(Evangelio según San Marcos) 6
6
Jesús Nazaret pujusbau
(Mt. 13.53-58; Lc. 4.16-30)
1Jesús nuiya jiinki ni nugken wetai, jintintaiji aidaushkam niijai weajui. 2Nunik tsawan ayamtai tsawagmatai, jega ijuntainum nagkama jintinkagtutai nui kuashat antuidauk puyatjukag:
—¿Jusha tuwí imatikash unuimajuita? ¿Utusaya imatikash yachameajuita? ¿Tuwiyana senchinash jiyawa uwejinig aents dutikmainchaun dutika nunash? tuidau. 3¿Jujú carpinterowe duchaukaih, María uchijí nuigtú Santiago, José, Judas, Simón aina nuna yachi? ¿Umayí aidaushkam jutiijai batsatajama? Tusag pampantuidau. 4Tujash Jesús ditan chichajak:
—Profetak niina nugkenig, niina patayí aidaunmash tuja niina jeenish eme anentamak achauwai, tiuwai.
5Nuwig aents dutikmainchaunak makichkish dutikachui, nuniayatak ujumchik jau aidaun uwejin achik etsagakui. 6Nunik anentai jegagchauwai ditak dekaskeapi tuinachu asamtai. Nunik yaakat yaijuch aidaunum wekaegas Jesusak jintinkagtau.
Jesús jintintaiji doce aina nu ishiakbau
(Mt. 10.5-15; Lc. 9.1-6)
7Nunik ni jintintaiji doce aina nuna untsuká, jimá jimajan apatuk ishimtan nagkamauwai, dutikak wakan pegkegchau aidau jiimainnash senchijin susauwai. 8Dutikak jintá wesá atsumainuk wají egkesá jutaigkesh, pagkesh, akachumtaigmin kuichkikesh jukigpajum, ayatak ushujutaigmek jukitajum, 9nuniakjum sapat wegamaktajum, tujash nugkutaigmik pataká nugkujaigpajum, tiuwai. 10Tusa ditan chichajak:
—Makichik jeganum wayaakjumek nuig pujusjum weakjum ukuktajum. 11Tuja atum tu yaaktanma jegattagme nuniagmin jujamtan dakitjamainak, antugtamtanash dakitjamainakuig jiinkí ukuktajum, nuniakjum atumi akap dawemin yukukuntu awa nu pegagjum akakekjum ukuktajum dita suwimak jukitnujiya nu iwaintakjum. Dekas tajime, suwimak sukagtamu tsawan jegatna duik, nunú yaaktanmaya aents aina duka, nugka Sodoma Gomorra aajakua nui aents batsamajakú suwimak susamua nuna nagkaesau suwimkan jukiagtinai.
12Tima jintintaiji aidau shiyakag, aents aidau tudaujin idaiyinak pujutjin yapajiatnume tusag etsejuidau. 13Nuninak kuashat iwanch aidaunash jiijag ishimainak, jau aidaunashkam buuken aceitiyai nijak etsagaidau.
Juan yamijatin maamu
(Mt. 14.1-12; Lc. 9.7-9)
14Rey Herodes Jesús pachisa chichainamu ashí yantamnum naatun antuku. Wagki ujumak chichainak: “Juan Yamijatin maamua nu nantakiu asa, senchigtin wajas aents dutikmainchaun aikawai”, tuidau.
15Tikich chichaidau: “Auk Eliasai” tuinai, tikich chichaidau: “Profetayai nuniachkush profeta aajakú aina dutsukaitai”, tuidau.
16Nunú tuinamun Herodes antuk:
—Auk Juan wi buuké tsupigkatajum tii ai tsupijuk maawajamia nunú nantakne, tiuwai.
17Nunak Herodesak nigki Juan achiktajum tima shimutkag, achikag cadenayai jigkajag cárcel egkeau aajakui. Nunak ni yachi Felipe nuwe Herodiasan juki nuwatuk pujutai, 18Juan Herodesa chichajak: “Amek yatsumi nuweg nuwatkamek pujumaitsume”, 19tabaun Herodías antuk kajejuk maatatus wakegayatak dutikmainchau dekapeau, 20wagki Herodesak Juagnak ishamau, pegkegnak takau nuigtush pegkegman dekau asa, nuniak kuitamu. Herodesak Juan chichatai antujak tumainchau dekapeayatak, wakejus antuju. 21Nuniamunum Herodes ni akiinamuji tsawagmatai fiestamak, yutai umikbaun ni aentsji aidaujai nuigtú suntajá apuji aidau, galileanmaya eme anentsá diitai aidaujai yuwinak pekagbaunum, 22Herodiasa nawanji wayá nantsebau, nuniak Herodesan nuigtú niijai mesanum pekajuidaunashkam shiig awajkauwai. Nunikmatai rey nuwan chichajak:
—Ame wakegamu segattá, tujutkuminig amastajai.
23Tusa Apajuí pachis anagkuauwai ashí ni wajina segamua nuna nuniachkush ni inama nunakesh jimaituk susatatus.
24Tima jiinki dukujin jegajua chichajak:
—¿Wajinak segatjá?, tau.
Tama dukují ayaak:
—Juan Yamijatna nuna buuké segatá, tau.
25Tima nuwauchishkam wamkes rey pujamunum wayau, nunik:
—Yamaikiuch Juan Yamijatna nuna buuken platonum egkejá sujustí tusan wakegajai, tau.
