1 Njé gə́ Kɔrḭtə 14
14
Nénojije gə́ Ndilmeenda ar Eglisə lé
1Maji kar sí ndolèje goo meenoji. Narje rɔ sí gə mba kiŋga nénoji gə́ wɔji dɔ ndil sí tɔ nɛ ka̰ tegginta ɓa areeje ur dɔ dee’g lai. 2Tɔgərɔ ya, dəw gə́ pa takɔji dəwje-dəwje gə́ ubu pur-pur lé yeḛ pata ar Ala ɓó ar dəwje el mbata dəw kára kara oo ginee el ləm, Ndil ɓa aree pata wɔji ne dɔ né gə́ to loo-kiya’g ɓəi ləm tɔ. 3Nɛ yeḛ gə́ tegginta lé yeḛ pata ar dəwje gə mba kar dee d’unda siŋga dee dɔ maree’g ləm, gə mba ndəji dee ne ləma, gə mba gɔl dee ne ləm tɔ. 4Yeḛ gə́ pa takɔji dəwje-dəwje ubu pur-pur lé pa un ne rəa-yeḛ nja ar siŋgá ḭ ne dɔ maree’g nɛ yeḛ gə́ tegginta lé ɔr ta ar siŋga Eglisə ḭ dɔ maree’g tɔ.
5Ma m’ndigi kar sí-seḭ lai paje takɔji dəwje-dəwje ubuje pur-pur ya nɛ tegginta ɓa ma m’ndigi unda kubu ta pur-pur. Ɓó lé dəw pata koji dəwje ubu pur-pur ɓa ria dəa ndəgəsə ar Eglisə ŋgəŋ ne el ndá njetegginta ɓa uru dəa’g. 6Tɔgərɔ ya, ŋgakɔmje, ɓó lé ma m’ree mbuna sí’g m’pa takɔji dəwje-dəwje m’ubu ta gə́ kubu pur-pur m’lal riba dɔ né kára kara kar sí ləm, m’tɔji sí gosonégər kára kara el ləm, m’ɔr ginta kára kara el ləma, gə m’ndoo sí né kára kara el ləm tɔ ndá see m’to gə́ njekorè sí més loo gə́ ra’g wa.
7To kára ba asəna gə néje gə́ kanee keneŋ gə́ ɓar asəna gə tébé əsé gə kṵdu gə́ ɓar rima-rima ndá see dəw a gər pa kimee loo gə́ ra wa. 8Ɓó lé to̰to̰ ɓar maji sur el ndá see na̰ ɓa a gɔl dɔ rəa gə mba kaw rɔ’g wa. 9Seḭje kara ɓó lé seḭ paje ta budu-budu ndá see na̰ ɓa a gər tapa sí gə́ seḭ paje lé wa. Mbata tapa sí lé lel ɓa ula ne. 10Tapa dəwje ɓəd-ɓəd bula dɔ naŋg nee ya nɛ yeḛ gə́ lal ginee lé godo. 11Bèe ndá ɓó lé ma m’gər tapa lə dəw el ndá ma m’to gə́ dəw-dɔ-ɓee kəmee’g ləm, yeḛ gə́ njepata lé kara to gə́ dəw gə́ dəw-dɔ-ɓee kəm-ma’g ləm tɔ. 12To gə́ seḭ narje rɔ sí gə mba kiŋga ne nénoji gə́ wɔji dɔ ndil sí lé ndá narje rɔ sí gə mba kiŋga ne yeḛ gə́ a kunda siŋga Eglisə dɔ maree’g tɔ.
13Togə́bè ɓa, yeḛ gə́ pa takɔji dəwje-dəwje ubu pur-pur lé maji karee ra tamaji ta Ala’g mba kiŋga nénoji gə́ ka̰ kɔr ne ginee kar dee. 14Mbata ɓó lé m’ra tamaji lé m’pata koji dəwje-dəwje m’ubu pur-pur ndá ndiləm ɓa ra tamaji ya nɛ dɔm to̰ keneŋ kəw el. 15See m’a ra ban ɓəi wa. M’a ra tamaji gə ndiləm bura ya nɛ m’a ra gə kəmkàree tɔ. M’a kɔs pa gə ndiləm bura ya nɛ m’a kɔs pa gə kəmkàree tɔ. 16Tɔgərɔ ya, ɓó lé i ra Ala oiyo gə ndili ndá see deḛ gə́ d’isi gə mba koo ta lé see d’a koo loo ndigi ta ləi gə Amen loo gə́ ra’g wa. Mbata deḛ gər ta gə́ i pa lé el. 17Oiyo gə́ i ra Ala lé to maji yaa̰ ya nɛ i unda ne siŋga marije dɔ maree’g el.
18Ma m’ra Ala oiyo mbata yeḛ am m’pa takɔji dəwje-dəwje m’ubu pur-pur yaa̰ unda sí lai ya. 19No̰ Eglisə’g lé m’aw gə ta gel mi gə mba ndoo dee gə kəmkàree, yee ɓa ma m’ndigi unda pa takɔji dəwje-dəwje kubu pur-pur gə́ tɔl-dɔg-loo-dɔg gə mḭdé ba.
20Ŋgakɔmje, ta gə́ wɔji dɔ kɔr kəm ta lé maji kar sí tɔgje dɔ’g kaŋ-kaŋ ɓó telje ŋganje keneŋ el. Ta gə́ yèr ɓa maji kar sí toje ŋganje gə́ kas dɔ’g. 21To gə́ deḛ ndaŋg mee maktub godndu’g lé pana:
Takɔji dəwje gə́ raŋg ləm, gə tapa njékwagirlooje ləm tɔ,
Yee ɓa m’a pa ne ta kar dəwje neelé ya
Nɛ lé riri kara d’a taa el.
