2 R 19
19
Eb' laj Judá ke'kole'k sa' ruq' laj Senakerib
(2 Kr 32,20-23; Is 37,1-38)
1Naq laj Esekías li awab'ej kirab'i li kiyehe'k re, kixq'ich li raq', kixtiqib' rib' rik'in q'es ruhil t'ikr ut koho sa' rochoch li Qaawa'. 2Tikto kixtaqla laj Eliakín, laj ilol re li rochoch, jo'wi' laj Sebná laj tz'iib' ut eb' li xtiixilaleb' laj tij, chixjunileb' b'atb'ookeb' sa' q'es ruhil t'ikr, 3re xyeeb'al re li propeet Isaías,#19,3 Is 1,1. ralal laj Amós: “Jo'ka'in xye chaq laj Esekías: «Li kutan a'in, a'an xkutankil li rahil ch'oolej, li rahob'tesiik ut li xutaanal! Chanchano li ixq wank sa' yu'am, ab'anan maak'a' xmetz'ew chi alank. 4Mare li Qaawa' laaYos xrab'i li raatin li xnimal ru aj k'anjel li xtaqlaak chaq xb'aan laj Senakerib, li awab'ej re Asiria, re xhob'b'al li yo'yookil Yos. Jwal us raj naq li Qaawa' laaYos tixk'e taxaq chi xtojb'al xmaak li ani xhob'ok re. Laa'at tijon chiru li Qaawa' chirixeb' laj Israel li toj yo'yookeb'!»”.
5Naq eb' li xtaql laj Esekías li awab'ej ke'wulak rik'in laj Isaías, 6kiyehe'k reheb': “Yehomaq re laj eechal eere chi jo'ka'in: «Jo'ka'in xye li Qaawa': Matxiwak xb'aaneb' li aatin xawab'i, a' linhob'b'al xe'xb'aanu laj k'anjel chiru li awab'ej re Asiria. 7Ok we chi roksinkil rik'in jun musiq'ej re xpo'b'al li xch'ool: taarab'i jun esil ut taasutq'iiq wi' chik sa' li xtenamit chi junpaat, ut aran toxkamsiiq chi ch'iich'»”.
8Naq li xnimal ru aj k'anjel aj Asiria kirab'i resil naq li awab'ej re Asiria maa'ani chik sa' li tenamit Lakix, koho ut kixtaw li awab'ej yo chi yalok rik'ineb' laj Libná. 9Aran laj Senakerib kirab'i resil naq laj Tirhaká, awab'ej re Etiopía, yo chi xik chi yalok rik'ineb' laj Asiria. Toja' naq kixtaqlaheb' wi' chik li xtaql rik'in laj Esekías ut kixye reheb': 10“Jo'ka'in teeye re laj Esekías, awab'ej re Judá: «Matxb'alaq'i laaYos li k'ojk'o wi' laach'ool, rik'in xyeeb'al naq li tenamit Jerusalén ink'a' taat'ane'q sa' ruq' li awab'ej re Asiria. 11Laa'at nakanaw chi us chanru naq eb' li awab'ej re Asiria ke'xsach ruheb' chi junajwa chixjunileb' li tenamit. Ma tatkole'q laa'at naq nakak'oxla? 12Ma ke'kole'k tab'i' xb'aaneb' li xyos eb' li tenamit li ke'sache'k ru xb'aaneb' linxe'toonil yuwa': a' li tenamit Gosán, Harán, Résef ut eb' laj Eden li wankeb' sa' xteepal Telasar? 13B'ar chik wankeb' li awab'ej re Jamat, li awab'ej re Arpad, li awab'ej re Lahir, jo' ajwi' li awab'ej re Separbáhin, li awab'ej re Hená ut li awab'ej re Abá?»”.
14Laj Esekías kixk'ul li hu chi ruq'eb' li xtaql li awab'ej ut kiril xsa'. Chirix chik a'an koho sa' rochoch li Yos, kixte li hu chiru li Qaawa' 15ut kitijok chi jo'ka'in:
“At Qaawa', xYosat laj Israel, li wank laak'ojarib'aal sa' xb'eeneb' li kerubín,#19,15 Ex 25,18-22; 1 S 4,4; Sal 80,2; Is 37,16; Ez 1,26-28. ka'ajwi' laa'at li xYos chixjunileb' li awab'ejihom sa' ruuchich'och'! Laa'at katk'uub'ank re li choxach'och'! 16Ab'i, at Qaawa', ut k'e reetal; chate xsa' laawu ut chawil li neke'xb'aanu. Ab'i li aatin li xtaqla chaq xyeeb'al laj Senakerib, re aamajewankil laa'at li yo'yookil Yos. 17Relik chi yaal, at Qaawa', naq eb' li awab'ej re Asiria ke'xsach ruheb' li tenamit, 18ke'xk'ati li xyoseb' ut ke'xjuk'i, xb'aan naq moko yoseb' ta ajwi', yal yiib'anb'ileb' b'an rik'in ruq'eb' li winq, a'aneb' che' ut pek. 19A'ut anaqwan, at Qaawa', at qaYos, choohaakol chiruheb', xnawaqeb' chixjunileb' li x'awab'ejihom li ruuchich'och' naq ka'ajwi' laa'at li Qaawa', li tz'aqal Yos”.
