(Evangelio según San Lucas) 8
8
Nuwa aidau Jesusan yaigkú aina nu
1Nuna nunik Jesusak kuashat yaakat aidaunum nuigtú yaakat yaijuch aidaunmashkam wekaegas, yamajam chichaman Apajuí inabaujin pachis etseju, nunitai doce aina nunú uyunaidau, 2nuigtú ujumak nuwa wakan pegkegchau egkemtuamu, jau aidau etsagagbau aidaushkam uyunaidau. Nuanui pachitkau María magdalanmaya, siete wakan pegkegchau egkemtuamu jiijamua nunú, 3tikich Juana, Cuza Herodesa kuichkijin kuitamna nuna nuwe, Susana, nuigtú kuashat aidau ditá wajiiji aina nujai yaidau.
Ajakan ajakbau pachisa Jesús augmattsamu
(Mt. 13.1-9; Mr. 4.1-9)
4Makí makichik yaakat aina nuiya aents minidau Jesusan wainkatasag, nunikag kuashat tuwakagmatai Jesús juna pachis augmatak: 5“Ajakan ajakbau ajajin ajaka jigkayin nagkimak ukutatus weuwai, dutika ajakmau asa. Nunik ajajin jegaa nagkimkau, dutikam ujumak jigkai jintaa kakekauwai, nunikun aents najakag ukukbaun yakiya pishak kaketuk amukajui. 6Tikich jigkai kayagnunum kakekauwai, nunik tsapainiuwaitak jakauwai, chupitnuchu asamtai. 7Tuja tikich jigkaik jagki ayaunum kakekauwai, nunik tsapaittaman jagki yutua ijinauwai. 8Tujash tikich jigkaik nugka pegkegnum kakekajui, nunikajuk tsapaidiag shiig nejekajui, makí makichik ajak cien jigkain nejeawajui”.
Nuna tii senchi jiiká chichaak: “Ni antutaiji ajamuk antuktinme”, tiuwai.
9Timatai jintintaiji aidau, wají takumea nu augmattsamesh timaume tusag inidau.
10Tama ni ayaak:
—Atumnak Apajuí ni inabauji dekaachbau aajakajua nuna dekamtijamjume, tujash tikich aidaunak augmatbaujai pachisan augjai, wagki wainmainakush wainmachu wajukmaina nuniktinme tuja antuinakush antachu wajukmaina nuniktinme tusa, tiuwai.
Ajakan ajakbau timag nunak juna takun timajai tusa Jesús etsegkamu
(Mt. 13.18-23; Mr. 4.13-20)
11Wi ajakan ajakbaun augmattsan timag nunak juna takun timajai: Jigkaiya duka Apajuí chichamega nuuwai. 12Jintá jigkai kakekauwa duka, aents aidau chichaman antuidaun, Iwanch juwatki chicham ni anentain wayaun dekaskeapi tuinak uwemjainum tusa yajuta nuuwai. 13Jigkai kayanum kakekajua duka, chichaman antukag wakegas nemajuina nuna iwainawai; tujash nu ajak kagkapenachua duka, ujumak tsawantai dekaskeapi tuinawai; tujash utugchat minitam idaiyina nuuwai. 14Jagki ayaunum iyajua duka, chichaman antuina nuuwai; tujash tsawan wegamunum uyumamu aina nu, wiyakchameamu aina nu nuigtú dita wakegamu aina nuna anentaimtuinak ajak nejemainchauwa nunin wenawai. 15Tujash nugka pegkegnum iyajua duka, aents anentai pegkeg nuigtú wakegas antukag chichaman umiinak, imagnis pujuidauk, ajak pegkejan nejekua nunin ainawai.
Lámpara pachisa augmattsamu
(Mr. 4.21-25)
16Makichik aentskesh lámpara ekemakajag ichinkaik dukuchu ainawai, dutikachkush pegaká wapken awaigkagkesh apujchau ainawai, dutiktsuk yakí ekenin ainawai wayatatus minidaush tsaaptinun wainkatnume tusag. 17Numamtuk yamai uukbauwa nunik awa juka, atak paan wantinkatnai. Aantsag yamai dekamainchauwa dushakam atak shiig dekamu atinai.
