Stg 3
3
Li ru'uj qaq'
1Ex was wiitz'in, meesik' chejunilex li wank cho'q aj tzolonel, xb'aan naq nekenaw naq q'axal kaw chik taaraqmanq aatin sa' qab'een laa'o aj tzolonel. 2Chiqajunilo naab'al sut nokoot'ane'k. Wi wank junaq ink'a' nat'ane'k rik'in raatin, a'an jun li winq tz'aqal re ru; taaruhanq ajwi' chi xb'eresinkil li xjunxaqalil.
3Chek'e reetal, laa'o naqak'e sa' reheb' li kawaay li xxaqab'ankil, re naq te'ab'inq chiqu, ut chi jo'kan naqab'eresi li xjunxaqalileb'. 4Jo'kaneb' ajwi' li jukub': us ta q'axal ninqeb' ut wanqeb' kawil iq' neke'tiikisink reheb', ab'an wank jun li ch'ina ch'iich' nab'eresink reheb', a' yaal b'ar naraj laj ch'e'ol re.
5Jo'kan ajwi' li ru'uj qaq': a'an jun xch'ina cha'al li qajunxaqalil, ab'an naxnima rib' rik'in xninqal ru b'aanuhom. K'ehomaq reetal li ch'ina xam: k'ajo' xnimal li k'iche' naxk'at! 6Ut li ru'uj qaq' a'an xam, a'an jun ruuchich'och' nujenaq chi maa'usilal. Li ru'uj qaq' a'an jun xcha'al li qatz'ejwal, ab'an nokooxtz'ajni chi qajunxaqalil; naxloch xxamlel chixjunil li qayu'am chalen sa' xtiklajik, rik'in jun xam nachalk chaq sa' li xb'alb'a.
7Chixjunil li jar paay chi josq' aj xul, jo' ajwi' eb' li neke'rupupik sa' choxa, eb' li k'anti' ut li wankeb' sa' palaw, naru xtuulanob'resinkileb', ut neke'tuulanob'resiik ajwi' xb'aan li winq. 8A'ut li ru'uj aq'ej maajun winq natuulanob'resink re; li ru'uj aq'ej a'an ink'a' us, junelik nasaapan, numtajenaq xmay chi kamsink.
9Chiru a'an naqa'usilaatina li Qaawa', li Yuwa'b'ej Yos, ut chiru ajwi' a'an naqamajewaheb' li qas qiitz'in li yoob'tesinb'ileb' cho'q xjalam u li Yos. 10Sa' jun chi ehej na'elk chaq li usilaatinank ut li majewank. Ex was wiitz'in, a'in ink'a' naru taawanq chi jo'kan.
11Li xyo'leb'aal ha' ma naxk'e tab'i' chaq li ki'il ha' ut k'ahil ha' sa' jun chi releb'aal? 12Ex was wiitz'in, li xche'el li iig ma taaruuchin tab'i' li aseytuun? Ut li xtoonal li uub' ma taaruuchin tab'i' li iig? Jo'kan ajwi' li k'ahil ha' ink'a' naru tixk'e ki'il ha'.
Li chaab'il na'leb' li nachalk chaq rik'in li Yos
13Ma wank junaq sa' eeyanq wank xna'leb' ut xk'a'uxl? Chixk'utaq rik'in xtiikilal li xyu'am, rik'ineb' li xb'aanuhom uxb'ileb' sa' tuulanil jo' li wank xna'leb'. 14Ab'anan wi q'axal aj kaqalex ut nekexsemsotk chi wech'ink k'a'uxl, meenimob'resi eerib' chi xyeeb'al naq wank eena'leb'. Rik'in xb'aanunkil a'an nekesutq'isi li yaal cho'q tik'ti'. 15Li na'leb' a'an moko taqe'q ta nachalk chaq, xna'leb' b'an li ruuchich'och'; maawa' xna'leb' li xMusiq' li Yos, xna'leb' b'an laj tza.
16B'ar nawank li kaqalik ut wech'ink, aran wank li po'ok ib' ut yalaq k'a' chik chi maa'usilal. 17A'ut li naxk'anjela ru li choxahil na'leb', a'an saq ru li xyu'am; jo'kan ajwi' naxk'e xch'ool chirix li tuqtuukilal, li chaab'ilal, li tuulanil. K'ajo' aj uxtaan ut xiikileb' li xchaab'il b'aanuhom! Maawa' aj ka'pak'al u ut juntaq'eet narileb' chixjunil. 18Eb' laj k'anjel chirix li tuqtuukil usilal neke'awk sa' tuqtuukil usilal ut te'xxok li tiikil ch'oolej.
Currently Selected:
Stg 3: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.