2 S 3
3
1Najt ke'yalok eb' laj Saúl ut eb' laj David. Ab'anan laj David yo chi nimank xwankil ut li xjunkab'al laj Saúl kilajk xmetz'ew.
Sa' li tenamit Hebrón ke'yo'laak ralal laj David
(1 Kr 3,1-4)
2Laj David ke'wank ralal aran Hebrón: li xb'een ralal a'an laj Amnón, xyum lix Ajinohán aj Jisrehel; 3li xkab', a'an laj Kilab', xyum lix Abigahil li kiwank cho'q rixaqil laj Nabal aj Karmeel; li rox, a'an laj Absalón, xyum lix Mahaká, xrab'in laj Talmay, awab'ej re Jesur; 4li xka, a'an laj Adonías, xyum lix Jakit; li ro', a'an laj Sefatías, xyum lix Abital; 5li xwaq, a'an laj Itrehán, xyum lix Eklá, jun chik li rixaqil laj David. A'aneb' a'in li ralal laj David li ke'yo'laak aran Hebrón.
Laj Abner kixkanab' xjunes laj Isbahal
6Naq eb' laj Saúl ut eb' laj David yookeb' chi yalok, laj Abner kinimank xwankil sa' xyanqeb' li neke'okenk chirix laj Saúl. 7Laj Saúl wanjenaq chaq rik'in jun li ixq, xRispá xk'ab'a', xrab'in laj Ayá, ut a'in kik'ame'k xb'aan laj Abner cho'q xkomoneb' li rixaqil. Jo'kan naq laj Isbahal kixye re laj Abner: “K'a'ut naq xatwank rik'in jun li ixq re linyuwa'?”, chan.
8K'ajo' naq kichalk xjosq'il laj Abner xb'aan raatin laj Isbahal, ut kixsume: “Ma laa'in tab'i' tz'i' li yo chi k'anjelak chiruheb' laj Judá? Chalen toj anaqwan laa'in tiik linch'ool chi k'anjelak chiru li xjunkab'al laj Saúl laayuwa', chiruheb' li rech'alal ut eb' li x'amiiw, ut ink'a' xatinq'axtesi sa' ruq' laj David. Ut anaqwan nikinaaq'us yal sa' xk'ab'a' li ixq a'in? 9Chinxrahob'tesiiq li Qaawa' chi q'axal ra wi ink'a' tinb'aanu re laj David jo' chanru li xyeechi'om li Qaawa' re a'an, 10naq trisi xwankileb' li ralal xk'ajol laj Saúl#3,10 1 S 15,28. ut tixk'ojob' xwankil laj David sa' xb'een Israel ut Judá, chalen chaq Dan toj Berseba”.
11Laj Isbahal maak'a' chik kixye xb'aan xxiw chiru laj Abner. 12Ut laj Abner kixtaqlaheb' aj esil re xyeeb'al re laj David: “Ani laj eechal re li tenamit? K'e aawib' sa' aatin wik'in ut laa'in tatintenq'a re naq chixjunileb' laj Israel te'okenq chawix”.
13Kichaq'ok laj David: “Us, tink'e wib' sa' aatin aawik'in. Ab'anan nintz'aama chawu, maak'ut aawib' chiwu wi ink'a' taak'am chaq lix Mikal, xrab'in laj Saúl, naq tatchalq chi wula'aninkil”. 14Chirix chik a'an laj David kixtaqlaheb' aj esil re xyeeb'al re laj Isbahal, ralal laj Saúl: “Q'ajsi we lix Mikal, li wixaqil li kiweechani rik'in o'k'aal (100) chi xtz'uumal xtz'ejwaleb' laj Filistea”.#3,14 1 S 18,27.
15Toja' naq laj Isbahal kixtaqla xmaq'b'al lix Mikal chiru laj Paltiel li xb'eelom, ralal laj Layis. 16Ab'anan laj Paltiel koho chirix li rixaqil, k'ajo' naq yo chi yaab'ak, ut kixtaaqe toj Bajurín. Aran laj Abner kixye re laj Paltiel naq taasutq'iiq sa' rochoch; ut a'an kisutq'iik.
17Moqon chik laj Abner kiraatinaheb' li xcheekal winqul laj Israel; kixye reheb': “Chalen chaq junxil laa'ex nekeraj naq laj David taa'ok che'awab'ejinkil. 18Us b'i', xtaw xq'ehil. B'aanuhomaq anaqwan, xb'aan naq xyehom li Qaawa' re laj David laj k'anjel chiru naq, sa' xk'ab'a' a'an, tixkoleb' li xtenamit Israel sa' ruq'eb' laj Filistea jo' ajwi' sa' ruq'eb' chixjunileb' li xik' neke'ilok reheb'”.
19Laj Abner kiraatinaheb' ajwi' laj Benjamín ut chirix a'an koho Hebrón re xyeeb'al re laj David li k'aru ke'kanaak wi' eb' laj Israel ut chixjunileb' laj Benjamín. 20Kiwulak Hebrón rik'in laj David, rochb'eeneb' junmay chi winq. Ut laj David kixb'aanu jun ninq'e sa' xk'ab'a' laj Abner ut eb' li wankeb' rochb'een. 21Chirix chik a'an laj Abner kixye re laj David: “Anaqwan tinxik ut toxinch'utub' chixjunileb' laj Israel re naq te'okenq chawix laa'at laj eechal we. Te'xk'uub' jun sumwank aawik'in ut laa'ataq li x'awab'ejeb' jo' chanru nakawaj”. Ut laj David kixchaq'rab'i laj Abner, li koho sa' tuqtuukilal.
