2 S 5
5
Laj David kixaqab'aak cho'q awab'ej re Israel
(1 Kr 11,1-3)
1Chixjunileb' li xteepal laj Israel ke'wulak Hebrón rik'in laj David ut ke'xye re: “K'e reetal, laa'o qacha'al qib', qakik'el qib'. 2Chalen chaq junxil naq laj Saúl a'an chaq li na'awab'ejink qe, laa'at xtz'aqal jolomil Israel sa' li yalok. Ut xyehom li Qaawa' naq laa'at tatb'eresinq re li xtenamit ut laa'ataq aj k'amol xb'eheb' laj Israel”.
3Jo'kan naq chixjunileb' li xcheekal winqul laj Israel ke'wulak Hebrón rik'in li awab'ej, ut laj David kixk'uub' jun sumwank rik'ineb' aran Hebrón, chiru li Qaawa', ut kiyule'k cho'q awab'ej re Israel. 4Lajeeb' xka'k'aal chihab' wank re laj David naq ki'ok cho'q awab'ej, ut ka'k'aal chihab' ki'awab'ejink. 5Aran Hebrón ki'awab'ejink wuqub' chihab' rik'in waqib' po; moqon chik sa' li tenamit Jerusalén kitaqlank sa' xb'eeneb' chixjunileb' laj Israel ut laj Judá chiru oxlaju xka'k'aal chihab'.#5,4-5 1 R 2,11; 1 Kr 3,4; 29,27.
Laj David kixchap li kawub'resinb'il ochoch re Sión
(1 Kr 11,4-9)
6Li awab'ej ut eb' li winq li wankeb' rochb'een koheb' Jerusalén chi yalok rik'ineb' laj Jebús#5,6 Jos 15,63; Jue 1,21. li wankeb' sa' li na'ajej a'an. Ut eb' a'in ke'xye re laj David: “Laa'at ink'a' truuq tat-ok arin, xb'aan naq a'atqeb' li mutz' ut li yeq roqeb' tz'aqaleb' charamb'al” (naraj naxye naq laj David ink'a' truuq taa'ok aran). 7Ab'anan laj David ki'ok sa' li kawub'resinb'il ochoch re Sión, li xTenamit laj David chik naxk'ab'a'in. 8Sa' li kutan a'an kixye laj David: “Li ani taa'ajoq xq'axb'al ruheb' laj Jebús, tento taa'ok chaq wan wi' li roqha' rub'el ch'och' ut tixkamsiheb' li mutz' ut li yeq roqeb' li jwal nintz'eqtaanaheb'”. Jo'kan naq nayeemank: “Chi moko li yeq chi moko li mutz' taa'ok sa' rochoch li Qaawa'”. 9Laj David kixk'ojob' xna'aj sa' li kawub'resinb'il kab'l, ut xTenamit laj David kixk'e cho'q xk'ab'a'. Kixwaklesi jun li suttz'ak chi xsutam, chalen chaq Miló toj chisa'.
Laj Jirán kixtaqlaheb' aj esil rik'in laj David
(1 Kr 14,1-2)
10Chi jo'kan li xwankil laj David yo chi nimank, xb'aan naq li Qaawa', li Nimajwal Yos, wank rik'in. 11Laj Jirán, awab'ej re Tiro, kixtaqlaheb' aj esil rik'in laj David; kixtaqlaheb' ajwi' aj peech' ut aj tz'ak, ke'xk'am chaab'il che', yaw xk'ab'a', ut ke'xyiib' li rochoch laj David. 12Toja' naq laj David kixtaw ru naq li Qaawa', a'an li kik'ojob'ank re cho'q awab'ej re Israel ut kixnimob'resi xwankil li x'awab'ejihom sa' xk'ab'a' Israel li xtenamit.
Eb' li ralal laj David li ke'yo'laak Jerusalén
(1 Kr 3,5-9; 14,3-7)
13Chirix naq ki'elk chaq Hebrón ut kixtaw xna'aj Jerusalén, laj David kixk'am naab'aleb' chik li rixaqil, ut eb' li ixq li ke'wank wi' ralal ut xrab'in. 14A'aneb' a'in li xk'ab'a'eb' li ralal li ke'yo'laak Jerusalén: laj Samúa, laj Sobab, laj Natán, laj Salomón, 15laj Ibjar, laj Elisúa, laj Néfej, laj Jafía, 16laj Elisamá, laj Bahalyadá ut laj Elifélet.
Laj David kixq'ax ru eb' laj Filistea
(1 Kr 14,8-17)
17Naq eb' laj Filistea ke'rab'i resil naq laj David kiyule'k cho'q awab'ej re Israel, koheb' chixjunileb' chi xsik'b'al. Ab'an laj David kixnaw a'an ut kikub'eek sa' li kawub'resinb'il kab'l. 18Toja' naq ke'wulak eb' laj Filistea ut ke'xtzolob' rib' sa' li xTaq'ahil Refaín. 19Jo'kan naq laj David kipatz'ok re li Qaawa' ut kixye: “Ma tinxik chi yalok rik'ineb' laj Filistea? Ma taaq'axtesiheb' sa' wuq'?”, chan. Ut li Qaawa' kixye re: “Ayu xb'aan naq relik chi yaal naq tinq'axtesiheb' sa' laawuq'”, chan.
20Naq laj David kiwulak Bahal-Perasín, kixq'ax ruheb': “Li Qaawa' xte inb'e, jo' xb'e ha', sa' xyanqeb' li xik' neke'ilok we”, chan. Jo'kan naq Bahal-Perasín kixk'ab'a'in li na'ajej a'an. 21Aran eb' laj Filistea ke'xkanab'eb' li xyoseb', ut laj David ut eb' li wankeb' rochb'een ke'xk'ameb'.
22Ab'an jun sut chik eb' laj Filistea koheb' chi yalok ut ke'xtzolob' rib' sa' li xTaq'ahil Refaín. 23Laj David kipatz'ok wi' chik re li Qaawa' ut a'in kixye re: “Matxik chi yalok chiruheb', k'e b'an q'oot chirixeb' ut jilon chi xk'atqeb' wankeb' wi' li che' bálsamo xk'ab'a'eb'. 24Ut naq taawab'i chanchan xyaab' yokb' sa' ru'uj li bálsamo, kut aawib' sa' xb'eeneb' xb'aan naq a'an reetalil naq laa'in aj k'amol b'e chawu re xsachb'al ruheb' laj puub' aj Filistea”.
25Laj David kixb'aanu li chaq'rab'inb'il wi' xb'aan li Qaawa', ut kixq'ax ruheb' laj Filistea chalen chaq Gabahón toj sa' rokeb'aal Késer.
Currently Selected:
2 S 5: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.