Nm 30
30
Chirix li nayeechi'imank re li Qaawa'
1Laj Moisés ki'aatinak rik'ineb' li xjolomileb' xteepaleb' laj Israel ut kixye reheb' chi jo'ka'in:
“A'an a'in li qachaq'rab'inkil xb'aan li Qaawa': 2Wi ani xb'aanu jun jurament malaj xyeechi'i re li Qaawa' junaq k'a' re ru, ink'a' tixq'et li raatin, tixb'aanu b'an chixjunil li x'elk chi xtz'uumal re.#30,2 Dt 23,21-23; Mt 5,33.
3“Naq junaq saaj ixq li toj wank sa' rochoch li xyuwa' xyeechi'i re li Qaawa' junaq k'a' re ru malaj wank k'a'aq chik ru xk'ulub'an xb'aanunkil, 4wi li xyuwa' toxnaw li xyeechi'om malaj li k'a'aq chik ru xk'ulub'an xb'aanunkil ut maak'a' tixye re, xaqxo xyaalal li yeechi'om a'an ut xaqxo xwankil li xk'ulub'an xb'aanunkil. 5Ab'anan wi li xyuwa' sa' li kutan tixnaw wi' naq wank xyeechi'om li xrab'in malaj k'aru xk'ulub'an xb'aanunkil, ink'a' naxk'ul xch'ool, moko xaqxo ta xwankil li aatin. Li Qaawa' ink'a' tixk'e sa' ajl, xb'aan naq li yuwa'b'ej ink'a' xk'ulub'an xch'ool.
6“Mare wank ajwi' junaq saaj ixq xsumlaak chi toj wank xyeechi'om malaj k'a' chik ru xsume xb'aanunkil chiru li Qaawa'. 7Naq tixnaw li xb'eelom ut maak'a' tixye chirix, wank xwankil li yeechi'om malaj li k'aru xk'ulub'an xb'aanunkil. 8Ab'an wi sa' li kutan tixnaw wi' li b'eelomej ink'a' naxk'ul xch'ool, li ixq a'an ink'a' chik tento tixb'aanu li xyeechi'om ut li k'aru xk'ulub'an xb'aanunkil. Li Qaawa' ink'a' tixk'e sa' ajl.
9“Li xyeechi'om malaj li xk'ulub'an xb'aanunkil junaq xmalka'an malaj junaq tz'eqtaananb'il ixq, chixjunil a'an xaqxo xwankil.
10“Naq junaq ixq sumsu xyeechi'i re li Qaawa' naq tixb'aanu junaq k'a' re ru malaj xb'aanu jun jurament, 11wi taanawmanq xb'aan li xb'eelom ut maak'a' tixye chirix a'an, li yeechi'om a'an malaj li k'aru xk'ulub'an xb'aanunkil, xaqxo xwankil li aatin. 12Ab'an wi li b'eelomej ink'a' xk'ulub'an xch'ool sa' li kutan naq xrab'i a'an, maak'a' xwankil li xyeechi'om li rixaqil malaj li k'aru xk'ulub'an xb'aanunkil. Li Qaawa' ink'a' tixk'e sa' ajl, xb'aan naq ink'a' xk'ulub'a xch'ool li b'eelomej.
13“Yalaq k'a' chi yeechi'om malaj jurament chirix ayuun xk'ulub'an xb'aanunkil li ixq, li b'eelomej tixye ma truuq tixb'aanu malaj ink'a'. 14Ab'an wi wulajaq chik a'an li b'eelomej maak'a' tixye chirix li xyeechi'om malaj li k'a'aq ru xk'ulub'an xb'aanunkil li ixaqilb'ej, ch'olch'o naq li ixq tento tixb'aanu li k'aru xyeechi'i, xb'aan naq li xb'eelom maak'a' xye chirix naq xrab'i resil. 15Ab'an wi li b'eelomej moqon chik tixsach xwankil, taakanaaq sa' xb'een a'an li xmaak li rixaqil”.
16A'aneb' a'in li chaq'rab' kixye li Qaawa' re laj Moisés cho'q re li b'eelomej ut ixaqilb'ej, li yuwa'b'ej ut li xrab'in li toj saaj ut toj wank sa' rochoch li xyuwa'.
Currently Selected:
Nm 30: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.