Laj Johab kixkamsi laj Abner
22Moqon chik laj Johab, rochb'eeneb' laj k'anjel chiru laj David, ke'sutq'iik chi yalok ut ke'xk'am chaq naab'al li reechanihomeb'. Maa'ani chik laj Abner rik'in laj David aran Hebrón, xb'aan naq ak xchaq'rab'iik xb'aan li awab'ej sa' tuqtuukil usilal. 23Naq ke'wulak laj Johab ut chixjunileb' laj puub' li wankeb' rochb'een, ke'rab'i resil naq laj Abner, ralal laj Ner, kiwulak chi rilb'al li awab'ej, kichaq'rab'iik sa' xyaalal ut xikenaq wi' chik chi sa sa' xch'ool. 24Toja' naq laj Johab ki'ok wan wi' li awab'ej ut kixye: “K'aru xab'aanu? Laj Abner xk'ulunk aawik'in ut laa'at xakanab' chi xik! 25Ma ink'a' nakanaw naq re aab'alaq'inkil naq xk'ulunk laj Abner, ralal laj Ner? A'an yal re xk'eeb'al reetal laayehom laab'aanuhom naq xk'ulunk”, chan.
26Ka'ajwi' ki'elk laj Johab rik'in laj David naq kixtaqlaheb' aj esil chi xsik'b'al laj Abner, chi ink'a' naxnaw li awab'ej. Ke'xtaw wan wi' li kumb'-ha' re Sirá ut ke'xk'am chaq. 27Naq laj Abner kisutq'iik chaq Hebrón, laj Johab kixk'am xjunes chire li rokeb'aal li tenamit chanchan wi' ok re chi xyeeb'al junaq aatin sa' hasb', ut aran ajwi' kixtiq' rub'el xsa' ut kixkamsi re xtojb'al rix xkamik laj Asahel li riitz'in.
28Tikto laj David kixnaw a'an ut kixye: “Li Qaawa' naxnaw naq laa'in ut li wankeb' rub'el linwankil maak'a' qamaak chi junajwa chirix xkamik laj Abner, ralal laj Ner. 29Kanaaq li maak a'in sa' xb'een laj Johab ut sa' xb'een chixjunil li xjunkab'al. Chiwanq junelik sa' xyanqeb' li ralal xk'ajol li ani nakub'eek xkik'el, li saqlep rix, li yeq roq, li taakamsiiq chi ch'iich' malaj li maak'a'aq xwa”, chan laj David.
30Laj Johab ut laj Abisay li riitz'in ke'xkamsi laj Abner xb'aan naq a'in kixkamsi laj Asahel li riitz'ineb' sa' li yalok aran Gabahón.
31Chirix chik a'an laj David kixye re laj Johab ut reheb' chixjunileb' laj puub' li wankeb' rochb'een: “Q'ichomaq leeraq', k'ehomaq saak cherix ut yaab'anqex chirix laj Abner”, chan. Laj David yo chi xik chirix li kamenaq 32naq a'in kimuqe'k aran Hebrón. Li awab'ej kixjap re chi yaab'ak chi xk'atq li muqleb'aal kamenaq, ut jo'kan ajwi' kixb'aanu chixjunil li tenamit. 33Toja' naq li awab'ej kixb'icha li rahil b'ich a'in chirix laj Abner:
“K'a'ut naq xatkamk, a Abner,
chi maak'a' xyaalal?
34Moko b'ak'b'ookeb' ta laawuq'
chi moko chapchookeb' laawoq rik'in kareen.
Xatkamk jo' li nakamsiik
xb'aaneb' li ink'a' useb' xna'leb'”, chan.
Ut chixjunileb' li poyanam ke'ok wi' chik chi yaab'ak chirix laj Abner. 35Moqon chixjunileb' koheb' chi relajinkil laj David chi wa'ak naq toj kutan chi us, ab'an laj David kixye sa' jurament: “A' taxaq li Yos tinxk'e chi xtojb'al linmaak chi q'axal ra, wi tinyal wa malaj k'a'aq chik ru naq toj maji' naxulq'i li saq'e”, chan.
36Chixjunileb' li tenamit ke'xnaw a'an ut ke'xk'ulub'an xch'ool. Jo'ch'inal jo'nimal kixb'aanu li awab'ej, kiwulak chiruheb'. 37Sa' li kutan a'an chixjunileb' li tenamit ut chixjunileb' laj Israel ke'xk'e reetal naq li awab'ej ink'a' x'okenk chi xkamsinkil laj Abner, ralal laj Ner.
38Chirix chik a'an li awab'ej kixye reheb' laj k'anjel chiru: “Ma ink'a' nekenaw naq sa' li kutan a'in xkamk jun li tz'aqal aj k'amol b'e, jun xnimal ru aj jolominel sa' xyanqeb' laj Israel? 39Jo'kan naq, us ta laa'in li awab'ej sik'b'il ru xb'aan li Yos, ab'anan naweek'a naq maak'a' inmetz'ew: q'axal kaweb' rib' chiwu eb' li xyum lix Sarbia. Li Qaawa' chik'ehoq reeqaj re li ani xb'aanunk re li maa'usilal a'in!”, chan.
Currently Selected:
2 S 3: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.