. A zlumaka ar li mapaka fucu misi mal ngiˀ ngiˀ ava.
b. Mikili ngi jum ngi Israyeley keɗeɗe
13Da mungra nah, migaka i Israyeley keɗeɗe, tir manja sin naŋ, yo mizli taˀ gar a sinaka ta, ɓimuɗuva ngi Bumbulvuŋ mitika jiviɗ naŋ le ngi gi ngi gi gar, da a ngilam le purla ar wala taŋ na, naɓa a cam le ar mungra. 14Da taŋ misa sinaka mungra taŋ migaka na le sin so na, sey mizli taˀ gar a soko ti gusoŋ ngi gi mikuli ngi pula mungra, a ram di ng'ar guɗuk ngi zlir ti ya Bumbulvuŋ. 15Micawwa ngi wuzla mizli a bucaka haŋ a hirnga gusoŋ a mbuŋ ɗu. Joˀ a slaka ˀay naŋ daˀ a mbuŋ ɗu. 16Masay madiɗa, a wuɗ pumbus ngi gusoŋ tuwaˀ cah, ar di ng'ar guɗuk ngi zlir ti ya Bumbulvuŋ. 17Masay tuwa, a ca muzuŋ haŋ naŋ yop ar pumbus naŋ muwuɗo di tuwa. Yo a kuca pumbus tuwa is tarnaˀ da godo vay mapur misi a mbuŋ ɗu na. 18Li gi mikuli misi a mbuŋ ɗu ar guɗuk ngi zlir ti ya na, mivay naŋhay muyoŋ yoŋ kaɓa durumoyo, a ga taŋ pumbuso njoffo njoffo. Is naŋ sek wãˀ ng'asi virzi ngi li gi mikuli ngi zlum ti zlum, misi a mizlingre guɗuk ngi zlir ti ya. 19Masay a zuɓa li misi mal naŋhaya paɗ paɗ gar, a zluma taŋ ar li ngi gi mikuli. 20A gi ti useˀ ngi gusoŋ hana kaɓa naŋ migi ti useˀ ngi gusoŋ ngi mikuli ngi pula mungra nga naŋ na ya. Masay miga mezegwel ngi pula mungra le da mizli kahana na, naɓa ya Bumbulvuŋ i pula mungra taŋhaya le avra ya. 21Gusoŋ tuwa, gwatay mindiram ngi vaˀa gar na, a hila taŋ nga duba gala, dar a zluma taŋ kaɓa naŋ muzluma ngi gusoŋ mudumbuŋ tuwa ma. Mikuli ngi pula mungra ngi zigiduwo, a gaka kahana.
c. Mikuli ngi buy
22Ɓimuɗuva nga ya Bumbulvuŋ, ya Buymisemuŋ naŋ mitika jiviɗ naŋ le ngi gi ngi gi gar na, da buy a gi mungra le, a ngil le purla a wuzla taŋ tir manja sin naŋ na, naɓa a tiri le i mbur mici le ar mungra. 23Da a bigakaŋ mungra naŋ miga nah le na, sey a so di ngi vul da ya Bumbulvuŋ i bazuway manja hereweɗ ava. 24A buca haŋ bac a hirnga bazuwaya, a sla ˀay naŋ daˀ ar li maslaka ˀay ngi ginew ngi zlum ti zlum a mbuŋ ɗu. Hana i mikuli ngi pula mungra. 25Li gi mikuli ngi zluma gwata, mivay naŋhay muyoŋ yoŋ kaɓa durumoyo, masay a ca muzuŋ haŋ yop ar pumbus ngi ginew mikiɗaka ngi gi mikuli ngi pula mungra tuwa, a ga taŋ di njoffo njoffo, waɗ is naŋ sek ng'asi virzi ngi li gi mikuli ngi zluma gwata. 26Li misi malay gar na, a wura taŋ ar li gi mikuli, kaɓa magaka mikuli ngi ngiɓiˀay na ya. Masay miga mezegwel ngi pula mungra ngi buyo le na, naɓa ya Bumbulvuŋ i pulaŋ mungra naŋ le ya.
d. Mikuli ngi mbur mizlew
27Da mbur ho gar a gi mungra le, a gi gwat le purla tir manja sin naŋ a wuzla gwat ɓimuɗuva nga ya Bumbulvuŋ mitika le na, naɓa a tiri le i mbur mici le ar mungra. 28A dirba nah, da mbur a bigaŋ malambaˀ naŋ miga na le na, sey a so di ngi vulo i ˀaw mongosoŋ, manja hereweɗ ava, ngi pula mungra naŋ miga na. 29A buca haŋ bac a hirnga ginew ngi gi mikuli tuwa, a sla ˀay naŋ ar li misi purla ati maslaka ˀay ngi gi mikuli mizlam zlam na. 30Li gi mikuli ngi zluma gwata, mivay naŋhay muyoŋ yoŋ kaɓa durumoyo, masay a ca muzuŋ haŋ yop ar pumbuso, a ga taŋ di njoffo njoffo, waɗ is naŋ sek ng'asi virzi ngi li gi mikuli. 31Li misi malay gar na, a zuɓa taŋ nyaˀ nyaˀ kaɓa muzuɓaka taŋ avu ngi useˀ ngi gi mikuli ngi ngiɓiˀay na ya. Dar masay a zluma taŋ ar li gi mikuli, zĩˀĩ naŋ a tisliy mevel da ya Bumbulvuŋ. Masay miga mezegwel ngi mbur mici ar mungra na le na, naɓa ya Bumbulvuŋ i pulaŋ mungra naŋ le ya. 32Da mbur mici ar mungra a so di ngi vul ngi gi mikuli ngi pula mungra naŋ i tumuŋ na, sey tumuŋ mongoso, manja hereweɗ ava. 33A buca haŋ bac a hirnga ginew ngi mikuli ngi pula mungra tuwa, a sla ˀay naŋ ngi pula mungra ar li maslaka ˀay ngi ginew ngi gi mikuli ngi zluma gwata. 34Li gi mikuli ngi zluma gwata, mivay naŋhay muyoŋ yoŋ kaɓa durumoyo, masay a ca muzuŋ haŋ yop ar pumbuso, a ga taŋ di njoffo njoffo, waɗ is naŋ mindire sek wãˀ ng'asi virzi ngi li gi mikuli. 35Li misi malay gar na, a zuɓa taŋ nyaˀ nyaˀ, kaɓa muzuɓaka avu useˀ ngi tumuŋ migam di mikuli ngi ngiɓiˀay na ya. Joˀ masay a wura taŋ jom ati gwat ngi zum mizlam zlam wãˀ da ya Bumbulvuŋ. Masay miga mezegwel ngi pula mungra ngi mbur mici ar mungra na le na, naɓa ya Bumbulvuŋ i pulaŋ mungra naŋ le ya.
Currently Selected:
LEVIHEY 4: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.