Efeseǁîn 4
4
Soros di ǀguiǃnâxasib
1ǁNā-amaga ta ge tita, ǃKhūb ǃnâ a ǃkhōsabeta ra ǀkhoma du, î du ǂgaihe du ge ǂgais ǃoa anu hâse ûi. 2#Kol. 3:12, 13Hoaǁae ǃgamǃgamsensa, tsamtsiǃnâ tsî ǃnūǃnâxa. ǁÎǃnābe ǀnammi ǃnâ taniǀnamgu. 3Gagab ge mā du ǀguiǃnâxasiba turaxase ǂkhîb ǃnâ ǁîǃnābe ûis ǀkha ǃkhōǀgara. 4ǀGui soros tsî ǀgui Gagab tsîn ǀguin hâ, xui-aos ge ǁnāpa ǀgui ǃâubasens ǁîs ǃoab ge Eloba ǂgai dus ǀguisa hâ. 5ǁNāpab ge ǀgui ǃKhūb, ǀgui ǂgoms tsî ǀgui ǁāǁnâs, 6ǀgui Elob tsî ǁGûb hoa khoen dib, ǁnāb hoan ǂamai hoan ǃnâ-u ra sîsen tsî hoan ǃnâ hâba hâ.
7Xaweb ge Xristuba* ǁîb ra ǂgao khami mâ-i sada di-i hoa-e ǀkhomma ge mā. 8#Psa. 68:18Xoas ra mî khami:
“ǀGapisebǀîb ge ǃapao,
ob ge ǃkhōsana ǃkhōhe hâse ǃgû-ū,
tsî khoena māde ge mā.”
9“ǁÎb ge ge ǀhomǃapa” ti mîsa tare-e ra ǂâibasen? ǁÎs ge Xristub ge ǂguro ǃhūbaib di ǃgamsib kōse ǁgôa ti ra ǂâibasen. 10ǁNāb, ǁgôaxa geb ǀguib ge ǀgapise tsî ǀhommi ǂamai ge ǃapaba, ǁîb di hâs ǀkhab nî hoaraga ǃhūbaiba ǀoaǀoase. 11ǁÎb ge ǀnî khoena māde ge mā: ǀNîna apostelse,* ǀnîna kēbo-aose, ǀnîna ǃgâiǂhôa-aose, ǀnîna ǁkhāǁkhā-aose tsî ǀnîna ǁgauǃnâ-aose. 12Xristub di sorosa ǂnubikhâis ǃaromab ge ǁîba hoaraga khoen Elob dina Xristesi ǃoabas ǃaroma ra ǁâtani. 13Hoada ge ǀunis ai ǂgoms tsî ǂans Elob Ôab* dis ǃnâ-u nî ǀguiǃnâxa. O da ge dīǀoaǀoasa kaikhoesis, Xristub disa sīǃnâ tsî ǁîb ǁkhāb khami nî ī. 14Tsî da ge ǃaruǀî ǀgôa tama, ǂgaeǂhapu-aon di ǁkhāǁkhādi xa ǃgabigu khami ra aomahe tsî mâ ǂoa-i hoa-i xa ra ǃgommahen khami. ǁÎn ge nau khoena ǁîn di ǀhôagao ǀapedi ǀkha ra tsūdī kai. 15Xawe amab ai ǃkhōǀgaipes tsî hoa khoena ǀnams ǀkha ǀgui da ge Xristub, hîa a danab di daogu hoagu ǃnâ nî ǀomkhâi. 16#Kol. 2:19ǁÎb danasis ǃnakas ge hoaraga sorosa ǀoasase a ǀhaoǀhaosa. Mâ ǃâs soros dis hoas ge ǁîs di ǀō-aisa sîsenni ǀkha nau ǃâdi di ǀomkhâisa ra hui, tsî ǁnātis ge hoaraga sorosa ǀnammi ǃnâ ra ǀomkhâi.
ǀAsa ǀgaub Xristub ǃnâ ûis dib
17ǁNā-amaga ta ge nēsa ǃKhūb ǀons ǃnâ mî tsî ra ǀhûǀgui: ǃAruǀî du ǀūben hîa harebeoǃnâ ǂâiǀgauga ūhân khami ûi tidesa. 18ǁÎn di ǂâidi ge a ǃkhae. ǁÎn di ǂgaogu di karosasib tsî ǁae tama is ǀkhan ge Eloba xu hâ ûiba xu a ǁaraǂuisa. 19ǁÎn ge taoǀû, ǁgauoǃnâ ûib ǃnâ māǁnâsen tsî sauaǃnâ tamase ǂguiǃnâgu ǃanuoǃnâ xūna gere dī.
20Xawe Xristuba du ge ǁnā ǀgaus ai ge ǂan tama hâ i! 21Amase du ge ǁîb xa ǁnâu tsî xristeǁî du ase Jesub ǃnâ hâ amaba ge ǁkhāǁkhāhe. 22#Kol. 3:9ǁNā-amaga sadu di ǀoro ûiǀgaub, ǁnā ǀoro khoesib ǂgaeǂhapuxa turagu dib xa ge hîkākāheba ǀû. 23Sadu ǂâidi tsî ǂgaogu ge gagasise ǁkhawa hoaragase nî ǀasaǀasahe, 24#Kol. 3:10; Gen. 1:26 Gā-ai.Sa. 9:3tsî du ge ǀasa khoesib, Elob īb ǃoa ge kuruheb tsî ǁîb di ǂhanu-aisib tsî ǃanusib ǃnâ ge ǂhaiǂhaiheba nî ǂgaeǂgā.
25 #
Sax. 8:16
ǁNā-amaga ǂhumiǀû, î-i mâ khoe-i hoa-e ǁî-i ǀgūkhoe-i ǀkha amaba ǃhoa, hoada a Xristub soros di uniǁae xuige. 26#Psa. 4:4Sa ǁaibab tā ǁore kai tsi tsî tās soresa ǁaixats hâ hîa ǂgâ. 27ǁGâuaba* tā ǃēsa mā. 28ǃNari-ao-e a i ǃaruǀî tā ǃnari, xawe a i ǁî-i ǃomkha ǀkha sîsen, ǂhanu-ai ǃkhōǃoas ǃaroma tsî ǂhâb ǃnâ hâ-e i nî hui ǁkhāse. 29Tā i ǁgai mî-i xare-e sa amsa xu ǂoaxa. Xawe hoaǁae ǃgâi tsî omkhâi ra mîn, ǁnâu ra khoena ǀkhaeb ase nî ībana ǃhoa. 30Tā Elob di ǃAnu Gagaba ǃoaǃoa; ǁîb ǃnâ-u du ge ores di tsēs kōse saoheba. 31Hoaraga au-ausenni, ǁaib tsî ǁaixasib, ǂkhupixasib tsî ǃkhāǃkhāgusa xu ū-oasen. 32#Kol. 3:13Xawe mâ khoe-i hoa-i ǃoa ǃgâiǂgaoxa î ǀûbagu, Elob ge Xristub ǃnâ-u ǀûba du khami.
Currently Selected:
Efeseǁîn 4: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.