MIGI KIITAHAY 7
7
Zedeyoŋ mulum bugawla ar Madiyanay
1Zedeyoŋ, a zilaka Yerubaˀal ma. Zedeyoŋ a slikiɗam ngi li biŋ biŋ ati mizli ngi seˀeheye, ara pam sar gweˀ a ciki miviɗiviɗi ngi yam a Harot. Amma li pi sar ngi Madiyanaya, naŋ kini tir vay muŋ, a ciki muwã More, ar li micay. 2Bumbulvuŋ a ɓa Zedeyoŋ na: «Mizli ɗikeye taŋ haɗa, y'anta vula Madiyanay asi haŋ taŋ ta. Naɓa Israyeley a sa huhumom vu, a sa ɓam: ‹I laham ti gidaŋ ndra!› 3Na zle, ɓa mizli: ‹Ko wa gar majijik ti zluwun na, anja a mi ngi hay, a bi ti muwã Galaˀat!›» Mizli durmuk cuw a wuzla taŋ, a mam ngi hay, a ndiram durmuk kuruˀu. 4Bumbulvuŋ a ɓa Zedeyoŋ na: «Mizli taŋ haɗa aruŋ na si! Ɓa taŋ ɓa a pam sar nga mi yam, i sa pura taŋ a diga. Naŋ kine, da i ɓuw le: mbur hana, aru asi ka na, a ru. Da i ɓuw le: mbur hana, aru asi ka ta na, aru ta!» 5Dar Zedeyoŋ a pi sar ti mizli nga mi yama. Bumbulvuŋ a ɓa Zedeyoŋ: «Ko wa gar masa zluva yama nga mi kaɓa kiri na, gwaha pal. Yo ko wa gar masa sa yama guɓ ti guɓ na, gwaha naŋ pala ma.» 6Mizli mazluvaka yama ti zluv nga mi ka kirey na, taŋ skat skat makir, is ngi mizli gar, a saka yama guɓ ti guɓu. 7Bumbulvuŋ a ɓa Zedeyoŋ ma: «Ya masa luhukum, yo ya masa vulukum Madiyanay asi haŋ kum na, tisi mizli miskat skat makir, muzluvaka yam nga mi ti zluv na. Anja vendeke ngi mizli a mam cek ngi hay taŋhay.» 8Mizli miskat skat makir tuwa, a hilaka gwat ngi zum mizli muwam taŋ vu ngi zuɓa jiviɗe waɗ tulum taŋhaya. Akẽh na, Zedeyoŋ a ɓa vendeke ngi Israyeleye ɓa a mam ngi hay taŋhay, a ndiram ati mizli miskat skat makir na ɓula.
Li pi sar ngi Madiyanaya, naŋ tir vay ruwuy ar li micayya.
Zedeyoŋ si na ti kileŋ a sa lum bugawla
9Ngi duvuɗ nah na, Bumbulvuŋ a ɓa Zedeyoŋ: «Slikiɗ, pi sar ng'ar walahay guɗuk ngi Madiyanaya, asi i vuluw taŋ le asi haŋ ɗiki. 10Amma ani ki ra zluwun ngi pi sar nga kiɗa vu ati taŋ, na pam sar ati gawla ɗik Pura. 11Ki sa cine taŋ maɓam a diga ayɗi. A dirba nah, kisa lum gidaŋ ngi pi sar nga diga.» Zedeyoŋ a pam sar ati gawla naŋ Pura, hã sesẽŋ avu li cici mudumbuŋ ngi sojehey. 12Mizli Madiyanay, Amalekey waɗ mizli maslikiɗam aka aka, misi tisi pas ngi miprike, t'ada sikinih ar li micaya, kweslekwesle kaɓa jaray, zlogomo taŋhay a slufam ta, taŋ haɗi kaɓa muyuŋ a mi mubuliy. 13Hirak ti Zedeyoŋ mandilo na, naɓa mbur ada, ara slufa ɓi ngi musuwun naŋ da cil naŋ, a ɓaŋ: «Cin ɗi, i musuwun ani wureˀani: I pur ɗaf mida ti hapa ngi daw giziŋ, ara putukul ar walahay guɗuk ngi madiyanaya, ara lum guɗuk a mbuŋ, ara dumbusla guɗuko, a putukusoŋ, a ndir ginjiɓaɓ mirkendel!» 14Cil naŋ tuwa, a mbiɗaŋ di: «Ko mbri, i maslalam ngi Zedeyoŋ, mangal ngi Yoˀas, mbur Israyel na si. Buymisemuŋ a vulaŋ Madiyanay ati walahay guɗuk taŋ gar asi haŋ naŋ.» 15Zedeyoŋ micina ɓi ngi musuwuno cin cin waɗ pulaˀvra naŋ si na, a huruk huruk, a dirba nah, a mi ng'ar walahay guɗuk ngi Israyeley, a til mi: «Slikiɗam! Asi Buymisemuŋ a vula walahay guɗuk ngi Madiyanaya le asi haŋ ndra.»
