Juan 7
7
Quisoso iinpita napopisoꞌ
1Ina quëran huaꞌquimiáchin Quisoso Cariria parti yaꞌhuërarin. Cotioroꞌsari yatëpapi niꞌton, co Cotia parti yapaꞌninhuëꞌ. 2Ina quëran aꞌna cotio niyontonpiso tahuëri naniriarin, imënamëroꞌsaꞌ pita itopisoꞌ. 3Napoaton iinpitari itaponaꞌ:
—Quëmantaꞌ Cotia parti paaton, Yosë pochin niquëꞌ imarinënquënsopita niꞌinaꞌ. 4Poꞌoana quëran maꞌsha nipatan, piyapiꞌsaꞌ co nohuitarinënquënhuëꞌ. Yosë pochin yanipatan, aꞌninquëchin niquëꞌ yaꞌipi piyapi niꞌinënquën, itopi.
5Co iinpitari tërantaꞌ natëyátërapihuëꞌ niꞌton, napotopi. Inapita nontaton, itapon:
6—Pahuanarin casoꞌ pacaꞌhuasoꞌ. Canpitaso nipirinhuëꞌ onporosona yapaꞌpatamaꞌ, noya pacoꞌ. 7Canpitasoꞌ piyapiꞌsaꞌ co noꞌhuirinënquëmahuëꞌ. Caso nipirinhuëꞌ noꞌhuirinaco. “Co noyahuëꞌ ninamaꞌ,” itërahuëso marëꞌ noꞌhuirinaco. 8Napoaton paatomaꞌ, niyontonpiso tahuëri naꞌhuëcoꞌ. Co ipora paꞌsarahuëꞌ. Pahuanarin pacaꞌhuasoꞌ, itërin.
9Ina tosahuaton, ina quëranchin yaꞌhuërarin.
Quisosontaꞌ Cotia parti paꞌninsoꞌ
10Iinpita nani paꞌpachinara, Quisosontaꞌ paꞌnin niyontonpiso tahuëri naꞌhuëcaso marëꞌ. Paꞌpirinhuëꞌ, co piyapiꞌsaꞌ niꞌtërantapaquë paꞌninhuëꞌ. Poꞌoana quëran pochin paꞌnin. 11Inaquë cotioroꞌsari yonisápirinahuëꞌ.
—¿Intohuataꞌ Quisoso ipora? tosapi.
12Nisha nisha yonquiatonaꞌ, ninontopi. “Inasoꞌ noya quëmapi,” topi aꞌnaquën. Aꞌnapitaso nipirinhuëꞌ taponaꞌ: “Co noyahuëꞌ. Yanonpintërinpoaꞌ,” topi.
13Napopirinahuëꞌ, huaꞌanoꞌsaꞌ tëꞌhuatatonaꞌ, poꞌoana quëran ninontopi.
14Simana huancana Quisoso Yosë chinotopiso pëiquë paꞌnin. Inaquë aꞌchinarin. 15Cotioroꞌsaꞌ natanahuatonaꞌ, paꞌyanpi.
—¿Onporahuatontaꞌ iso quëmapi co naꞌcon quirica nitotaponahuëꞌ, noyá nitotërin? topi.
16Napohuachinara, Quisosori itapon:
—Co caora yonquinëhuë quëran aꞌchinahuëꞌ. Tata Yosë aꞌpaimarincosoꞌ shaꞌhuitohuachincora, cantaꞌ aꞌchinarahuë. 17Cancanëma quëran huarëꞌ Yosë yanatëhuatamaꞌ, noꞌtëquën anitotarinquëmaꞌ: “Co inaora yonquinën quëran aꞌchininhuëꞌ. Yosë nanamën chachin aꞌchinarin,” tosaramaꞌ. 18Aꞌnaquënsoꞌ inahuara yonquinëna quëran aꞌchinpi. Piyapiꞌsari paꞌyatacaiso marëꞌ napopi. Casoꞌ nipirinhuëꞌ Yosëíchin yonquiato, noꞌtëquën aꞌchinahuë. Inaíchin paꞌyatacaisoꞌ yaꞌhuërin, tënahuë. Co nonpintëranquëmahuëꞌ. 19Moisësë iráca pënëntopirinhuëꞌ, co aꞌnayanquëma tërantaꞌ natëramahuëꞌ. ¿Onpoatontaꞌ yatëparamaco? itërin.
20—¡Quëmasoꞌ sopai yaꞌcoancantërinquën niꞌton, huaꞌyantëran! ¿Intaꞌ yatëparinquën? itopi.
