Njéga̰g-Rəwtaje 20
20
Israɛlje rɔ gə Bḛjamije
1Un kudee Dan saar teḛ Beer-Seba gə ɓee gə́ Galaad lé Israɛlje lai d’unda loo teḛ ndá koso-dəwje mbo̰ dɔ na̰ to gə́ dəw gə́ kára ba bèe no̰ Njesigənea̰’g loo gə́ Mispa. 2Mbaije lə koso-dəwje lai ləm, gə ginkoji Israɛlje lai ləm tɔ d’aw d’aar loo-mbo̰-dɔ-na̰’d lə koso-dəwje lə Ala, dəwje tɔl-dɔg-loo-tɔl-sɔ (400.000) gə́ to bao-rɔje, deḛ to njérɔ gə kiambasje. 3Bḛjamije d’oo to gə́ Israɛlje d’ḭ d’aw Mispa ya.
Israɛlje lé dəji dee pana: Maji kar sí ula síje, see néra gə́ majel gə́ togə́bè lé teḛ to gə́ ban ɓa bèe wa.
4Togə́bè ɓa dəw gə́ to Ləbi gə́ to ŋgaw denéje gə́ tɔlee lé un ta pa pana: Ma jeḛ gə gamla-dené ləm lé n’reeje Gibea gə́ wɔji dɔ Bḛjamije mba to keneŋ. 5Dəwje gə́ Gibea lé d’ḭ gə mba ra səm majel ndá deḛ gugu dɔ kəi gə́ m’to keneŋ loondul’g lé sub. Deḛ d’wɔji-kwɔji tɔlm ndá deḛ mbula gamla-dené ləm saar d’aree wəi. 6Gelee gə́ nee ɓa ma m’un ne yoo gamla-dené ləm lé m’tḭja m’ŋgaŋ ne dana ɗuguru-ɗuguru m’ula ne dɔ naŋg gə́ to né ka̰ Israɛl lé bura, mbata deḛ ra né gə́ to kḛji gə́ to nékɔb mee ɓee’d gə́ Israɛl ya. 7Aa ooje, seḭ Israɛlje ya lai síje nee, wɔjije na̰ ta ndá unje ndu sí dɔ né gə́ kəm ra’g.
8Dəwje bura ya d’ḭ to gə́ dəw gə́ kára ba bèe pana: Dəw kára kara mbuna sí’g a tel kaw mee kəi-kubu’g ləa el ləm, a tel kaw mee kəi’g ləa el ləm tɔ. 9Aa ooje, ɓasinè lé né gə́ j’a ra gə Gibea ɓa nee: J’a kɔr rɔ kaw rɔ səa. J’a kaw gə nékwɔji lé gə́ to asəna gə téḛ bèe. 10Mbuna ginkoji Israɛlje’g lai lé j’a mbər diŋgamje dɔg dan njé gə́ tɔl’g (100) ləm, gə diŋgamje tɔl (100) dan njé gə́ tɔl-dɔg’d (1.000) ləma, gə diŋgamje tɔl-dɔg (1.000) dan njé gə́ tɔl-dɔg-loo-dɔg’d (10.000) ləm tɔ, deḛ neelé d’a kaw saŋg nésɔ mbata lə njérɔje mba kar loo gə́ d’a tel mba̰ ndá njérɔje lé d’a ra gə njé gə́ Gibea gə́ wɔji dɔ Bḛjamije gə goo nérɔkul gə́ deḛ ra mee ɓee gə́ Israɛl lé ya.
11Togə́bè ɓa diŋgamje lai gə́ Israɛl lé mbo̰ dɔ na̰ d’ɔm na̰’d sad asəna gə dəw gə́ kára ba bèe d’aw rɔ gə́ ɓee-boo neelé. 12Ginkojije lə Israɛlje lé d’ula dəwje rɔ gel-bɔje’g lə Bḛjami lai d’ar dee dəji dee pana: See néra gə́ to kḛji gə́ ban ɓa seḭ raje mbuna sí’g bèe wa. 13Arje njéra nékɔbje neelé teḛ mee ɓee gə́ Gibea gə́ raga mba kar sí n’tɔl deeje mba kɔr ne né gə́ majel mbuna Israɛlje’g.
Nɛ Bḛjamije ndigi koo ta lə ŋgako̰ deeje gə́ to Israɛlje lé el. 14Bḛjamije d’ḭ mee ɓee-boo’g lə dee mbo̰ dɔ na̰ Gibea mba kaw rɔ gə Israɛlje lé. 15Mee ndəa gə́ Bḛjamije d’ḭ mee ɓee-booje’g lə dee mbo̰ dɔ na̰ lé bula lə njérɔ gə kiambasje gə́ tura dee mee ndəa’g neelé d’as diŋgamje tɔl-dɔg-loo rɔ-joo giree-misa̰ (26.000) lal tura bao-rɔje tɔl siri (700) gə́ siŋga dee to kɔgərɔ-kɔgərɔ gə́ d’isi Gibea lé. 16Mbuna koso-dəwje’g lai neelé bao-rɔje gə́ siŋga dee to kɔgərɔ-kɔgərɔ gə́ to gelje lé d’as tɔl-siri (700). Deḛ lai neelé d’askəm kila kɔri-ər gə yɔroŋ-dooje kwɔji ne yiŋga dɔ dəw ya kara d’a lalee el. 17Deḛ tura bula lə diŋgamje gə́ Israɛl, lal tura Bḛjamije ndá njérɔ gə kiambasje d’as tɔl-dɔg-loo-tɔl-sɔ (400.000).
