MIGI KIITAHAY 1
1
Israyeley mipam a ruwuy Kanaˀan
1A dirba Zozuwe mumuc na, Israyeley ara puraka Bumbulvuŋ, a ɓakaŋ na: «Masa ru dumbuŋ nga kiɗa Kanaˀanay na, i sukwi wana asi ndra ka?» 2Bumbulvuŋ a mbiɗa taŋ di: «I sukwi ngi Zuda masa ru, asi i vula hirwuyo le asi haŋ naŋ.» 3Sukwi ngi Zuda a ɓa dideˀ ngi Simeyoŋ, sukum naŋhaya na: «Soko asi ya nga hirwuy muvulikiy di, ɓa i ra kiɗaka Kanaˀanaya. A dirba nah, ya kwana, i sa ru asi ka nga hirwuy muvulukuw di.» Dar dideˀ ngi Simeyoŋhoy tuwa, a ram aseˀeˀ. 4Sukwi ngi Zuda tuwa, aru nga kiɗa vu so, Bumbulvuŋ a vula taŋ Kanaˀanay ati Perizihey asi haŋ taŋ. A kiɗam asi taŋ, mizli durmuk kuruˀ a Bezeke. 5Naŋ kine, ara lumaka buy Adoni-Bezek ar walahay Bezeke. A zlaka kiɗa vu, a lumam bugawla ar Kanaˀanay ati Periziheye. 6Buy Adoni-Bezek tuwa, a kil, amma a ɓulakaŋ, ara jakaŋ is, dar a bukokoŋ muzuŋ haŋ madiɗahay ati muzuŋ sar madiɗahaya. 7Akẽh na, buy Adoni-Bezek tuwa, a ɓi: «Buyoy kukur tarnaˀ mubukoko taŋ muzuŋ haŋ madiɗahay ati muzuŋ sar madiɗahay na, a guɗumam ngi zumo i misimi ɗu. Gwat ya miga na, Bumbulvuŋ a miy di le nga hirnga ɗu.» A ram ti Adoni-Bezeke nga Zeruzalem, a muc a diga.
8Mizli Zudahay a zlaka Zeruzaleme ngi kiɗa vu, a tiɓakaŋ. A kiɗaka mizli sunok sunok ti maslalam, a wuraka walahaya. 9A dirba nah ma na, Zudahay a ram nga kiɗa Kanaˀan misi tir vay muwã ati misi tir Ayzaw waɗ misi tir vay zugudumo. 10A dirba nah ma na, Zudahay ara kiɗaka Kanaˀan ngi Hebroŋhoyo, a zilaka Hebroŋ vuna zleˀe Kiriyat-Arba, a kiɗaka mizli Sesayay ati Ahimaŋhay waɗ Talmayaya. 11A ram baɗ ti kẽh nga kiɗa mizli Debirey, a zilaka Debir vuna zleˀe Kiriyat-Sefer. 12Kalep a ɓi na: «Mbur mikiɗa Kiriyat-Sefere le, yo a tiɓa hirwuy naŋ le na, i sa vulaŋ zuŋ ɗu Aksa na ngi ngwasa.» 13Otniyel, mangal ngi Kenas, sukum meciɗek ngi Kalep vuna, a tiɓa walahay tuwa, joˀ Kalep a vulaŋ zuŋ naŋ Aksa tuwa ngi ngwasa. 14Aksa mindil ndil a hay Otniyel tuwa si na, a pa mi da Otniyele, ɓa a cufuɗ guva avu cine naŋ Kalepe. Zuŋ tuwa mipi sar cak tir zungu si na, cine naŋ Kalep a ɓaŋ: «Ki wuɗ mike?» 15Aksa a mbiɗaŋ di: «Giy mezle takwa! Ani ki vuliy hirwuy Ayzawa le, na, vuliy vigiɗ ngi yamaya ma.» Dar Kalep a vulaŋ vigiɗ ngi yam vay muŋhoy waɗ vay ruwuyoyo.
16Mizli Kenihey, jomo ngi Moyiseye, a slikiɗoko baɗ ar walahay dibinojihey ati mizli Zudahay misi a wuzlaɓuh mikirɗak kirɗak ngi Zuda mikini tir vay ngi ruwuy Arat, ara pam a wuzla mizli.
