Ez 1
1
1Ak oob' kutan xtiklajik li xka po re li lajeeb' xka'k'aal chihab', naq wankin chaq chire li nima' Kebar, sa' xyanqeb' li ke'k'ame'k aran Babilonia,#1,1-3 2 R 24,10-16; 2 Kr 36,9-10. kitehonk li choxa chiwu#1,1-3 Ap 19,11. ut kiwil ru li Yos sa' moy u. 2Ak oob' chihab' li xq'axonik laj Johakín sa' li tenamit Babilonia, sa' li oob' kutan xb'e li po 3naq li Qaawa' ki'aatinak rik'in laj Esekiel, laj tij, ralal laj Busí, aran chire li nima' Kebar, sa' xteepal Kaldeha.
Li xk'ojarib'aal li Qaawa'
Li Qaawa' kixk'e li ruq' sa' inb'een. 4Toja' naq kiwil jun kaqsut-iq' kichalk chaq sa' xjayal releb'l iq'. Kiwil ajwi' jun nimla choql yo wi' chi elk li xam ut nareplotk li raq'kaaq sa' xyi a'an. 5Kiwil ajwi' kaahib' li yo'yookeb' sa' xyi li xam, chanchaneb' li winq li rilob'aaleb'.#1,5 Ex 25,18-22; 1 R 6,23-28; Ap 4,6. 6Li junjunq wank kaapak'al li ruheb' ut kaaka xxik'eb'. 7Juntiikaj li xtzelekeb' ut xalxo li roqeb', kama' li roqeb' li wakax, ut nalemtz'unk jo' li q'anch'iich' ch'ajob'resinb'il chi us. 8Sa' xkaapak'alil, rub'el li xxik'eb', li junjunq wank li ruq'eb', chanchan ruq'eb' li poyanam. Wankeb' ru ut xxik'eb' sa' xkaapak'alil li junjunq. 9Li xxik'eb' neke'xk'ul rib' chirib'ileb' rib'; ut naq neke'b'eek, ink'a' neke'q'ajk chirix, junes chiruheb' b'an neke'xik. 10Eb' li kaahib' a'an jo'ka'in neke'ilok: chiru, neke'ilok jo'eb' li winq; sa' li xnimeb', neke'ilok jo'eb' li kaqkoj; sa'eb' li xtz'e, neke'ilok jo'eb' li wakax, ut chirixeb', neke'ilok jo'eb' li t'iw.#1,10 Ez 10,14; Ap 4,7. 11Hirho li xxik'eb' taqe'q; wiib' neke'xk'ul rib' ut li wiib' chik neke'xtz'ap wi' rib'eb'. 12Junes chiruheb' neke'xik, b'arwi' neke'k'ame'k xb'aan li xmusiq' li Qaawa', ut ink'a' neke'q'ajk chirixeb'.
13Eb' li yo'yookeb' a'an, chanchaneb' ru xam,#1,13 Ap 4,5. jo'keb' li lochlookil xam nachalk naxik sa' xyanqeb'; nareprotk li xam ut sa' xyi a'an na'elk chaq raq'kaaq. 14Ut eb' li yo'yookeb' neke'chalk neke'xik kama'eb' wi' li raq'kaaq.
15Naq yookin chi rilb'al li kaahib' chi yo'yookeb', kink'e reetal naq wank junjunq li sursu chi xk'atq li junjunq. 16Junqtaq'eet rilb'al li kaahib' chi sursu, ut neke'lemtz'unk jo' li lemtz'il pek. Junqtaq'eet neke'ilok, chanchan ta wi' ch'ikch'o li junjunq sa' li jun chik. 17Chi jo'ka'in naru neke'xik sa' xkaapak'alil, chi ink'a' neke'q'ajk chirixeb'. 18Jwal ninq xterameb' li sursu ut xiwajeleb' rilb'al; chi xkaahichaleb' neke'lemtz'unk chi junqre.#1,18 Ap 4,8. 19Naq li yo'yookeb' neke'b'eek, neke'xik ajwi' eb' li sursu; ut naq neke'taqe'k sa' iq', neke'taqe'k ajwi' eb' li sursu. 20Eb' li yo'yookeb' neke'xik b'arwi' neke'k'ame'k xb'aan xmusiq' li Yos, rochb'eeneb' li sursu, xb'aan naq xcha'aleb' ajwi' rib' rik'ineb' a'an. 21Naq eb' li yo'yookeb' neke'b'eek, neke'xik ajwi' eb' li sursu; naq neke'xaqliik eb' a'an, neke'xaqliik ajwi' li sursu. Naq neke'taqe'k sa' iq', eb' li sursu neke'taqe'k ajwi', xb'aan naq li xmusiq' eb' li yo'yookeb' wank sa'eb' li sursu.#1,15-21 Ez 10,9-13.
22Sa' xb'eeneb' a'an wank jun li kupku kama' jun li lem jwal nalemtz'unk.#1,22 Ap 4,6. 23Ut rub'el li kupku a'an, hirho li xxik'eb' ut neke'xk'ul rib' chirib'il rib'. Ut rik'ineb' li xxik' wiib' chik neke'xtz'ap rib'eb'.
24Toja' naq kiwab'i naq neke'xik'ank, chanchan wi' xyaab' li b'ut'iha',#1,24 Ap 1,4-15; 19,6. kama' wi' li xyaab' xkux li Nimajwal Yos. Naq neke'b'eek, xiwajel li xyaab'eb', kama' xyaab' jun nimla yalok; naq neke'xaqliik, neke'xkub'si li xxik'eb'. 25Ut ki'ab'imank jun xyaab' kuxej ki'elk chaq sa' li kupku li wank sa' xb'eeneb'.
26Sa' xb'een li kupku a'an kiwil naq wank jun k'ojarib'aal yiib'anb'il rik'in li pek safiro xk'ab'a', ut sa' a'an k'ojk'o jun kama' li winq.#1,26 Ez 10,1; Ap 4,2-3. 27Chalen sa' xyiitoq toj taqe'q, nalemtz'unk jo' li q'anch'iich' sutsu chi xam; ut chalen sa' xyiitoq toj taq'a, kiwil jo' jun xam#1,27 Ez 8,2. li naxkutanob'resi li xsutam, 28chanchan wi' li kaqlaaq' naq naxk'ut rib' sa' li choql sa' li hab'alq'e. Jo'ka'in naq kixk'ut rib' chiwu li xloq'al li Qaawa'. Ut naq kiwil a'an, kinwiq'laak, kinhupub' wib' chiru ch'och' ut kiwab'i jun xyaab' kuxej yo chi waatinankil.
Currently Selected:
Ez 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.