18Juna tajim jujú shiig antuktajum, ni aja duka nuní kuashat suwam atinai, untsu atsuja duka, ajuttatuapi tusa anentaimta dusha atantam atinai.
Jesusa dukují ni yachi aidaujai kautuamu
(Mt. 12.46-50; Mr. 3.31-35)
19Jesusa dukují, yachi aidaujai tajuawajui; tujash ni wajamunmag jegamainchau dekapjajui kuashat aents tuwakaju asamtai. 20Nunitai niina ujainak:
—Amina duku yatsum aidaujai waipaktatus tajutjamawag agaa ijunui, tuidau.
21Tama ni ayaak:
—Mina dukug nuigtú mina yatsug aina duka Apajuí chichamen antukag umiina nu ainawai, tiuwai.
Jesús dase imijkamu
(Mt. 8.23-27; Mr. 4.35-41)
22Makichik tsawantai Jesús ni jintintaiji aidaujai barcanum chimpimjaju, nunik: Kuchá amain wegagmi. Tusag weedau, 23tujash katiamunum Jesusak kanaju. Nuniai dase senchi dasentak kuchan umpuau, nunitai barcanum yumi yajanak tepeattak ishamain wajau. 24Imanitai jegaantag ishintainak:
—¡Maestroh, Maestroh iik jakektatji! tuidau.
Tama shintaag dasen jiyak idaiyak, kucha tsukatunashkam:
—¡Mijakta!, tiuwai.
Tusá tamawaik dase imaniauk mijak, miyasu wajas patamsau. 25Nunikmatai ni jintintaiji aidaun chichajak:
—¿Dekaskeapi tabaugmish utugkaugme?, tau.
Tujash ishamkag anentai jegagchaju, nunikag ditak pempeentunikiag:
—¿Jusha ya asamtaiya dasesh, yumish ni chichamenash umijuinawa?, tudayinau.
Gadaranmaya aents wakan pegkegchau egkemtuamu
(Mt. 8.28-34; Mr. 5.1-20)
26Nunikag kuchá amain katigkag gadaranmaya batsamtai nugkeen Galilea igkuas awa nuwi anumkajui. 27Nunik Jesús jiinkimtai nunú yaaktanmaya aents, kuashat mijanai iwanch egkemtujam pujú igkugtatus jiintukiuwai, duka jaanchnash nugkuchu, jegaash pujuchu ukumatainum pujú. 28Nunú Jesusan wainak senchi untsumkau, nunik niina eemtin tikishmag senchi untsumak:
—¡Jesusah, Apajuí ashí tikich aidau nagkaesau muunta nuna Uchijiyah, minash utugtuktasamea miname! ¡Wait aneasam suwimkak sukagtusaipa!, tau.
29(Wagki Jesús, wakan pegkegchauwa nuna: Anú aentsuk jiinkim ukuktá tibau asa tiuwai. Nu aentsnak kuashat tsawantai wakan pegkegchau egkemtug pujuju, nuniau asamtai cadena aidaujai jigkajag kuitamaidau, tujash cadena aidaunak tsujimtikag, wakan pegkegchau nugka uwejush aidaunum emau.) 30Tutai Jesús iniak:
—¿Amesh yaitpa?
Tama ni aimak:
—Wika Untsujiyaitjai, tau.
Nunak kuashat wakan pegkegchau aentsun chimpimtua batsamtau asag tiuwai; 31nunú aidau Jesusan, waa muun ishamain akaga nuig awekagtipa, tusag segaidau. 32Nuanui kuashat kuchi mujanum dupaan yuwinak yujaidau asamtai, nuwi wayatjai idaikagtusti tusag segaidau, tiagtai niishkam; nuniktajum, tiuwai. 33Tima iwanch aidaushkam aentsnumia jiinjag kuchinum utsanawajui; dutikam kuchishkam pisajag betsag tajagak kuchanum najataunum iyagkag jinawajui.