20Toja' naq laj Isaías, ralal laj Amós, kixtaqla xyeeb'al re laj Esekías li aatin a'in: “Jo'ka'in xye li Qaawa', xYos laj Israel: «Ak xwab'i laatij chirix laj Senakerib, awab'ej re Asiria»”.
21A'an a'in li aatin kixye li Qaawa' chirix li awab'ej re Asiria:
“Nakate'xtz'eqtaana, nakate'xse'e eb' laj Sión
jo' naxb'aanu junaq tuq'ixq;
neke'xb'anb'ani li xjolomeb' li rixqilal aj Jerusalén.
22Ani xahob' ut xak'e sa' xutaan?
Ani li xataqsi laawaatin sa' xb'een ut xakub'si xwankil?
A' li xSantil Yos laj Israel!
23Chi xtz'uumal reheb' laataql xahob' li Qaawa' ut xaye sa' laach'ool:
«Rik'ineb' link'iila b'eleb'aal ch'iich' xintaqe'k sa' xb'eeneb' li tzuul,
toj sa' xb'een Líbano li ink'a' naru wi' wulak.
Xint'aneb' li yaw ninqeb' xteram ut eb' li xchaq'alil ru saqichaj,
xinwulak toj sa' xjolom tzuul, sa' li raxraxil ru k'iche'.
24Laa'in xinb'ekok ha' ut xin'uk'ak ha' sa' jalanil tenamit;
rub'el woq xe'chaqik chixjunileb' li nima' re Ejiipt».
25Ma maji' nakanaw a'an?
Ak ink'uub'ahom chaq chalen junxil;
chalen chaq q'e kutan inkawresihom chaq,
ut anaqwan yookin chi xb'aanunkil.
Xatinxaqab' chi xsachb'al ruheb' li tenamit
ut po'lem xkanab'ankileb' li kaw sutinb'ileb' chi suttz'ak.
26Eb' li xpoyanamil, maak'a'eb' xmetz'ew,
neke'siksotk ut k'ajo'eb' xxiw,
chanchaneb' li ichaj, li rax pim,
malaj li pim nayo'laak sa' xb'een li ochoch
ut nachaqik chi junpaat xb'aan xtiqwal li saq'e.
27Ninnaw chixjunil li nakab'aanu,
naq nakat-elk ut nakat-ok sa' laawochoch,
ut k'ajo' laajosq'il wik'in.
28Laa'at xatjosq'o'k wik'in ut xwab'i naq xatq'etq'eto'k chiwu;
jo'kan naq tinram laab'e, tintz'ap laawe
ut tatinsutq'isi sa' laab'e b'arwi' xatchalk chaq”.
Chirix chik a'an laj Isaías kixye re laj Esekías:
29“A'an a'in li eetalil cho'q aawe, reetalil li k'aru taak'ulmanq.
Chiru li chihab' a'in teetzeka ru li awimq teetaw chi ink'a' awb'il.
Chiru li jun chik teetzeka li namoqk xjunes;
ut sa' rox li chihab' tex'awq ut texq'oloq,
tex'awoq uub' ut teek'ux li ru.
30Eb' li te'kole'q sa' xyanqeb' li ralal xk'ajol laj Judá ut ink'a' te'kamq,
jo'kaqeb' li che':
cham te'xe'enq ut toj taqe'q te'uuchinq.
31Xb'aan naq sa' li tenamit Jerusalén wanqeb' te'kole'q;
toj wanqeb' li te'kanaaq sa' li tzuul Sión.
Li xnimal xrahom li Qaawa' taab'aanunq re a'an.
32Xyehom li Qaawa' chirix li awab'ej re Asiria:
«Ink'a' taa'ok sa' li tenamit a'in, ink'a' tixkut junaq ral simaj,
ink'a' taaxik sa' li tenamit chi wanq xkolb'al rib',
ink'a' tixyiib' xtaqleb'aal re taa'ok sa' li tenamit.
33Taasutq'iiq b'an sa' li b'e xchalk wi',
ink'a' taa'ok sa' li tenamit a'in, chan li Qaawa'.
34Laa'in tinkoloq re li tenamit a'in, re naq ink'a' taasache'q,
sa' xk'ab'a' linloq'al ut xb'aan xraab'al laj David laj k'anjel chiwu»”.
35Ut chiru ajwi' li q'oqyink a'an li x'ánjel li Qaawa' kiwulak sa' xmuheb'aaleb' laj Asiria ut kixkamsi oob' xlajeek'aal mil chi winq (185,000) ut naq kisaqewk, ak kamenaqeb' chik chixjunileb'.#19,35 Eklo 48,21. 36Toja' naq laj Senakerib, li awab'ej re Asiria, kixmoch eb' li xmuheb'aal ut kisutq'iik sa' li tenamit Nínive, ut aran kikanaak. 37Ut naq wiq'wo chi loq'onink sa' rochoch li yos Nisrok, ke'wulak laj Adramélek ut laj Saréser, li ralaleb', ut ke'xkamsi chi ch'iich'. Tikto ke'elelik ut koheb' sa' li tenamit Ararat chi xkolb'al rib'eb'; ut a' chik laj Asaradón, li ralal, kikanaak chi awab'ejink sa' xna'aj.
Currently Selected:
2 R 19: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.