Madiyanay mikilam mber mber
16Zedeyoŋ a wunka mizli miskat skat makir tuwa, a wuzla makir. A wuɗuka taŋ tulumoy gar taŋ, tutuŋhoy njoŋ njoŋ kine waɗ daliivuhoy kulaˀ kulaˀ ar tutuŋhoy tuwa. 17Dar a ɓa taŋ na: «Ki sa purikiy, yo kisa suluɓoko mi ɗu! Ti ya misa ndil le a mi li pi guɗuko na, gwat ya masa ga gar na, kisa gaka ya. 18Ya ati mizli ngisi yahaya cek, i sa faka tulumo. Kumo kwana, kisa faka ndah ndah hirnga ngi li pi guɗuko gun aya, yo kisa wudam aseˀeŋ: Ar slimiɗ ngi Bumbulvuŋ ati ngi Zedeyoŋ!» 19Zedeyoŋ ati mizli miskat ngi seˀeheye, ara ndilam a mi li pi guɗuko, gweˀ ng'avu wuzla duvuɗu. A mbiɗaka mijigina li le wureˀ. Ti Zedeyoŋ ati mizli ngi seˀeheye, a hizigaka tulum kãh kãh, a wahaka tutuŋ taŋhay tuwa kpoh kpoh. 20Akẽh na, mizli mitaˀ taˀ ngay mucuw mekelemey tuwa, a faka tulumoyo, a wahaka tutuŋ taŋhaya ya. Daliivuhoyo kaw kaw ti haŋ gula, waɗ tulumoyo ti hazum, a wudam: «Ar slimiɗ ngi Bumbulvuŋ waɗ ngi Zedeyoŋ.» 21Ti taŋ mideŋ deŋ gun hirnga li pi guɗuk vuna na, mbur gar deŋ arleˀe ngbaŋ. Amma mizli a waham ngbuw ar walahaya, widi cǝruw cǝruw, ara kilam. 22Tulum miskat skat makir tuwa mazilam mi na, Bumbulvuŋ a zlira Madiyanay ar li pi sar ti guɗuko keɗeɗe, a ngumam vu ar wala taŋ tehhe a muŋ. Mizli gar ara kilam, hã sesẽŋ a Bet-Sita, jik dibiɗ nga Sereda, hã sesẽŋ a mi mizaw Abel-Mehola, gweˀ avu Tabat. 23Akẽh na, a ziloko Israyel ngi Neftaliheye gar, ngi Aserey waɗ ngi Manaseheye, a sipaka Madiyanay tuwa. 24Zedeyoŋ a slin mizli ng'ar walahay vay muwãhaya cek, a ɓaka mizli na: «Pam sar nga pa hiri da Madiyanaya, tikaka mi yamaya, zle a mi mizaw Zurdeŋ hã sesẽŋ a Bet-Bara.» 25A jaka Orep ati Zep, buy Madiyanaya cuw taŋ. A kiɗaka Orepe, a muwã Orep, yo Zepe kwana, ar li ma ɗucom gudubun a Zep. A dirba nah, a sipaka Madiyanay ava, a bukoko hirnga ngi Orep ati ngi Zepe, a ram taŋ da Zedeyoŋ a duba zaw Zurdeŋ hã sesẽŋ gweˀ avu li cici mudumbuŋ ngi sojehey.
Currently Selected:
MIGI KIITAHAY 7: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.