18Togə́bè ɓa Israɛlje d’ḭ d’aw Betel dəji ne Ala pana: See na̰ ɓa mbuna sí’g a kaw kédé no̰ sí’g mba kaw rɔ gə Bḛjamije lé wa. Njesigənea̰ ila dee keneŋ pana: Judaje ɓa d’a kaw kédé. 19Loo gə́ loo àr yərərə ndá Israɛlje d’ḭ d’aw d’wa loo-si dee mbɔr Gibea’g dəb. 20Israɛlje d’aw kəm dee gə́ kédé mba rɔ gə Bḛjamije, tɔɓəi deḛ d’wa dɔ gɔl rɔ dee rɔ sə dee no̰ Gibea’g tɔ. 21Bḛjamije d’unda loo mee ɓee gə́ Gibea teḛ ndá mee ndəa’g neelé deḛ tɔl Israɛlje tɔl-dɔg-loo rɔ-joo giree-joo (22.000) d’ɔm dee naŋg rib-rib. 22Israɛlje lé d’ula diŋgam meḛ na̰’d ndá tel d’wa dɔ gɔl rɔ dee gogo gə rɔ mee loo gə́ d’aar keneŋ mee ndɔ gə́ dɔtar’g lé. 23Ndá Israɛlje d’ḭ d’aw no̰ no̰ Njesigənea̰’g saar kàrkemetag. Deḛ dəji Njesigənea̰ pana: See to kəm kar sí j’awje gə́ kédé mba rɔ gə Bḛjamije gə́ to ŋgako̰ síje lé ya ɓəi wa. Njesigənea̰ ila dee keneŋ pana: Awje aw rɔje sə dee ya. 24Israɛlje lé d’aw kəm dee gə́ kédé d’aw rɔ gə Bḛjamije mee ndɔ gə́ njekɔm’g joo’g lé. 25Mee ndəa gən lé Bḛjamije d’unda loo mee ɓee gə́ Gibea teḛ d’aw d’iŋga dee rɔ sə dee ndá tɔl Israɛl tɔl-dɔg-loo dɔg-giree-jinaijoo (18.000) d’ɔm dee naŋg rib-rib ya, to deḛ lai gə́ to njérɔ gə́ kiambasje. 26Israɛlje lai gə koso-dəwje bura d’ḭ d’aw Betel, deḛ no̰ ləm, d’isi lée’g neelé no̰ Njesigənea̰’g d’ɔg ne meḛ dee ɓoo saar kàrkemetag ləma, d’inja nékinjaməs gə́ ka̰ roo gə nékinjaməs gə́ wɔji dɔ kɔm na̰’d no̰ Njesigənea̰’g ləm tɔ. 27Tɔɓəi Israɛlje d’aw dəji Njesigənea̰ ta mbata lé neelé ɓa sa̰duk-manrɔ lə Ala to keneŋ 28ndá mee ndəa’g neelé Pines, ŋgolə Eləajar, gə́ to ŋgoka Aaro̰ ɓa to njekaar no̰ Ala’g lé. Deḛ dəjee pana: See j’a kɔr rɔ kaw rɔ gə Bḛjamije gə́ to ŋgako̰ síje lé əsé j’a kaw el wa. Njesigənea̰ ila dee keneŋ pana: Awje ya mbata bèlè m’a kuba dee kya̰ dee ji sí’g ŋga.
