2 Njé gə́ Kɔrḭtə 6
6
Jeḛ n’toje kəi-Ala
1To gə́ jeḛ n’ra kula na̰’d gə Ala lé jeḛ ndəji sí mba kar noji lə Ala gə́ seḭ iŋgaje lé a teleeje gə́ né gə́ gə mḭdé ba el. 2Mbata yeḛ pana:
Ndɔ noji’g ɓa ma m’oo ndu sí ləm,
Ndɔ kaji’g lé ma m’la sə sí ya ləm tɔ.
Aa ooje, ɓasinè lé to ndɔ noji lé ya ŋga.
Aa ooje ɓasinè lé to ndɔ kaji lé ya tɔ .
3Jeḛ n’ra né kára kara gə́ mba kila ne dəw kag el gə mba kar ta wa ne dɔ kula ra sí el. 4Nɛ jeḛ n’ra néje ɓəd-ɓəd gə mba kar dəwje gər sí ne gə́ kuraje lə Ala. J’ila meḛ sí po̰-po̰ dan némeeko̰’g ləm, gə dan né gə́ riŋga sí’g ləma, gə dan néurti’g ləm tɔ. 5Deḛ kunda sí ləm, d’ɔm sí daŋgai keneŋ ləm, koso-dəwje d’ḭ sə sí ləm, j’ula rɔ sí ndubu loo-kulaje’g ləm, j’ɔg rɔ sí dɔ ɓi’g ləma, nésɔ lal sí ləm tɔ . 6Néra sí riba dɔ sí ar dee d’oo sí gə́ kuraje lə Ala n’to ne dəwje gə́ àr ləm, jeḛ j’inja paw ləm, j’ila meḛ sí dɔ maree’g po̰-po̰ ləm, jeḛ n’to njémeemajije ləm, Ndilmeenda to meḛ sí’g ləm, jeḛ j’unda dəwje dan kəm sí’g ləm, 7j’ila mber kankəmta ləm, siŋgamoŋ lə sí ḭ rɔ Ala’g ləma, meekarabasur lé to gə́ nérɔje gə́ ka̰ rɔ ne, gə ka̰ ko̰ ne rɔ sí ləm tɔ. 8Jeḛ nduba rɔ sí kà əsé jeḛ ndəm rɔ sí səm ləm, deḛ ɓar ri sí gə́ majee əsé majel ləm tɔ. Jeḛ n’to kankəm dəwje ya nɛ deḛ d’oo sí gə́ njéŋgɔmje ləm, 9ri sí ɓar yaa̰ nɛ deḛ gər sí gə́ dəwje el ləm, j’aw kɔgərɔ-kɔgərɔ nɛ d’oo sí gə́ yɔ-dəwje ləm, deḛ d’oo sí gə́ dəwje gə́ ta yoo wa dɔ dee nɛ jeḛ j’wəi ne el ɓəi ləm, 10jeḛ lé meḛ sí lel sí ta-ta nɛ deḛ d’oo sí gə́ dəwje gə́ d’isi dan némeeko̰’g ləm, jeḛ n’to gə́ njékṵda dəwje bula maji’gje nɛ deḛ d’oo sí gə́ njéndooje ləma, jeḛ j’isi gə néje lai ji sí’g nɛ deḛ d’oo sí gə́ dəwje gə́ né godo ji dee’g ləm tɔ.
11Ǝi, seḭ dəwje gə́ Kɔrḭtə, jeḛ n’lɔm sə sí dɔ ta el ləm, j’ɔr taje lai gə́ to meḛ sí’g j’ula sí ləm tɔ. 12Jeḛ lé meḛ sí to tag gə mba kwa sí gə́ rɔ sí’g nɛ seḭ lé meḛ sí-seḭ ɓa udu dɔ síjeḛ’g. 13Ma m’ula sí ta asəna gə ŋganəmje bèe. Maji kar sí raje sə sí né godə maree’g arje meḛ sí to ne tag gə mba síjeḛ gə́ rɔ sí’g ya.
14Yije rɔ sí kər-kər gə́ rɔ njépole-magəje’g el. See meekarabasur a kɔr kura gə nékalta wa. See lookàr a kwa boa gə loondul ra wa. 15See Kristi a kɔm na̰’d gə Belial’g loo gə́ ra wa. Majikojije gə deḛ gə́ to gə́ majikojije el lé see né lə dee a to gə́ na̰’d loo gə́ ra wa. 16See kəi-Ala gə ka̰ magə-poleje yḛ̀, d’a kula dee na̰’d loo gə́ ra wa. Mbata jeḛ lé n’to kəi-Ala gə́ njesikəmba to gə́ Ala nja pa pana:
N’a sí keneŋ ləm, n’a njaa mbuna dee’g ləm tɔ,
N’a to Ala lə dee ləm, deḛ nja kara d’a to koso-dəwje lə neḛ ləm tɔ .
17Yee gə́ bèe ɓa Mbaidɔmbaije pana:
Undaje loo mbuna dee’g teḛje,
Saaje rɔ sí rɔ dee’g gə́ gogo,
Ɓó tibije mbɔr né gə́ mina̰ lé el .
18N’a kwa sí gə́ rɔ neḛ’g, n’a to bɔ síje ləm,
Seḭ a toje ŋgan neḛje gə́ diŋgam gə njé gə́ dené ləm tɔ
Mbaidɔmbaije gə́ njesiŋgamoŋ ɓa pa bèe.
Currently Selected:
2 Njé gə́ Kɔrḭtə 6: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.