34Nunikmatai kuchí kuitamin aidau nu nunikbaun wainkag pisajag yaaktanum jegawag etsejuinak, ajanum batsataidaunash dutiksag ujakajui. 35Tusá ujakajam: Wagkag ankae diisagmi, tusag wejiajui. Nunik Jesús pujamunum jegakmag, aents iwanch egkemtuamu aajakua duka pegkeg wajas, shiig anentaimas Jesusai ayaumas jaanchin nugkujá ekeemtatman wainkag ishamkaju. 36Nuniagtai nuna wainkau aidau aents aidaun, Iwanch egkemtuamu wajuk tsagaje nuna ujaidau. 37Tiagtai ashí aents nugka Gadaranum batsataidauk Jesusan yajá weti tusag segaidau, senchi ishamaidau asag. Tama Jesuschakam barcanum egkemag wakitkiu. 38Nunitai aents Iwanch jiijamushkam Jesusan segau niijai wetatus; tujash Jesús akateg ukuak:
39—Amek jeemin wakitkita, nunikam Apajuí amina ashí dutijama nunú etsegkata, tiuwai.
Tima wee ashí yaaktanum etsejauwai Jesús niina shiig kuashat dutika nuna pachis.
Jairo nawanji nuigtú nuwa Jesusa jaanchjin antigkua nu
(Mt. 9.18-26; Mr. 5.21-43)
40Jesús wakitki jegamtai kuashat aents tuwakajuk shiig aneas jukiaju, ashí aentsuk niina dakaidau asag. 41Nuniamunum Jairo daagtin, jega ijuntaiya nuna apuji tauwai. Nunik Jesusa tikishmatug segauwai niina jeen jukitatus, 42wagki niina nawanji shiig makichkiuch doce mijan ajamu tumaina nu jakattak tepau asamtai. Nunik wegaun kuashat aents wedau asag Jesusan chanuidau. 43Nunú aents aina nuiya makichik nuwa doce mijadai numpan puwak waitú pujú pachitkau, nuigtú kuashat ampijatin aidaunum ampimak ashí ni ajamuchijinak ashimkau; imaniakush makichkish etsagam asachui. 44Nunú nuwa ukunum jegantun Jesusa jaanchji wenin antigkui; dutikamuik numpa puwamujinak megkaekauwai.
45Dutikam Jesuschakam:
—¿Yaa antinkame?, tau.
Tujash ashí aents aidauk etsegchagtai, Pedro chichajak:
—Maestroh, kuashat aents tuwakag chanumpaina nu antimpakaja nuniaigkik, ¿ya antinkae tame?, tiu.
46Tutai Jesús ayaak:
—Makichik antinkau awai, wagki minaiya senchi jiinun dekapjajai, tau.
47Tutai nuwak, uumainchau dekapeak kujaukmaikia Jesusan jegantun tikishmatug, ashí aents antuinamunum, wajuk asaya antigke nuna pachis, nuigtú ni Jesús antiamuik tsagagbaujinashkam ujakú. 48Tutai Jesús ayaak: —Nawantah, ame dekaskeapi tabaugmia nu etsaentamjae, shiig agkan anentaimsam wetá, tiuwai.
49Eke Jesús chichaak wajai, Jairo jega ijuntaiya nuna apuji jeenia makichik aents tanta:
—Nawanjumek jakame, nuigtuk Maestrok waitkasaipa, tau.
50Tabaun Jesús antuk chichajak:
—Ishamkaipa, ayatak dekaskeapi tita nawanjumik aneantatui, tau.
51Nunik jeganum jegaa, wayamunum tikich aidaunak makichkish awayachajui, ayatak Pedro, Jacobo, Juan, nuwa jakauwa nuna apají dukují aina duke wayawajui. 52Tuja ashí aents aidauk buutuidau nuninak anentai idajuidau nuwauch jakaun anentaimtusag. Tujash Jesús chichajak:
—Buutigpajum jakache, ayatak kanaje, tau.
53Tutai dushikidau, jakaun dekaidau asag. 54Tujash nigka uwegnum achiak senchi chichaká:
—¡Nuwauchih nantaktá!, tiu.
55Tusá tamawaik mayai egkemtujam nantakmatai, Jesús chichajak: Yumain susatajum, tiuwai.
56Dutikamtai nuwauchi apajig dukujijai anentai jegachaju; tujash Jesusak:
—Ju junika ju pachisjumek makichik aentskesh ujakaigpajum, tiuwai.
Currently Selected:
(Evangelio según San Lucas) 8: AGR
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.