17Mizli Zudahay a ram ati mizli Simeyoŋ, sukum taŋhaya, a kiɗaka mizli Kanaˀanay misi a Sefata, a ngizlaka walaha yakap wãˀ. A zilaka walahay nah vuna zleˀe Horma, a mbiɗeˀvra ‹diŋ.› 18Zudahay a tiɓaka walahay Gaza, Askaloŋ ati Ekroŋ waɗ prok taŋhaya. 19Bumbulvuŋ naŋ da ati Zudahaya, a tiɓaka li vay muwãhaya. Amma a tiɓaka walahay ngir li micaya gu ta, asi mota ngi vurum taŋhay i ngi ɓirihey. 20A vulaka hirwuy Hebroŋ da Kalep, kaɓa Moyis miɓa tuwa. Kalep a tiɓi di i walahay ngi ziri ngi Anakay makir. 21Mizli Benjameŋhey a ɓulaka mizli Zebusihey misi a Zeruzaleme gu ta. Zebusihey a cifam ati Benjameŋhey a Zeruzaleme hã dana aruŋ.
22Dideˀ ngi Efrayim ati ngi Manase, ziri ngi Zozefeye kwana, ara zlaka Betele ngi kiɗa vu aya, Bumbulvuŋ naŋ da ati taŋ. 23Mizli ngi hay Zozefey tuwa, a slinam nga jiɗa walahay Betele ɗagay. A zilaka Betele zleˀe Luz. 24Mijiɗa lihey tuwa, a puram mbur ara bawa tir walahaya, a ɓakaŋ: «Inga biga ndra li walahaya takwa, ɓa i sa gukuw mezleŋ.» 25Mbur tuwa, a biga taŋ di, dar dideˀ ngi Manase ati ngi Efrayimeye, a ngizlaka mizli ngir walahaya ti maslalam, amma a pulaka mbur mibiga taŋ li tuwa, a cohom ati muy naŋhaya gwaɗ naŋ. 26Mbur tuwa, aru nga ruwuy Hiti, a ɗuv walahay madiɗa taˀ, a caŋ slimiɗe Luz. Hã dana a zilaka kanah aruŋ.
27Walahay Bet-Seyaŋ, Taˀanak, Dor, Ibileyam, Megido ati prok taŋhaya, mizli ngi Manasehey a zumaka walahay tayna gu ta. Joˀ mizli Kanaˀanay a ndiram angi hirwuy nana. 28Amma ti Israyeley mulumam gidaŋ so na, a tikaka ˀay da Kanaˀanaya ti slra mutuwaˀ, amma a ɓulaka taŋ gu ta.
29Kanaˀanay mipam a Gezer na, mizli Efrayimey a ɓulaka taŋ gu ta, joˀ Kanaˀanay a ndiram a wuzla Efrayimey a Gezere.
30Kanaˀanay misi a Kitroŋ ati Nahalal na, mizli Zabuloŋhoy a ɓulaka taŋ gu ta. Kanaˀanay a ndiram a wuzla Zabuloŋhoyo, amma a vulaka taŋ slra mitakˀay ɓula.
31Mizli ngi ruwuy Ako, Sidoŋ, Aksip, Helba, Afik waɗ ngi ruwuy Rehopo, mizli Aserey a ɓulaka taŋ gu ta. 32Mizli Asereye t'ada a wuzla Kanaˀanay misi a si ruwuyo, a si a ɓulaka taŋ zleˀe ta.
33Mizli ngi Bet-Semek ati ngi Bet-Anata, mizli Neftalihey a ɓulaka taŋ gu ta, t'ada a wuzla mizli Kanaˀanay misi asi ruwuyo, amma mizli Neftalihey a vulaka taŋ slra mitakˀay le ɓula.
34Mizli Amorihey a ɓulaka mizli Daŋhaya nga muwã, ko a pulaka taŋ a poko sar ng'ar li micaya ta. 35Mizli Amorihey a ndiram a Har-Heres, a Ayaloŋ waɗ a Saˀalbime. Amma nga mbuŋ, mizli ngi hay Zozefey a waka taŋ le, a vulaka taŋ slra mitakˀay. 36Maakway ngi ruwuy Amoriheye, a zli zle a miɗingir ngi ruwuy Edom, zle a mandazlay, paɗɗa ngir ti muŋ.
Currently Selected:
MIGI KIITAHAY 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.