Aoǁnâ-aob 9
9
1Nē xūn hoana ôaǃnâ tsî ta ge Elob ǂhanu-ai khoen tsî gā-ain tsî hoaraga xūn ǁîn ra dīn ai ra gaosîsen ǃkhaisa ge mûǂan. ǁÎn ge Elob nî ǁîna ūǃoa tamas ka io ǂhara ǃkhaisa a ǀū. Nēn hoan ge ǃgoaxaǁaeb ǃnâ hâ. 2Hoaraga xūn ge Elob tawa a ǀgui:
ǂHanu-ain tsî ǂkhaban;
ǃanun tsî ǃanuoǃnân;
ǁnā-i ǁguiba ra-i tsî
ǁnā-i ǁguiba tama-i;
ǁnā-i hîa a ǃgâi-i
tsî ǁnā-i hîa ra ǁore-i;
ǁnā-i hîa ra nū-i
tsî ǁnā-i hîa nūsa xu ra ǁhâ-i tsîn hoana.
3Nēs ge ǁnān sores ǃnaga ra īn hoan ǃnâ a ǂkhaba:
ǀGui xū-i ǀgui-i xan ge hoana ra hāǂamhe,
tsî khoen ôan di ǂgaob ǂkhabab xa ǀoa hâ,
tsî ǁîn di ûib ǃnâ gu ǃkhausasiga ǂgaob ân ǃnâ hâ ǃkhaisa;
ǁnās khaoǃgân ge ǁō hân tawa nî sī.
4Xawe ǁnān hîa ûitsaman ge ǃâubasensa ūhâ;
ûitsama ari-i ge ǁō hâ xam-i ǃgâ-ai a ǃgâi.
5Ûitsaman ge ǁōn nî ǃkhaisa ǂan,
xawe ǁō hân ge xū-i xare-e ǀū,
ǁîn ge mādawa-am-e ūhâ tama hâ
tsîs ge ǁîn xa hâ ǂâiǂâisensa hoaragase ra ǀuruhe.
6ǁÎn ǀnammi, khāb tsî surib
tsîn ge ǀnai ge kā.
Tātsēs tsînan ge ǁîna ǁkhawa
nē ǃhūbaib ai ra ī xūn ǃnâ
ǃaruǀî ǁhao tide.
7Sa ǂû-e ǂû î sa ǂauxûi-e ā re, ǃgâiaǂgaoxa ǂgaob ǀkha, nēsab Eloba ǀnai ǂâibasenba tsi hâ xuige. 8Mâǁaeb hoab ain sa sarana ǃuri, î-i oli-i xare-e tā sa danasa xu ǂnâ. 9ǁÎsats ǀnam taras ǀkha sa harebeoǃnâ ûitsēdi, Elob ge ǃhūbaib ai mā tsi di ǃnâ ûiǀhao re. ǁNās ge sa ǀhupuǀhupusens hîats nē ǃhūbaib ai ra ǀhupuǀhupusens di mādawa-amsa. 10Mâ xū-i hîats ra sa ǃomgu ǀkha dī-i hoa-e sa ǀgaib hoab ǀkha dī re. Sîsen-i tamas ka io, ǃeream-i tamas ka io, ǂan-i tamas ka io, gā-aisi-i ǁŌhân Hâǃkhaib, ǁîb ǃoats garub tawa a ǀkhai xuige.
11ǁKhāti ta ge ǃhūbaib ais ǃkhoesa ǃgari khoe-i dis ǀguisa hî tama i,
ǃkhamsa ǀgaisa-i dis ǀguisa hî tama i,
pereba ǁnâuǃāxan dis ǀguisa hî tama i,
ǃkhūsiba gā-ain dis ǀguisa hî tama i,
ǃgâiǃgâibasensa sîsenǁkhāsiba ūhâ-i dis ǀguisa hî tama i,
ti ī ǃkhaisa ge mûǂan.
ǁAeb tsî mâsib ra ī nî xū-e ǁapoǁapo amaga.
12Mâǁaeb a sa ǁae ǃkhaisats ge a ǀū.
Anin ǂhaohe hân
tamas ka io ǁaun hîa ǂkhaba ǀûis ǃnâ ǃkhōhe hân
khamib ge khoesiba ǃâubasen tamab
hâse ǂkhabab xa ra ǂhaohe.
Gā-aisib tsî gâsib
13ǁKhāti ta ge nē aiǁgaus gā-aisib dis, kaise ge kaiba te isa ǃhūbaib ai ge mû. 14ǁNāpas ge ǂkhari ǃāros, kaise ǀoro khoen ge ǁanǃnâ hâ isa ge hâ i. Kai gao-ao-i ge hā ǁîsa xāǂgā tsî ǁîs di ǂnubiǂgoagu ǃoagu kai ǁapoǁapo-aiga ge ǂnubi. 15Xaweb ge ǁnāpa ǀgâsa, gā-ai khoeba ge hâ i, ǁîb di gā-aisib ǀkha nē ǃāsa ge ǃnoraǃnoraba. Xawe i ge khoe-i xare-e nē ǀgâsa khoeba ge ǂâihō tama hâ i. 16O ta ge ra mîba du, gā-aisib ǀgaib ǃgâ-ai a ǃgâi ǃkhaisa, nausas ge nē ǀgâsa khoeb di gā-aisiba ǃharaxūhe tsî mîdi âba ǁnâuhe tama i xawe.
17Gā-ai khoe-i di ǃnōsa mîde ǃgâs
ge gân ǀapemāǃnans ǂgaeǂgui-ao-i di ǂkhupiba ǃgâs ǃgâ-ai a ǃgâi.
18Gā-aisib ge torob di ǁâtanin ǃgâ-ai a ǃgâi,
xawe ǀgui ǁore-ao-i ge ǂgui ǃgâi xūna a hîkākā ǁkhā.
Currently Selected:
Aoǁnâ-aob 9: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.