Efeseǁîn 1
1
1 #
ǃNǃkh. 18:19-21; 19:1 Paulub, Elob di ǂâisa ǃoa a Xristub Jesub di apostela* xu.
Elob di khoen [Efeses ǃnâ hân,]#1:1 Nē ǃâs ge ǁîgu a ǀoro Grike xoaǁguigu tamas ka io ǀoro ǂnûiǃkhunidi ǃnâ a ǀkhai. Xristub Jesub ǀkhan ǃgaeǀhaohe hâ ûib ǃnâ ǂgomǂgomsan ǁga:
2Ab Elob sada ǁGûb tsî ǃKhūb Jesub Xristuba ǀkhommi tsî ǂkhîba mā du.
Gagasi mādi Xristub ǃnâ-u
3Ab Elob tsî ǁGûb sada ǃKhūb Jesub Xristub diba ganganhe! ǁNāb ǀhomsi ǃkhaidi ǃnâ ge mâ gagasi mā-i hoa-i ǀkha Xristub ǃnâ ǀkhae daba. 4ǃHūbaib nî ǂnubihes aiǃâs tsînab ge Eloba ǀnai ǁîb dida ase sada Xristub ǃnâ-u ge ǁhûiǂui, ǃanu tsî ūose da ǁîb aiǃâ nî hâse.
Tsî ǁîb ǀnammi ǃaromab 5ge Eloba ǀnai Jesub Xristub ǃnâ-u ǁîb ôada ase ge ǁhûiǂui da. Nēs ge ǁîb di ǃgâisib tsî ǀapesa xusa. 6ǁNā-amaga a da Eloba ǁîb di buruxa ǀkhommi, sadab ge marioǃnâse ǁîb di ǀnamǀnamsa ǀGôab ǃnâ māb ǃaroma koa. 7#Kol. 1:14Xristub di ǀaob ǃnâ-u#1:7 Xristub di ǀaob ǃnâ-u: Tamas ka io Xristub di ǀaoǁguibas ǃnâ-u. da ge ge orehe, nēs ge sada ǁoren ge ǀûbahe ti ra ǂâibasen, ǁîb di kai ǀkhommi, 8ǃnāǂamsaseb ge sada ai ǁhōǂuib ǃaroma. 9ǁNā-amagab ge Eloba ǁîb di ǃgâi ǂâiǁguib, ǀnaib ge ǁîb ǂganǃgâsa ǀapes ǃnâ Xristub ǃnâ-ub nî dīǀoaǀoase mîǁgui hâ iba ge ǂanǂan da. 10Elob di ǀapes ge hoaraga kurus ǀhommi ǃnâ tsî ǃhūbaib ai hâ xūn hoan nî ǀhaoǀhaohesa, Xristub a danase.
11ǁÎb ǃnâ-us ge Elob ge hoa xūna ǁîb ǂâis tsî ǀapes ǃoa, tsoatsoas ǃnâb ge dī mîǀguis ai ǃgaoǃgao hâse ǂnubisa. 12ǁNā-amaga da ge sada hîa ge ǂguro sada di ǃâubasensa Xristub ǃnâ ǁgui da, Elob di ǂkhaisiba nî ǃkhōǀkhā!
13Xristub ǃnâ-us ge ǂgoms ǃnâb ge Eloba amab di mîs, sadu ǃGâiǃōsib disa ǁnâu tsî ǁîb di ǃAnu Gagab mîmâis dib ǀkha sao dusa. 14Gagab ge Elob ge ǁîb khoen ǃaroma mîmâi ǁaposasib, sada ǀumis ase nî ǃkhōǃoaba. Nēs ǃnâb ge Eloba ǀoasa ǃnorasasiba ǁîb dina nî ǁapoǁapoba, ǁîb di ǂkhaisib koahes ǃoa.
Paulub di ǀgores
15Tita ge sadu di ǂgoms ǃKhūb Jesub ǃnâ du ūhâs tsî hoaraga Elob di khoen ǂama du ūhâ ǀnammi xa ǁnâu, 16o ta ge sadu ǃaroma Eloba koaǀû tama i tsî ǀûs ose ra ǀgoreba du. 17Tsî ta ge Elob sada ǃKhūb Jesub Xristub, ǂkhaisib di ǁGûba ge ǂgan, îb gā-aisib di Gagab tsî ǂhaiǂhais Eloba ǂans disa mā du. 18ǀGore ta ra, îb ǁîba sadu ǂgaogu di mûde ǃnâǃnâ, î du ǁnā ǃâubasens ǁîs ǃoab ge ǂgai dusa ǁnâuǃā. Mâtikōse gu ǁîb ǂkhaisib di ǃkhū hâ ǀkhaegu ǁîb khoenab ge mîmâibaga a buruxa, 19tsî mâtikōseb ǁîb ǀgaiba sida hîa ra ǂgom da ǃnâ ǀnōheǁoasase a kai. Nē kai ǀgaisa sîsenni ǁîb ǁkhāsib dib 20#Psa. 110:1ge Xristubab ge ǁōba xu ūkhâi-ū tsî ǀhomsi ǃkhaib ǃnâ Elob di amǀkhāb ai ǂnû kaiba. 21ǁNāpab ge Xristuba hoaraga ǀhomsi danaǂgaeǂgui-aogu, ǁkhāsigu, ǀgaigu, ǃkhūgu tsî mâ ǀons hîa ra ǂgaihes hoasa nē ǁaeb tsî ǃgoaxab tsîn ai ra gaoǂam. 22#Psa. 8:6#Kol. 1:18Elob ge hoa xūna Xristub ǂaira ǃnaka ǁgui tsî ǁîba kerkheb danab ase hoa xūn ǂamai ge ǀgapiǀgapi. 23Kerkheb ge a Xristub di soro, ǁîb di dīǀoaǀoasib ǃnâ, hoa xūna hoa ǃkhain ai ra dīǀoaǀoaba.
Currently Selected:
Efeseǁîn 1: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.