21—Chinoto tahuëri aꞌna quëmapi anoyatërahuë. “Chinoto tahuëri nipirinhuëꞌ, co chinotërinhuëꞌ,” taꞌtomaꞌ, canpitasoꞌ paꞌyanamaꞌ. 22Niꞌcochi. Co canpita tërantaꞌ yaꞌipi chinoto tahuëri chinotëramahuëꞌ. Iráca shimashonëmaꞌ shaꞌhuitërinënquëmaꞌ marca acocasoꞌ. “Huiꞌnanpita posa tahuëritohuachinaꞌ, marca acotocoꞌ,” itërinpoaꞌ Moisësëntaꞌ. Posa tahuëri nanihuachina, marca acotëramaꞌ. Chinoto tahuëri nisapirinhuëꞌ, acotëramaꞌ. 23Chinoto tahuëri niponahuëꞌ, marca niacotëramaꞌ. Moisësë pënëntërinsoꞌ natëcaso marëꞌ naporamaꞌ. Inapoapomarahuëꞌ, ¿onpoatomataꞌ nipachin chinoto tahuëri piyapi anoyatërahuëso marëꞌ noꞌhuiramaco? 24Ama quënanamasoráchin yonquiatomaꞌ, shaꞌhuirapicosohuëꞌ. Yonquinënpoa quëran huarëꞌ Yosë niꞌsarinpoaꞌ. Ina nitotatomaꞌ, noꞌtëquën yonquicoꞌ, itërin Quisosori.
Cristo inápa quëran oꞌmarinsoꞌ
25Ina quëran yaꞌhuëhuanoꞌsari Quisoso quënanahuatonaꞌ, ninontopi.
—¿Isona quëmapi yatëpapisoꞌ ti? 26Niꞌcochi. Aꞌninquëchin aꞌchinapirinhuëꞌ, co incari tërantaꞌ noꞌhuirinhuëꞌ. Huaꞌanoꞌsarintaꞌ natëtonaꞌ: “Inasoꞌ Cristo, Yosëri aꞌpaimarinsoꞌ,” ¿tomarai huachi ti? nitopi.
27—Napochináchin, nipirinhuëꞌ Quisoso intohua quëransona huëꞌninsoꞌ nitotërëhuaꞌ. Cristoso huëꞌpachin intohua quëransona huëꞌninsoꞌ, co insonta nitotarinhuëꞌ, nitopi.
28Quisososo nipirinhuëꞌ, Yosë chinotopiso pëiquë chiníquën itaantarin:
—¿Nohuitëramaco ti? Intohua quëransoꞌ huëꞌnahuësoꞌ nitotapomarahuëꞌ, co tëhuënchachin nohuitëramacohuëꞌ. Co caora nohuanto, oꞌmarahuëꞌ. Yosë nohuanton, oꞌmarahuë. Inasoꞌ noꞌtëquën nonin. Nipirinhuëꞌ, inantaꞌ co nohuitëramahuëꞌ. 29Caso nipirinhuëꞌ ina nohuitërahuë. Inatohuaꞌ yaꞌhuëpirahuëꞌ, isoroꞌpaquë aꞌpaimarinco, itërin.
30Ina topachina, huaꞌanoꞌsari tashinan pëiquë poꞌmocaiso marëꞌ yamápirinahuëꞌ, Yosë nohuanton, co chiminacasoꞌ naniyátërarinhuëꞌ niꞌton, co mápihuëꞌ. 31Huaꞌanoꞌsarisoꞌ noꞌhuipirinahuëꞌ, naꞌa piyapiꞌsari Quisoso yanatëpi.
—Cristo oꞌmahuachin, iso quëmapi quëran naꞌcon naꞌcon taꞌmaꞌ ¿Yosë pochin niquimarëꞌpo ti? topi.
Tashinan pëiquë yapoꞌmopisoꞌ
32Ina pochin ninontopisoꞌ, parisioroꞌsaꞌ natantopi. Natantahuatonaꞌ, corto huaꞌanoꞌsarë chachin ponisiaroꞌsaꞌ aꞌpapi Quisoso macacaiso marëꞌ. 33Huëꞌpirinahuëꞌ, Quisosori itërin:
—Co huaꞌquiꞌ canpitaroꞌco yaꞌhuapohuëꞌ. Paꞌmiatarahuë. Yosë nohuanton, oꞌmarahuë. Inaquë chachin panantarahuë. 34Naporoꞌ yonípiramacohuëntaꞌ, co quënanaramacohuëꞌ. Insëquësona paꞌpato canpitasoꞌ co nanitaramahuëꞌ pacacamasoꞌ, itërin.
35Huaꞌanoꞌsa capini ninontopi.
—¿Intohuataꞌ yapaaton naporinsoꞌ? “Co quënanaramacohuëꞌ,” tënin. Nisha piyapiꞌsaꞌ yaꞌhuëpi parti aꞌnaquën cotioroꞌsaꞌ yacapatonpi. Inaquë paaton, nisha piyapiꞌsaꞌ aꞌchintapon nimara. 36¿Maꞌtaꞌ tapon naporin? “Yonípiramacohuëntaꞌ, co quënanaramacohuëꞌ. Insëquësona paꞌnahuëquë co canpitasoꞌ nanitaramahuëꞌ pacacamasoꞌ,” toconin, nitopi.