29Yen ŋga Israɛlje d’um loo gugu ne dɔ ɓee gə́ Gibea sub. 30Israɛlje d’ḭ d’aw gə mba rɔ gə Bḛjamije mee ndɔ gə́ njekɔm’g munda’g ndá d’wa dɔ gɔl rɔ dee gə rɔ ta ɓee gə́ Gibea to gə́ deḛ ra kédé lé tɔ. 31Bḛjamije d’unda loo teḛ d’aw d’iŋga Israɛlje ndá deḛ lé ra dee gə goso d’ar dee d’ya̰ ɓee-boo gə kuree lam. Ndá d’un kudu tɔl njé gə́ na̰je mbuna Israɛlje’g to gə́ tɔl dee ne kédé lé tɔ-rəwje’d gə́ yee gə́ kára aw gə́ Betel ləm, yee gə́ raŋg aw gə́ Gibea ləm tɔ ndá deḛ tɔl Israɛlje as rɔ-munda jén bèe. 32Bḛjamije pana: Aa ooje, jeḛ n’dum dɔ dee to gə́ kédé lé ya ɓəi! Nɛ Israɛlje pana: Ar sí j’aḭje no̰ dee’g ndɔr deeje ne j’ar dee d’ya̰ ɓee-boo gə kuree ɓa mba teḛ ne sə dee rəwje gə́ wala ɓəi. 33Israɛlje lai d’ya̰ loo-kaar dee ndá d’aw d’wa dɔ gɔl rɔ dee Baal-Tamar, yen ŋga ɓa njékumlooje gə́ to Israɛlje lé d’ḭ ɓugu na̰ dɔ dee’g mee loo gə́ Maaré-Gibea. 34Dəwje tɔl-dɔg-loo-dɔg (10.000) gə́ mbər dee mbuna Israɛlje’g bura lé ree ta Gibea’g. Rɔ lé nuŋga kəd-kəd nɛ kəm Bḛjamije inja dɔ tuji-boo’d gə́ a gə teḛ dɔ dee’g lé el. 35Njesigənea̰ dum dɔ Bḛjamije no̰ Israɛlje’g, ar mee ndəa gən lé Israɛlje tɔl Bḛjamije tɔl-dɔg-loo rɔ-joo giree-mi gə dɔ dee tɔl (25.100), to deḛ gə́ njérɔ gə kiambasje. 36Bḛjamije d’oo to gə́ Israɛlje dum dɔ dee ya. Israɛlje lé d’ya̰ loo lam d’ar Bḛjamije mbata d’ɔm meḛ dee dɔ deḛ gə́ d’um loo no̰ Gibea’g lé. 37Dəwje gə́ njékumlooje lé d’ḭ kalaŋ tɔ na̰ pɔs-pɔs dɔ njé gə́ Gibea’g, tɔɓəi d’aw kəm deḛ gə́ kédé tɔl ne dəwje lai gə́ mee ɓee-boo’g neelé gə kiambas. 38Nétɔji gə́ to mbuna Israɛlje’g lé to sa pər gə́ deḛ gə́ njékumlooje d’a karee uba dɔ ɓee-boo’g sururu ɓa. 39Njérɔje lə Israɛl tel gir dee wagəsa d’ila d’ar rɔ. Bḛjamije tɔl dee as rɔ-munda jén bèe mba̰ ndá deḛ pana: Tɔgərɔ, j’a gə tɔl dee to gə́ jeḛ n’tɔl dee gə rɔ kédé lé ya ɓəi! 40Nɛ pər un kudu kuba dɔ ɓee-boo’g sururu. Ndá Bḛjamije go̰ loo gə́ goo dee’g gogo, tɔɓəi aa oo, mee ɓee-boo gə́ bura lé ndo̰ pərje teḛ keneŋ bilim-bilim gə́ dara. 41Yen ŋga Israɛlje tel kəm dee gə́ kédé ndá deḛ gə́ to Bḛjamije lé ɓəl unda dee badə gaŋg dee mbata tuji-boo gə́ a gə kiŋga dee gə́ deḛ d’oo lé. 42Deḛ tel gir dee d’ila d’ar Israɛlje ndá deḛ d’aḭ gə rəw gə́ dɔdilaloo’g. Nɛ njérɔje lé d’un dɔ gɔl dee lad-lad ləm, deḛ tɔl deḛ gə́ d’unda loo mee ɓee-booje’g teḛ lé ləm tɔ. 43Deḛ d’aḭ dɔ Bḛjamije sub, tuba dee ləm, d’aw tal dee naŋg ras-ras loo gə́ deḛ ndigi kwa rɔ dee keneŋ saar teḛ ta Gibea’g par gə́ loo gə́ kàr uba keneŋ ləm tɔ. 44Togə́bè ɓa bao-rɔje lə Bḛjamije d’wəi ne as dəwje tɔl-dɔg-loo dɔg-giree-jinaijoo (18.000). 45Mbuna deḛ gə́ tel gir dee mba kaḭ par gə́ dɔdilaloo’g mbɔr mbal gə́ Rimo̰ lé Israɛlje d’ar dee d’udu tɔl-dɔg-loo-mi (5.000) kag-rəwje’g, deḛ tuba dee saar teḛ ne Gideom ndá deḛ tɔl dee keneŋ tɔl-dɔg-loo-joo (2.000). 46Bula lə Bḛjamije gə́ to bao-rɔje gə́ njérɔ gə kiambasje gə́ d’udu mee ndəa gən lé d’as dəwje tɔl-dɔg-loo rɔ-joo giree-mi (25.000). 47Dəwje tɔl-misa̰ (600) gə́ tel gir dee d’aḭ par gə́ dɔdilaloo gə́ to mbɔr mbal gə́ Rimo̰ lé d’isi keneŋ as naḭ sɔ. 48Israɛlje tel ree rɔ Bḛjamije’g ndá deḛ tɔl dee gə kiambas, un kudee dɔ dəw-mee-ɓeeje’g saar teḛ ne dɔ nékulje’g ləm, deḛ tuji ne né gə́ rara gə́ d’iŋga ləm tɔ. Deḛ tula pər dɔ ɓee-booje’g lai gə́ to keneŋ tɔ.
Currently Selected:
Njéga̰g-Rəwtaje 20: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.