Nm 28
28
Chirixeb' li loq'laj mayej
(Ex 29,38-46)
1Li Qaawa' kixye re laj Moisés:
2“Ye reheb' laj Israel naq wanq sa' xch'ooleb' xk'eeb'al we, tz'aqal sa' xq'ehil, linmayej ut lintzekemq jo' ajwi' link'atb'il mayej li jwal sununk xb'ook.
Li mayej nak'ehe'k rajlal kutan
3“Ye ajwi' reheb': A'anaq a'in li k'atb'il mayej teeyeechi'i re li Qaawa': rajlal kutan teemayeja ka'kab' karneer aj junq chihab', maak'a'aq reek'eb', cho'q junelik mayej. 4Jun karneer teemayeja cho'q k'atb'il mayej eq'la, ut li jun chik teemayeja ewu. 5Teeyeechi'i ajwi' numenaq kaahib' liib'r chi chaab'il k'aj yoq'inb'il rik'in kaahib' sek' chi chaab'il aseeyt. 6A'an a'in li junelik mayej kiyeechi'imank chalen chaq junxil sa' li tzuul Sinaí, jo' sununkil mayej nawulak chiru li Qaawa'. 7Ut li b'iin taamayejamanq rochb'eeneb' li karneer, a'an kaaka sek' chi aseeyt cho'q re li junjunq chi karneer. Li b'iin ak xk'aho'k, teehoy sa' li Loq'laj Muheb'aal, sa' xk'ab'a' li Qaawa'. 8Li xkab' karneer teemayeja ewu: teeyeechi'i jo' tz'aqal li xb'een karneer, rochb'een li k'aj ut li b'iin. A'anaq jun k'atb'il mayej sununk xb'ook chiru li Qaawa'.
Li mayej nak'ehe'k sa' li hilob'aal kutan
9“Sa' li hilob'aal kutan taamayeja wiib' li karneer aj junq chihab', chi maak'a'aq reek'eb'. Taak'e ajwi' waqxaqib' liib'r chi k'aj yoq'inb'ilaq rik'in aseeyt, rochb'een li xb'iinul. 10Li k'atb'il mayej a'in taak'eemanq sa' li hilob'aal kutan. Taayeechi'i ajwi' li mayej nakayeechi'i rajlal kutan rochb'een li xb'iinul.#28,9-10 Mt 12,5.
Li mayej nak'ehe'k sa' li xb'een kutan re li po
11“Sa' xtiklajik li junq po teeyeechi'i jun k'atb'il mayej chiru li Qaawa': wiib' saaj wakax, jun chib'aat ut wuqub' karneer aj junq chihab', chi maak'a'aq reek'eb'. 12Teeyeechi'i ajwi' kab'laju liib'r chi k'aj yoq'inb'il rik'in aseeyt, rochb'een li junjunq chi mayej saaj wakax; lajeeb' liib'r chi k'aj yoq'inb'il rik'in aseeyt, rochb'een li junjunq chi mayej chib'aat; 13waqxaqib' liib'r chi k'aj yoq'inb'il rik'in aseeyt, rochb'een li junjunq chi mayej karneer. A'anaq jun k'atb'il mayej sununk xb'ook chiru li Qaawa'. 14Li b'iin li taamayejamanq, a'an kab'taqlaju sek' cho'q re li junjunq chi saaj wakax, kab'taqlaju sek' cho'q re li junjunq chi chib'aat ut kab'taqlaju sek' cho'q re li junjunq chi karneer. A'anaq a'in li k'atb'il mayej taak'eemanq rajlal po chiru li junq chihab'. 15Taayeechi'i ajwi' re li Qaawa', chirix li kuyuk maak, jun teelom chib'aat rochb'een li b'iin ut li k'atb'il mayej nakak'e rajlal kutan.
Li mayej nak'ehe'k sa' li Paswa
(Lv 23,5-8)
16“Sa' li kaalaju xb'e li xb'een po taaninq'ehimanq li xPaswa li Qaawa',#28,16 Ex 12,1-13; Dt 16,1-2. 17ut sa' li o'laju xb'e ajwi' li po a'an teeb'aanu jun chik li ninq'e. Chiru wuqub' kutan teetzeka li wa ink'a' yuub'il.#28,17-25 Ex 12,14-20; 23,15; 34,18; Dt 16,3-8. 18Sa' li xb'een li kutan taawanq li loq'laj ch'utam sa' xk'ab'a' li Qaawa'. Maajun taak'anjelaq. 19Teeyeechi'i a'in re li Qaawa' cho'q k'atb'il mayej sununk xb'ook: wiib' saaj wakax, jun chib'aat ut wuqub' chi karneer li maak'a'aq reek'eb', 20rochb'eeneb' kab'laju liib'r chi k'aj yoq'inb'il rik'in aseeyt cho'q re li junjunq chi saaj wakax, waqxaqib' liib'r cho'q re li junjunq chi chib'aat, 21kaaka liib'r cho'q re li junjunq chi karneer 22ut jun teelom chib'aat cho'q mayej chirix li maak, re xtojb'al rix leemaak. 23Teeyeechi'i chixjunil a'in rochb'een li k'atb'il mayej nak'eemank eq'la re li kutan junjunq. 24Jo'ka'in teeb'aanu chiru li wuqub' kutan. A'anaq li loq'laj tzekemq, li k'atb'il mayej sununk xb'ook chiru li Qaawa': taamayejamanq rochb'een li b'iin ut li k'atb'il mayej nekeyeechi'i rajlal kutan. 25Sa' xwuq li kutan teeb'aanu leeloq'laj ch'utam ut maajun eere taak'anjelaq.
Li mayej nak'ehe'k sa' xNinq'eheb' li Xamaan
(Lv 23,9-22)
26“Sa' li kutan teemayeja wi' li xb'een ru leerawimq chiru li Qaawa', sa' xNinq'eheb' li Xamaan,#28,26-31 Ex 23,16; 34,22; Dt 16,9-12. taawanq leeloq'laj ch'utam. Maajun taak'anjelaq. 27Teeyeechi'i re li Qaawa' wiib' saaj wakax, jun chib'aat ut wuqub' chi karneer, aj junq chihab'eb', cho'q k'atb'il mayej sununk xb'ook. 28Rochb'een li junjunq chi saaj wakax taamayejamanq kab'taqlaju liib'r chi k'aj yoq'inb'il rik'in aseeyt, lajeeb' liib'r re li chib'aat 29ut waqxaqib' liib'r cho'q re li junjunq chi karneer; 30ut jun teelom chib'aat cho'q mayej chirix li maak, re xtojb'al rix leemaak. 31Teeb'aanu a'in ut teek'e ajwi' li k'atb'il mayej li xaqxo xb'aanunkil rajlal kutan, rochb'een li k'aj yoq'inb'il rik'in li aseeyt ut li b'iin.
Currently Selected:
Nm 28: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.