Mbaidɔmbaije ɓa pa bèe .
22Togə́bè ɓa, takɔji dəwje-dəwje gə́ d’ubu pur-pur lé to nétɔji mbata lə njépole-magəje ɓa ɓó mbata lə njétaamee-Kristije ɓa el. Nɛ tegginta lé to mbata njétaamee-Kristije ɓó mbata njépole-magəje ɓa el.
23Ɓó lé njé gə́ Eglisə’g lai d’wa dɔ na̰ ar deḛ lai pa takɔji dəwje ɓəd-ɓəd d’ubu pur-pur ɓa dəwje gə́ na̰je gə́ d’un meḛ dee el lé d’andə mbuna dee’g lé ndá see d’a pana: Deḛ to gə́ mbəje, see d’a pa bèe el wa. 24Ɓó lé deḛ lai gə́ d’isi keneŋ tegginta ɓa njetar-Ala əsé dəw gə́ ḭ raŋg andə mbuna dee’g ndá ta gə́ d’ɔr lé a kun dəa ləm, a kwá ləma 25ta gə́ mée’g a kinja gə́ raga ləm tɔ. Yen ɓa yeḛ a kunda barmba dəb kəmee naŋg gə mba kwa ne Ala mée’g ləm, yeḛ a kḭ kaw kila ne mbər pana: Ala lé sí mbuna sí’g tɔgərɔ ya ləm tɔ.
26Ŋgakɔmje, see ta ɗi tɔɓəi ɓa j’a pa wa. Loo gə́ seḭ waje dɔ na̰, ɓó lé dəw kára mbuna sí’g un pa gə mba kɔs ləm, əsé dəwje gə́ raŋg d’un ta gə mba ndoo sí ləm, əsé gə mba riba dɔ ta gə́ kəm dee inja dɔ’g ləm, əsé gə mba pa takɔji dəwje-dəwje kubu pur-pur ləma, əsé gə mba kɔr ginee kar sí ləm tɔ ndá maji kar dee ra néje lai neelé mba kar siŋga Eglisə ḭ ne dɔ maree’g ya. 27Ɓó lé dəwje pa takɔji dəwje-dəwje d’ubu pur-pur ndá maji kar dəwje jooje munda jen pata ɓó d’a kal ne dɔ dəwje munda el. Maji kar dee pa d’orè ne goo na̰ na̰ ləm, maji kar dəw kára tel ta lə dee ar Eglisə ləm tɔ. 28Ɓó lé njetelta lə dee godo ndá maji kar dee d’isi gə ta dee mundu dan Eglisə’g ɓa d’ula rɔ dee-deḛ ya ta ləm, d’a kula Ala ləm tɔ. 29Maji kar njéteggintaje kara deḛ jooje munda jen ɓa d’a pata nɛ njé gə́ raŋg lai d’a si gə mba kḛji gin taree meḛ dee’g. 30Ɓó lé dəw gə́ raŋg gə́ si keneŋ lé Ala riba sə dɔ ta kára ndá maji kar yeḛ gə́ njepata kédé lé ila təa maree’g ndag. 31Mbata seḭ lai seḭ asjekəm kɔr ginta korèje ne goo na̰ goo na̰ gə mba kar dəwje lai d’a ndoo ne né ləm, d’a ndəji dee ne ləm tɔ. 32Kankəm njéteggintaje lé d’ula dɔ dee no̰ njétegginta mar deeje’g. 33Tɔgərɔ ya, Ala lé to njekar néje d’aw na̰’d béréré-béréré ɓó to njekula ne na̰’d wɔr-wɔr el.
To gə́ m’pa mee Eglisəje lai lé 34maji kar denéje d’isi gə ta dee mundu loo-kwa-dɔ-na̰’g lé mbata loo pata lə dee godo keneŋ. Maji kar dee d’oso kul to gə́ godndu lé pa tɔ. 35Ɓó lé denéje ndigi koo ginta gə́ dəw kára pa gə́ d’oo ginee sur el lé ndá maji kar dee dəji ŋgaw deeje mee kəi’g, mbata kar dené pata togə́bè dan Eglisə’g ɓa to gə goo rəbee el. 36See ta lə Ala lé ḭ rɔ sí-seḭ’g nja ba wa. Esé see teḛ rɔ sí-seḭ’g nja gə kar sí ba wa. 37Ɓó lé dəw kára la̰ji mée’g pana: Neḛ n’to njetegginta əsé neḛ n’to gə́ dəw gə́ Ndil ula ta mee neḛ’g ndá maji karee gər gao to gə́ ta gə́ ma m’ndaŋg m’ar sí lé to torndu Mbaidɔmbaije ya. 38Ɓó lé dəw kára un kəmee dɔ’g rəw ndá maji kar sí unje kəm sí dəa’g rəw tɔ.
39Togə́bè ɓa, ŋgakɔmje, narje rɔ sí mba kiŋga nénoji gə́ wɔji dɔ tegginta lé nɛ a kɔg deeje dɔ pa takɔji dəwje-dəwje d’ubu pur-pur’g lé el. 40Maji kar néra sí lai wa bea ləm, gə aw na̰’d béréré ləm tɔ.
Currently Selected:
1 Njé gə́ Kɔrḭtə 14: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.