Nanpirin iꞌsha
37Pita taꞌhuantërinsoꞌ tahuëri naꞌcon naꞌcon yonquipisoꞌ niꞌton, notohuaroꞌ piyapiꞌsaꞌ niyontonpi. Naporoꞌ Quisosori huanirahuaton, chiníquën itapon:
—Yamororëso pochin cancantohuatamaꞌ, huëcoꞌ imaco sano cancantamaso marëꞌ. 38Natëhuatamaco, cancanëmaquë nanpirin iiꞌ yaꞌhuëtarinquëmaꞌ. Pancaiꞌ noꞌpa quëran pipirinso pochin cancanëmaquë yaꞌhuërápon. Yosë quiricanënquë naporin, itërin.
39Quisoso imapatëhuaꞌ, Ispirito Santo yaꞌcoancantarinpoaꞌ. Ina yonquiaton, napotërin. Naporoꞌ Quisoso co inápaquë pantayátërarinhuëꞌ. Napoaton co Ispirito Santori piyapiꞌsaꞌ noyá yaꞌcoancanchátërarinhuëꞌ. (Ina yaꞌcoancantohuachinpoaꞌ, naꞌcon catahuarinpoaꞌ noya cancantacaso marëꞌ. Ina quëran aꞌnapitantaꞌ Yosë anohuitarihuaꞌ, tapon naporin.)
Nisha nisha yonquipisoꞌ
40Quisoso naporinsoꞌ natanahuatonaꞌ, nisha nisha yonquipi.
—Tëhuënchachin isosoꞌ pënëntonaꞌpi ninarëhuasoꞌ, topi.
41—Cristo mini tënahuë, tënin aꞌnaquën.
—Co inahuëꞌ nimara. Cristo naporini co Cariria parti quëran huëꞌitonhuëꞌ. 42¿Coꞌta “Tapicoꞌ shiin niꞌton, ina ninanonënquë chachin nasitapon? Pirinquë nasitapon,” tënin Yosë quiricanënquë, topi aꞌnaquëontaꞌ.
43Ina pochin ninontatonaꞌ, nisha nisha yonquipi. 44Aꞌnaquënintaꞌ tashinan pëiquë poꞌmocaiso marëꞌ yamápirinahuëꞌ, co mápihuëꞌ.
Huaꞌanoꞌsaꞌ co natëpisohuëꞌ
45Ina marëꞌ ponisiaroꞌsaꞌ nani aꞌpapi. Huaꞌanoꞌsari chachin aꞌpapirinahuëꞌ, topinan huënantapi.
—¿Onpoatomataꞌ co manamahuëꞌ? itopi.
46—¡Co insontaꞌ ina pochin aꞌchinchininhuëꞌ! itopi.
47Ina quëran parisioroꞌsari itaponaꞌ:
—Nani nonpintërinquëmaꞌ niꞌton, ¿canpitantaꞌ natëramaꞌ paꞌ? 48Niꞌcochi. Co inso huaꞌanoꞌsari tërantaꞌ ina natërinhuëꞌ. Parisioroꞌsacointaꞌ co natëraihuëꞌ. 49Topinan piyapiꞌsariachin natëpirinahuëꞌ, inapitasoꞌ co Moisësë pënëntërinsoꞌ nitotopihuëꞌ niꞌton, Yosëri anaꞌintarin, tënai, itopi.
50Nicotimontaꞌ inaquë yaꞌhuërin, iꞌhuapoꞌ tashiꞌ Quisoso nicapon paꞌninsoꞌ. Inantaꞌ cotio huaꞌan niꞌton, itapon:
51—Moisësë pënëntërinsoꞌ natërëhuaꞌ. Nani pënëninpoaꞌ. “Ama topinan quëran anaꞌintocosohuëꞌ. Noꞌtëquën nitotaquë huarëꞌ anaꞌintacasoꞌ yaꞌhuërin,” tënin. Napoaton canpoantaꞌ Quisoso aꞌchininsoꞌ natahuanꞌ. Naporinsontaꞌ nitotahuaꞌ. Co topinan quëran anaꞌintacasoꞌ yaꞌhuërinhuëꞌ, tënahuë, itërin.
52—¿Quëmantaꞌ Cariria parti quëran huëꞌnan? Yosë quiricanën nontëquëꞌ. Pënëntonaꞌpi co onporontaꞌ Cariria quëran huëcaponhuëꞌ, itopi.
Oshahuanaꞌpi shaꞌhuirapipisoꞌ
[ 53Ina quëran piyapiꞌsaꞌ yanquëërahuatonaꞌ, yaꞌhuëpiꞌpaꞌ paantapi.
Currently Selected:
Juan 7: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.