26Tama rey shiig senchi wake besekú; nuniayatak ipaamu aidaush antuinamunum yapajimainchaun anagkuau asa, dakitmainchau dekapjauwai. 27Nuniku asa rey wamak makichik suntajan awemauwai, Juagká buuken tsupik itati tusa. Tima suntagshakam cárcel jegá Juagká buuken tsupigkauwai, 28dutika platonum egkea itauwai. Dutikamtai nuwauchin susau, tuja ni juki dukujin susauwai.
29Nu dutikamun Juagká jintintaiji aidau antukag wejiag, iyashin jukiag ukusajui.
Jesús cinco mil aents ayugkamu
(Mt. 14.13-21; Lc. 9.10-17; Jn. 6.1-15)
30Apóstol aidau Jesusjai ijunjaju, nunik ashí dita dutikamujin nuigtú jintinkagtuamujinash ujaidau. 31Tama ni chichajak:
—Minitajum, wegagmi agkan aents atsamunum, nunikjum machik ayamsatajum, tiuwai.
Wagki kuashat weenai tikich minidaush aidau asag yujumak yumainush agkantak atsujuidau. 32Nunik barcanum chimpimjag nugka agkantunum ditak shiyakajui.
33Tujash nunik wetatman kuashat aents aidau wainkag, tuwí weakua nuniawa nuna dekawag kukag juakiag tupikakiag ditá jegawaju. 34Jesús barcanmaya jinkamá shiig kuashat aents tuwaká ijunun wainkau, nunik wait anenmain diisui, uwig pastorji atsugbau wajukmaina numamtuk wajaidau asagmatai. Dutikak kuashat wají aidaun pachis jintintan nagkamauwai. 35Nuniai etsashkam akaegu asamtai jintintaiji aidau jegaantag:
—Juig aents atsamunum batsatji, etsash akaewai. 36Aentsuk akatjam ishiakta, aja aina nui nuigtú yaakat yaig aidaunum wegag yumainun sumaktinme, yumainjig atsujuinawai, tuidau.
37Tiagtai Jesús ayaak:
—Atum dita yuwatnuk susatajum, tau.
Tama dita aiinak:
—¿Jutii shiyakaiyash doscientos denariowai pag sumaka ayugkatag?, tuidau.
38Tiagtai ni ayaak:
—¿Wajupa pagka ajutjamainawa? wejum diistajum.
Tima wegag dekawag:
—Cinco pag nuigtú jimag namak awai, tuidau.
39Tusa ujakam:
—Aents aidau yajuakjum chijichi aina anui akanjajum batsagtajum, tiuwai.
40Tiajam ditashkam cien aentsun akanak batsainai, tikich cincuenta akanag batsaush aidau. 41Dutikawagmatai cinco pagkan nuigtú jimag namaka nuna juki, pagkai nayaimpin diis see tusa, pagkan puujá jintintaiji aidaun susaju, dita aentsun tinamkatnume tusa. Dutiksag namak jimaja nunashkam ashí tinamkau. 42Dutikawajam ashí shiig yuwawajui. 43Nunikagmatai pag namakjai ampinkaunak yajuakag doce chagkinnum aimjaju. 44Junak cinco mil aishmag aidau yuawajui.
Jesús yumí awanken wekaesá webau
(Mt. 14.22-33; Jn. 6.16-21)
45Nuna dutikamuik, jintintaiji aidaunak barcanum chimpijag ditaa eemak atú amain Betsaida katigtinme tusa ishimak, aents aidaun akateg ukuktatus juwakui. 46Nunik aentsun akateg ukuak mujanum wakauwai Apajuin ausatatus. 47Nunik kiyaju ai, barcashkam kuchá ejapean wegai nigka kukag juwaku. 48Nunikmá wainkau dase igku umpuamu asa, wiya wiyantuinakua pimpikiag tsawagtatak wedaun. Nuniamunum niishkam yumí awanken wekaegas ayaumas nagkaikitatus ditan adijkau. 49Nunik yumí awanken wekaegas minittaman wainkag, dita anentaimsajag pasun minatsuash tusag senchi untsumaidau, 50wagki ashí wainaidau asag ishamainak. Imatiagtai Jesús chichaak:
—¡Witjai, ishamkaigpajum! ¡Imatigpajum!, tiuwai.
51Tusa dita chimpigbaunum barcanum egkemjau, nunikmatai daseshkam mijaku; nunikmatai senchi puyatkag anentai jegagchaju. 52Wagki pag dutikamua nunakesh, dutikamape tusag anentaimtuinachu asag, utujimas anentaimaidau.
Jesús Genesaretnumia jau aidau etsagakbau
(Mt. 14.34-36)
53Kuchá amain katigkag Genesaret nugkanum anumkaju. 54Nunik barcanmaya jiinaidaunak Jesusan aents aidau wainkaju. 55Nunikag ashí yaaktanum wegag jau aidaun camillanum pataidiag Jesús nui pujawai tabaun antuinakug nui emaidau. 56Dutikaidau asag yaakat yaig aidaunmakesh, yaaktanmakesh nuniachkush ajanum batsatbaunmakesh ni tuwí jegawa nuwi jau aidaunak jintá aepedau, dutikam jaanchji weninakesh antigtajai tusag segaidau. Ashí nuna antidauk tsagagkaju.
Currently Selected:
(Evangelio según San Marcos) 6: AGR
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.